Qazaqstan Prezidentı Qasym-Jomart Toqaev 26 mausym künı «Qazaqstan Respublikasy azamattarynyŋ boryş jüktemesın azaitu şaralary turaly» Jarlyqqa qol qoiǧan bolatyn. Osyǧan säikes kepılsız tūtynuşylyq qaryzy bar azamattardyŋ 300 myŋ teŋgege deiın negızgı bereşegı men oǧan eseptelgen ösımaqyny töleudı memleket öz mındetıne aldy. Būl turaly Ortalyq kommunikasiialar qyzmetınde ötken baspasöz mäslihatynda Eŋbek jäne halyqty äleumettık qorǧau vise-ministrı Svetlana Jaqypova tüsındırıp berdı.
Būl qaryzǧa negızgı boryş, syiaqy, aiyppūldar da kıredı. Qaryzy Jarlyqta körsetılgen mölşerden asatyn boryşkerlerdıŋ tek 300 myŋ teŋge kölemındegı bır bölıgı ǧana öteledı. Būl jaǧdaida olardyŋ qaryzy 3 million teŋgeden aspauy kerek.
– Prezident Jarlyǧyna säikes bes sanattaǧy otbasylardyŋ tūtynuşylyq qaryzdary öteledı. Būl sanatqa köpbalaly otbasylar, mügedek balany tärbielep otyrǧan otbasylar, asyrauşysynan aiyrylǧan otbasylar, 18 jastan asqan bala kezınen mügedekter men atauly äleumettık kömek aluşylar, sondai-aq ata-analarynan aiyrylǧan 29 jasqa deiıngı azamattar jatady, – deidı Svetlana Jaqypova.
Degenmen atalǧan bes sanatqa kıretın, bıraq nesiesı öteletınder tızımınde joq azamattar da bar. Svetlana Jaqypovanyŋ aituynşa, mūndai otbasylar turaly tolyq mälımetter aqparattar bazasyna engızılmegendıkten boluy mümkın. Sondyqtan ondai otbasylar qūzyrly organdarǧa tiısınşe tırkeluı tiıs.
Sondai-aq qaryzdy qaitaru şarty kollektorlyq kompaniialarǧa ötıp ketken azamattardyŋ bereşegı tek kei jaǧdailarda ǧana öteledı.
Nesiesı kollektorlarǧa ötıp ketken azamattardyŋ mäselesı ekı sanat boiynşa qaralady. Bırınşıden, nesie bank balansynan şyǧarylmasa, kollektor qaryz aluşy men bank arasynda bailanys ornatyp, onyŋ qaitaryluyna yqpal etedı. Al nesie bank balansynan şyǧarylyp, kollektorǧa satylyp ketse, ol ötelmeidı,- dedı Ūlttyq bank töraǧasynyŋ orynbasary Oleg Smoliakov.
