22-şi säuirde atalyp ötetin Düniejüzilik Jer künine orai keşe Astanadaǧy AQŞ elşiliginiŋ qyzmetkerleri qala äkimdigi ūsynǧan Sporttyq ortalyq aldyndaǧy uchaskeni tazalady. Nysan aulasyn kül-qoqystan tazartumen qatar, diplomattar jas köşetter de otyrǧyzdy.
Jer küni AQŞ-ta 1970 jyldan bastap dästürli türde atap ötiledi. Būl atauly künniŋ maqsaty – jūrtşylyqtyŋ nazaryn adamzat tarapynan qorşaǧan ortaǧa kelip jatqan ziian mäselesine audaru.
22-şi säuir 1990 jyldan bastap resmi türde Bükilälemdik jer küni retinde atalyp öte bastady. Sondai-aq, osy atauly kün AQŞ-ta Aǧaş otyrǧyzu küni retinde de belgili.
– Jer – bärimizge ortaq. Halyqaralyq jer künine biyl qyryq eki jyl tolyp otyr. Osy oraida biz de būl kündi özimizşe ataudy jön kördik: aulany qoqystan tazartyp, aǧaş otyrǧyzdyq. Būl – öte jaqsy meiram. Osy merekeniŋ arqasynda ärbir adam bir köşet otyrǧyzsa, osy arqyly özi tūrǧan jerdiŋ auasyn da tazartuǧa atsalysar edi. Biz öz kezegimizde AQŞ elşiligi atynan bizge qoldau tanytqan Qazaqstan halqyna, qala äkimdigine alǧys bildiremiz, – dedi AQŞ-tyŋ Qazaqstandaǧy elşisi Kennet Feirfaks.
Erkejan SÄTIMBEK
