9 qyrküiek – qazaqtyŋ qabyrǧaly jazuşysy, Memlekettık syilyqtyŋ laureaty Dükenbai Dosjannyŋ tuǧan künı. Osyǧan orai, Ūlttyq akademiialyq kıtaphanada qalamgerdı eske alu keşı öttı. Oǧan suretkermen ömırde jaqyn syilasqan dostary, ärıptesterı, oqyrmandary jinaldy.
Zaŋǧar jazuşy Äbış Kekılbaev qalamdasy turaly jazǧan maqalasynda «Jüregıne söz qasietı qonǧan, tabiǧatyna tarta tuǧan, «bolsyn» degen ılgerı tıleumen jüretın, baladai aŋqau, anadai aŋǧal, erekşe daryn iesı sözden söilem, söilemnen suret körkemdegen jaqsylyqtyŋ diqanşysy bolyp elesteidı közıme» dep aitypty.
Dükenbai Dosjan – myŋ taǧdyrdyŋ jazuşysy. Onyŋ şyǧarmalary ūlttyq boiau men dästürge bai, adam janynyŋ qatparlaryna tereŋ üŋıle bıluımen erekşelenedı. Qalamger közı tırısınde 11 roman, 23 hikaiat, 100 äŋgıme jazyp, oqyrmany köp jazuşy atandy.
Keş barysynda qalamgerdıŋ jaqyn dosy, kurstasy Sūltan Orazalin söz zergerınıŋ adami bolmysy men şyǧarmaşylyǧy turaly oi örbıttı.
– Dükenbai – qazaq ädebietınde özınıŋ ornyn oiyp tūryp alǧan saŋlaqtardyŋ bırı. Onyŋ ömırı de kürdelı jaǧdaida öttı. Türlı qiynşylyqty da, qyzyqty da basynan keştı. Dükeş ömırden ötkelı de bıraz jyl öttı. Bıraq onyŋ kıtaptaryna degen qyzyǧuşylyq tolastaǧan emes. Men oǧan arnalǧan barlyq jiyndaryna qatysyp jürmın. Onyŋ ötken ǧasyrdyŋ alpysynşy jyldary jazǧan äŋgımelerı men povesterı ädebiette qūbylys retınde qabyldandy. Tarihi taqyrypqa da bırınşı bolyp qalam terbedı. Jazuşynyŋ jaryqqa şyqqan är tuyndysyna türlı közqarastar boldy. Ol zaŋdy da. Özım onyŋ alǧaş jazǧan äŋgımelerın öte joǧary baǧalaimyn, – dedı ol.
Sonymen bırge Marat
Mäjitov, Orynbai Janaidarov, Quanyş Jienbai, Joltai Älmaşūly sekıldı azamattar da körnektı qalamger jaiyndaǧy öz estelıkterımen bölıstı.
