Beisenbı künı Astana qalasynyŋ äkımdıgı men Resei Federasiiasy Penza oblysynyŋ basşylyǧy arasynda sauda-ekonomikalyq, ǧylymi-tehnikalyq jäne mädeni yntymaqtastyq turaly resmi kelısımge qol qoiyldy.
– Bügın, mıne, köpten josparlaǧan jobalarymyzdy jüzege asyruǧa özek bolatyn kelısımşartqa qol qoimaqşymyz. Ekıjaqty kelısım özara ıs-qimylymyzdy odan ärı damytuǧa serpın beretınıne senımım mol, – dedı kezdesu barysynda Astana qalasynyŋ äkımı İmanǧali Tasmaǧambetov.
Penza oblysynyŋ gubernatory Vasilii Bochkarev elordalyq ärıptesterınıŋ qonaqjai peiılıne jyly lebızın bıldırıp, Astanamen ärqaşan ärıptestıkke äzır ekenın aitty. Ol öz sözınde Qazaqstan men onyŋ jas elordasynyŋ tauarlary, qyzmet salasy Penza oblysy arqyly Reseige keluın hoş köretının, oǧan ärqaşan qoldau körsetuge daiyn ekendıkterın jetkızdı. Sondai-aq, özderındegı jer, mülık salyqtaryn jeŋıldetetın baǧdarlamalar Qazaqstan jaǧyna da tiımdı bolatynyn atap öttı.
Qos tarap jasasqan kelısım aiasynda Astanada Penza oblysynyŋ ökıldıgın, al Penza oblysy aumaǧynda Astana qalasynyŋ ökıldıgın aşu qarastyrylǧan. Qala äkımınıŋ aituynşa, mädeni saladaǧy ärıptestık 2013 jylǧa josparlanyp otyrǧan Penza oblysynyŋ Astanadaǧy mädeni künderınen bastau alady. Kelesı jyly oblys 350 jyldyǧyn atap ötedı. Qolǧa alynatyn şara osy mereitoiǧa arnalady.
Ekı jaqtyŋ yntymaqtastyq qūjatyna qol qoiu räsımınen keiın Astana qalasynyŋ äkımı İmanǧali Tasmaǧambetov pen Penza oblysynyŋ gubernatory Vasilii Bochkarev industrialdyq park aumaǧyndaǧy «Tūlpar-Talgo» jolauşylar poiyzyn şyǧaratyn, lokomotiv qūrastyru zauyttaryn jäne jaŋadan salynǧan «JEO-3-tı» aralap kördı.
Sonymen bırge, Penza oblysynan kelgen delegasiia Täuelsızdık saraiy, Respublikalyq neirohirurgiia ǧylymi ortalyǧy, «Saryarqa» respublikalyq velotregı, «Astana-Arena» stadiony syndy maŋyzdy nysandar men jäne 1-2 jeltoqsan künderı ötetın konki tebu sporty boiynşa Älem Kubogyna qyzu daiyndalyp jatqan «Alau» mūz aidynyna baryp, zamanaui qūrylǧylarmen jabdyqtalǧan ǧimarattardyŋ sän-saltanatyna kuä boldy.
Qymbat TOQTAMŪRAT
