Keşe Astanadaǧy Qazmedia ortalyǧynda Aimaqtyq būqaralyq aqparat qūraldary ökılderınıŋ forumy ötıp, onda otandyq mass-media mäselelerı jäne olardyŋ jai-küiı men damu keleşegı talqylandy. Maŋyzdy jiynǧa QR Aqparat jäne kommunikasiialar ministrı Däuren Abaev qatysty.
Forumnyŋ basynda Däuren Abaev söz alyp, ministrlık Memleket basşysynyŋ tapsyrmasymen aimaqtyq mass-mediany jaŋa deŋgeige köteru şaralaryn qolǧa alǧandyǧyn baiandady.
– Bügıngı forumda osy saladaǧy tüiındı mäselelerdı özderıŋızben bırlese talqylap, özara täjıribe almasudyŋ tamaşa mümkındıgı bolmaq. Jalpy, memlekettıŋ aqparattyq saiasatyn jüzege asyruda aimaqtyq media ülken röl atqaratyndyǧy aian. Būqaranyŋ özektı mäselelerın jergılıktı baspasöz ben telearnalar bırınşı bolyp köteredı. Elbasy saiasatyn nasihattau, bırlık pen tūraqtylyqty nyǧaitu, ūlttyq müddenı qorǧau, öŋırlık media ūdaiy nazardan tys qaldyrmaityn altyn arqau sanalady. Oǧan qosa, olar jurnalistika salasyna sapaly kadr daiarlau ūstahanasy retınde qyzmet atqaryp otyr. Bügıngı künı elımızde 3 myŋǧa juyq būqaralyq aqparat qūraldary tırkelgen bolsa, sonyŋ 80 paiyzyn öŋırlık media qūraidy. Osynyŋ özı öŋırdegı BAQ-tyŋ yqpaldy küş ekenın körsetedı, – dedı ministr.
Sonymen bırge, Däuren Äskerbekūly bügıngı taŋda öŋırlık mediaǧa airyqşa közqaras talap etıp otyrǧandyǧyn jetkızdı. Onyŋ bırden-bır joly – jaŋa tehnologiialardy qarqyndy damytuǧa mümkındık jasau. Ministrdıŋ aituynşa, eŋ jedel saittardyŋ özı aqparat taratuda äleumettık jelılerdıŋ jyldamdyǧyna ılese almai otyr. Bügınde kez kelgen adam qandai da bır oqiǧany bolmasyn mobildı telefon arqyly taratatyn deŋgeige jettı. Osyndai joiqyn bäsekede ūtylmau üşın aimaqtyq medianyŋ aldynda bır ǧana jol bar. Ol – zamanǧa sai kürdelı özgerıster jasau. «Qazırgı künnıŋ talaby – aqparatty jedel ärı sapaly taratu ǧana emes, tūtynuşynyŋ qyzyǧuşylyǧyn däl tauyp, oqyrmanmen tıkelei bailanys ornata bılu. Sonymen qatar, eldıŋ müddesın, halyqtyŋ mūŋ-mūqtajy men öŋırdegı basqa da özektı mäselelerdı tereŋ saraptap, memlekettık saiasattyŋ baǧyt-baǧdaryn halyqqa tiımdı täsıldermen jetkızu» dedı ol.
Forum barysynda üş sessiia boiynşa taqyryptar belgılenıp, qyzu pıkırtalas örbıdı. Mäselen, «Qazaqstandyq media – naryqtaǧy daǧdarys – menedjment» taqyrybynda «Astana» telearnasynyŋ bas direktory Läzzat Tanysbai qazaqstandyq jurnalisterdı alaŋdatyp otyrǧan mäselelerge keŋırek toqtaldy. Ol, bırınşı kezekte, elımızde aqparat mäselelerı jönındegı jaŋa zaŋǧa qatysty problemalardy talqylauǧa öz ärıptesterın belsendı qatysuǧa şaqyrdy. «Jalpy, BAQ salasynyŋ ökılderı osy zaŋnyŋ talqylanuyna atsalysuymyz kerek. Odan bas tartuǧa bolmaidy. Öitkenı ol – sız ben bızdıŋ kündelıktı tırşılıgımız, erteŋgı jūmysymyzdyŋ sättı boluyna yqpal jasaidy. Sonymen qatar, taǧy bır maŋyzdy mäsele bar. Bız, jurnalister, kündelıktı jūmysymyzda ekı ülken ūǧymnyŋ arasynda taŋdau jasaumen jürmız. Iа naryqqa jūmys ısteimız nemese ūlttyq qūndylyqtardy saqtauǧa qyzmet etemız. Osy bır taŋdauda jürgen bız üşın de qazır ülken mäseleler tūrǧan sekıldı» dedı ol. Reseilık «NTV» telearnasynyŋ jaŋalyqtar baǧdarlamasyn jürgızuşı Liliia Gildeeva osy saladaǧy paiymdy pıkırımen bölıstı. Ortalyq kommunikasiialar qyzmetınıŋ basşysy Evgenii Kochetov te aqparat salasy turaly salmaqty söz qozǧady. Sodan keiın aimaqtan kelgen jurnalister QR Aqparat jäne kommunikasiialar ministrı Däuren Abaevqa özderın mazalaǧan sūraqtaryn qoidy. Ministr de olarǧa tiianaqty jauap berıp otyrdy.
Jiynda otandyq BAQ ökılderınıŋ basyn bırıktıretın alians qūru turaly da oilar aityldy. Qysqasy, forumda otandyq jurnalisterdı beitarap qaldyrmaityn özektı mäseleler sarapqa salyndy.
Azamat ESENJOL
