Men ärbır azamatqa maǧan senım artqany üşın rizamyn – N. Nazarbaev
Elbasy Nūrsūltan Nazarbaev Qazaqstan Respublikasy Prezidentın sailau nätijelerı boiynşa ekzit-poll qorytyndysyn jariialau räsımıne qatysty dep habarlady Aqordanyŋ baspasöz qyzmetı.
Is-şara barysynda ekzit-poll nätijelerı jariialanǧan jaŋalyqtar şyǧarylymy körsetıldı. Onyŋ qorytyndysyna säikes, prezidenttık sailauda Nūrsūltan Nazarbaev eŋ köp dauys jinady.
Jinalǧandarǧa arnaǧan sözınde Qazaqstan Prezidentı bükıl Qazaqstan halqyna rizaşylyǧyn bıldırdı.
«Men ärbır azamatqa, ärbır otbasyǧa maǧan el damuyndaǧy bükıl Täuelsızdık jyldary boiy senım artqany jäne osy jolǧy sailauda qoldaǧany üşın rizamyn. Kezekten tys prezidenttık sailau ötkızu ideiasy Qazaqstan halqy Assambleiasyna tiesılı. Būl şeşımdı qazaqstandyqtar qoldady. Menıŋ kandidaturamdy ūsynǧany üşın «Nūr Otan» partiiasyna rahmet aitqym keledı, partiia müşelerı jergılıktı jerlerde belsene jūmys jürgızdı. Sondai-aq Respublikalyq qoǧamdyq ştabqa da rizamyn. Onyŋ ökılderı bükıl respublikany aralady, halyqpen kezdesıp, elde jürgızılıp jatqan saiasatty tüsındırdı. Barlyq senımdı ökılder men belsendılerge alǧys aitamyn», – dedı Memleket basşysy.
Nūrsūltan Nazarbaev atqarylyp jatqan jūmystardy respublika azamattarynyŋ taǧy da qoldaǧanyn atap öttı.
«Osyndai jalpyǧa ortaq senım bolmasa, alǧa qoiylǧan mındetterdı jüzege asyru qiyn bolar edı. Sailauǧa rekordtyq qatysu körsetkışı qazaqstandyqtardyŋ bırlıgın, tūraqty memlekette ömır süruge degen qūlşynysyn, sondai-aq men ūsynǧan baǧdarlamalardy qoldauyn körsettı. Osynyŋ bärı Otanymyzdyŋ bolaşaǧy men örkendeuı üşın eselengen küş-quatpen jūmys ısteudı mındetteidı», – dedı Qazaqstan Prezidentı.
Memleket basşysy qazaqstandyqtardyŋ tūtastyǧyn, damuǧa jäne bolaşaq ūrpaq üşın biık maqsattarǧa bırlesıp jetuge degen talpynysyn körsetken sailaudyŋ tarihi mänıne nazar audardy.
«Sailau barysynda zaŋnama talaby tolyq saqtaldy. Sailaudy baiqauǧa köptegen şeteldık baiqauşylar men jurnalister keldı. Qazaqstan älemdık qoǧamdastyqqa biık saiasi mädeniet pen demokratiia qaǧidattaryn paş ettı, sol arqyly öz deŋgeiın älem aldynda taǧy bır satyǧa köterdı», – dedı Nūrsūltan Nazarbaev.
Qazaqstan Prezidentı el aldyna qoiylǧan auqymdy maqsattarǧa jetu üşın barlyq mümkındıkter bar ekenın aitty.
«Bızde bılıktı mamandar, jetkılıktı qarjy-qarajat, saiasi ornyqtylyq, halyqtyŋ bırlıgı men dostyǧy bar. Bız industriialandyru, «Nūrly jol» baǧdarlamasy aiasynda qoiylǧan mındetterdı oryndaimyz, Qazaqstannyŋ älemdegı damyǧan 30 eldıŋ qataryna kıruın qamtamasyz etıp, qazaqstandyqtardyŋ tūrmysyn jaqsartamyz», – dedı Memleket basşysy.
Soŋynda Nūrsūltan Nazarbaev Qazaqstan halqyna baq-bereke jäne tabys tıledı.
Is-şara barysynda Memleket basşysy sondai-aq üzeŋgılesterımen jäne respublikalyq qoǧamdyq ştab müşelerımen äŋgımelestı.
***
Qazaqstan Respublikasy Prezidentınıŋ sailauy barysynda Demokratiia instituty eldıŋ barlyq öŋırınde jalpyūlttyq ekzit-poll jürgızdı. Zertteuler 14 oblysty, sondai-aq Almaty jäne Astana qalalaryn qamtydy. Ekzit-poll saǧat 7-den 20-ǧa deiın 550 sailau uchaskesınde, sonyŋ ışınde 312 qalalyq jäne 238 auyldyq sailau uchaskesınde ötkızıldı. Ekzit-poldy ūiymdastyru jäne ötkızu ısıne 1500-den astam adam tartyldy. Qoldanylǧan saualnama ädısın şeteldık jäne qazaqstandyq ǧalymdar bırneşe ret synaqtan ötkızgen, būl senımdı, reprezentativtı mälımet aluǧa mümkındık beredı.
Qazaqstan Respublikasy Prezidenttıgıne kandidattar boiynşa ekzit-poll nätijesı mynadai boldy: N.Nazarbaevqa – 97,5%, T.Syzdyqovqa – 1,87%, Ä.Qūsaiynovqa 0,63% dauys berılgen.
