Būl künde Astanada halyqqa qyzmet türlerin ūsynatyn türli oryndar köp. Olardyŋ ärqaisysy baǧasymen nemese sapasymen erekşelenedi. Biri arzan, biri qymbat. Qazaqta «Körpeŋe qarai kösil» degen söz osydan şyqsa kerek. Siz qalai oilaisyz?
Äigerim Seiitmatova,
student:
– Biz student bolǧan soŋ, aldymen qaltamyzǧa qaraimyz. Ras, Astanaǧa kelip, adam sengisiz baǧalardy körgenim bar. Jaqynda qūrbym ekeumiz «Hanşatyr» sauda ortalyǧyna bardyq. Sondaǧy düŋgirşektiŋ birinde jai ǧana qolşatyrdyŋ 23 myŋ teŋge tūratynyn körip, taŋ qaldyq. «Mūny kim alady?» dep özimizşe sybyrlasyp tūrǧanda, jap-jas qyz oilanbastan satyp aldy. Mümkin, sapasy jaqsy şyǧar. Biraq bazardan alǧan qolşatyrdan da su ötpeidi dep oilaimyn.
Ardaq Jaqsylyqova,
diktor:
– Tūrmysqa şyqqaly bazardan müldem kiim satyp almaimyn. Öitkeni, joldasym ekeumizdiŋ tabysymyz jetkilikti. Kiimderim firmalyq tauarlar. Al kündelikti qoldanylyp jürgen opa-dalabymdy Fransuz üiinen taŋdaimyn. Kölik satyp alatyn bolsam, «ǧaşyǧym» – Leksus300.
Şynymdy aitsam, arzan kiimderdi alǧym kelmeidi. Būl – qazirgi zaman talaby. Qyzmet babynda baiqaǧanym, adamdardyŋ bäri seni kigen kiimiŋe qarai baǧalaidy jäne soǧan säikes qabaq tanytady. Ony jasyrmauymyz kerek. Bylaişa aitqanda, men mūndai qadamdarǧa qoǧamdaǧy qajettilikten baramyn.
Merei Meiirbekov,
ekonomist:
–Arzan nemese qymbat būiymǧa jügiru är adamnyŋ özine bailanysty. Qazaq mūny «Körpeŋe qarai kösil» dep naq balamasyn ädemi tauyp aitqan. Özimniŋ äriptesterim arasynda tüstik uaqytynda as işuge biri– kafege, biri– meiramhanaǧa, biri– ashanaǧa, biri üiine barady. Minip jürgen kölikterimiz de ūqsamaidy. Taŋdau men qalau är adamnyŋ sanasyna, tabysyna, ömirlik täjiribesine bailanysty qalyptasatyn siiaqty. Degenmen, bar dep tasuǧa da bolmaidy, öitkeni ysyrapşyldyqtyŋ jaman qasiet ekendigi hadiste birneşe ret aitylǧan.
Gülmira AIMAǦANBET
