Bılım jäne ǧylym ministrlıgı men Bükılälemdık qaita qūru jäne damu bankınıŋ bırlesken jobasy – «ZhasProject» Jastar korpusyn damytu jobasy 2017 jyly elımızdıŋ tört oblysynan 2000-nan asa qatysuşyny qamtysa, byltyr būl jobaǧa qatysqan jastardyŋ sany 3500-den asqan. Joba aiasynda jastar jylyjai, tıl kurstary men türlı üiırmeler aşqan. Sonymen qatar tıgın sehy, zergerlık siiaqty qolöner käsıbımen ainalysuǧa mümkındık tapqan jastar da köp.
Atalǧan jobanyŋ ötken jylǧy jūmysynan esep beru, jobaǧa qatysqandardyŋ üzdık tuyndylaryn jūrtşylyqqa tanystyryp, tıptı de köp jastardyŋ käsıp aşuyna dem beru maqsatynda ötkızılgen körmesı jäne «Armanda! Ūsyn! Iske asyr!» taqyrybyndaǧy respublikalyq forumy 7 aqpan künı elorda törınde dürkırep öttı. Körmege ötken jylǧy jobalardyŋ arasynan saralanyp alynǧan toqyma, qolöner būiymdary, zergerlık önımderı qoiyldy. «Bügıngı körmege bız eŋ jaqsy, eŋ üzdık degen jobalardy äkeldık. Jastar alty ai boiy jasaǧan jūmystaryn halyqqa körsetıp, şabyt alady degen ümıttemız» dedı jobany basqaru tobynyŋ jetekşısı Gülmira Eskendırova. Forum aiasynda söz söilegen düniejüzılık banktıŋ, memlekettık organnyŋ ökılderı men alty oblystan kelgen jobaǧa qatysuşylardyŋ üzdıkterı «ZhasProject» jobasynyŋ tiımdılıgı men önımı jaily oilaryn ortaǧa saldy.
«ZhasProject» jobasy qoǧamdaǧy älsız toptardy jūmysqa tartu jäne nätijesı ömırlık maŋyzy bar äleumettık qyzmetke beiımdeudı maqsat etedı. Jobany basqaru tobynyŋ jetekşısınıŋ aituynşa, 2018 jyly Aqtöbe, Qyzylorda, Qostanai syndy 6 oblysta 1000-ǧa juyq joba jüzege asyrylǧan. «Būl körsetkış jyl saiyn artatynyna senımdımız. Maqsatymyz – jastardyŋ käsıp aşuyna tiımdılık jasau bolǧandyqtan, bız qolymyzdan keletın barlyq mümkındıktı paidalanyp jatyrmyz. Mäselen, 28 qaŋtarda bız 6 oblysta forumdar ötkızıp, oǧan «Atameken» ŪKP-nyŋ biznes ökılderın, jergılıktı oryndardyŋ basşylaryn şaqyrdyq. Olar käsıp bastaimyn degen jastarǧa öz taraptarynan qandai qoldau jasai alatynyn aityp, jastarǧa şabyt berdı. Menıŋşe, būl jaqsy joba, jaqsy ideia ūsyna alatyn jastar üşın tamaşa orai» dedı Gülmira Eskendırova.
«ZhasProject» jobasy 14 pen 29 jas aralyǧyndaǧy ümıtkerlerge (oquşylardan basqa) 1 million teŋgege deiın grant ūtyp aluǧa mümkındık beredı. Būl aqşa biznes bastauşyǧa qaitarymsyz berıledı. Bıraq, jeŋıp alǧan jas jarty jyl halyqqa tegın qyzmet körsetuı tiıs. Serıktes retınde tuys, dostaryn tartuyna da bolady. Oqymaityn, jūmys orny joq nemese jūmys ısteitın, bıraq tabysy tömen jastarǧa kömektesuge den qoiatyn jobadan igılıktengen jastardyŋ bırı – Nūrsūltan Täjiev. Ol 3-toptaǧy mügedek bolsa da, kompiuterdı jetık meŋgergen. Osy mümkındıgın myqtap paidalanǧan ol mügedekterge baǧyttalǧan «İnva STO» jobasymen grant ūtyp alyp, käsıp bastapty. «Zhas Project jobasynan alǧan million teŋge öz mümkındıgımdı paidalanyp, jūmys bastauyma öte tiımdı boldy. Alty aidan berı mügedekter paidalanatyn bıraz būiymdar jasadyq. Endı mügedekter arbasyn özgertıp jasaudy qolǧa alamyz. Ūtymdy paidalansa, būl jobanyŋ qoǧamdaǧy älsız toptardyŋ käsıp bastauyna öte tiımdı» dedı Nūrsūltan Täjiev.
Aita keteiık, 2017 jyly qolǧa alynǧan būl joba, 2020 jylǧa deiın jalǧasyp, Qazaqstan boiynşa 8500 adamdy qamtidy dep josparlanǧan.
Qaliakpar ÜSEMHANŪLY
