Keşe Qazaqstan Prezidentınıŋ bastamasymen qūrylǧan Nazarbaev universitetı alǧaşqy 446 tülegın ūşyryp, qoldaryna diplom ūstatty. Būl saltanatty räsımge Elbasy qatysyp, oqu oryndaryn tämamdaǧan küllı qazaqstandyq jastardy qūttyqtady.
– Osy künderı myŋdaǧan qazaqstandyq student elımızdıŋ universitetterın bıtırıp, diplom alyp jatyr. Men osy mınberden elımızdıŋ barlyq tülekterın qūttyqtaǧym keledı. Barşa jas mamandarǧa ömırde laiyqty oryndaryn tabuyna tılektespın, – dedı Memleket basşysy.
Qazaq elınde jastarǧa arnalǧan memlekettık qoldaular barşylyq. Ekı qolǧa bır jūmys tabamyn deitınderge de kömekter köp. Elımızdıŋ erteŋgı tızgının qolyna alar jastarǧa degen mūndai qamqorlyq IýNİSEF tarapynan da nazardan tys qalmapty. Būl qordyŋ baǧalauy boiynşa Qazaqstan jastardy damytudyŋ jahandyq indeksınde 27 oryndy ielenıptı. Elbasynyŋ aituynşa, jas memleket üşın būl joǧary körsetkış.
– Qazaqstanda elımızdı äleumettık-ekonomikalyq damytu baǧytynda atqarylyp jatqan auqymdy şarualardyŋ barlyǧy sızder üşın jasalyp jatyr. İndustriialandyru, «Nūrly jol» baǧdarlamalarynyŋ jüzege asyryluy, zauyttar men fabrikalardyŋ, äleumettık nysandar men infraqūrylymdar, baspanalardyŋ salynuynyŋ bärı – bolaşaq üşın qolǧa alynǧan jūmystar, – dedı Prezident.
2010 jyly alǧaşqy studentterıne esıgın aşqan Nazarbaev universitetı de – jastardyŋ älemdık deŋgeide bılım aluyna jasalǧan qamqorlyqtyŋ bır körınısı. Halyqaralyq bılım beru modelıne negızdele qūrylǧan universitet elımızdıŋ ǧylymi-tehnikalyq jäne injenerlık elitasyn jasaqtaityn ūlttyq brend retınde qalyptasyp keledı. Bılım berumen bırge, innovasiialyq zertteulerdı de qatar jürgızetın, qysqa merzım ışınde älemdık aituly oqu ordalarymen iyq tırese alǧan universitette oqu – är jastyŋ armany.
Biologiia, himiia, fizika, kompiuter ǧylymdary, robottyq tehnika men mehanotronika syndy mamandyqtar boiynşa kadrlar daiarlaityn bılım ordasynda oqu aǧylşyn tılınde jürgızıledı jäne jyl saiyn 500 adam oqu grantyna ie bolady eken. Oqu orny aşylǧannan berı ondaǧy jetı mektepte oqityn studentterdıŋ sany 2800-ge jetken.
Elbasy Nūrsūltan Nazarbaev bılım ordasynyŋ alǧaşqy tülegı bolu baqyty būiyrǧan jastardan ülken ümıt kütetının jetkızdı. Jastary üşın Otany qol ūşyn berıp, olardyŋ myqty maman bolyp şyǧuyna mümkındık jasady. Endı jastar da sonyŋ qarymtasy retınde elıne, halqyna qyzmet etuı tiıs ekendıgın Elbasy erekşe eskerttı:
– Sızderge ömırge joldama bere otyryp, bız özımızdıŋ asqaq maqsatymyzǧa bırşama jaqyndai tüstık. Būl – bızdıŋ sızdermen bırlesken ortaq jeŋısımız. Menıŋ Astanada ǧylym-bılım ortalyǧyn qūru armanym oryndaldy. Endı senderge aitarym, eŋ aldymen Otanǧa qyzmet etıŋder. Elımızdıŋ igılıgı üşın, Qazaqstannyŋ örkendeu üşın jūmys ısteulerıŋ kerek, – dedı.
Biyl bıtırgen studentterdıŋ köpşılıgı gumanitarlyq jäne äleumettık ǧylymdar mektebınde, ǧylym jäne tehnologiialar mektebınde, injeneriia, joǧary biznes, joǧary memlekettık saiasat jäne joǧary bılım beru mektepterınde bılım alǧan eken. Endı olardyŋ qanşalyqty bılım alǧany maman retınde jūmysqa ornalasqanda synalatyny anyq.
Osynau saltanatty räsım kezınde Nazarbaev universitetınıŋ jaŋa bes qabatty ǧimaraty da aşyldy. Būl nysan elordanyŋ Tūran köşesı boiynda ornalasqan.
Qymbat NŪRǦALİ
