Mügedekter üiı. Arbaǧa taŋylǧan bozbala ǧūmyr. Auyr oi eŋsenı basqysy keledı. Jas jıger erık bersın be?.. Sol jıgerı ǧoi, Qūrmaşty ömırden baz keştırmei, qairatyn janyp otyrǧan. Äitpese… iä, äitpese, endıgı bordai müjılıp, ügıtılıp keter me edı, kım bılsın?! Taǧdyrdyŋ synaǧy, jazmyştyŋ jazuy dep tüsınedı. Tüsınedı de jaŋa ǧana bastalyp jatqan bozbala ǧūmyryn, jarqyn sätterın, şattyqty janaryn aŋsaidy. Aŋsaidy da saǧynady. Saǧynǧan sätte keudedegı bır kesek etı taǧy da janşylyp, oimen, mūŋmen, mazasyzdyqpen, qala berdı jalǧyzdyqpen küresedı.
O-o-o, ol kezde bärı jaqsy edı ǧoi…
Ädemı otyrys basyndaǧy äŋgımenı bezıldei jönelgen qoŋyrau ünı būzdy. Şetkerırek otyrǧan Qūrmaş esıktı aşa qoimaq edı. Būl barǧanşa, qoŋyrau taǧy «alqymnan alyp» barady. Ilgektı aǧytqany sol, basa-köktep kırgen jetı-segız jıgıt tabaldyryqtai attai jaǧasyna jarmasty onyŋ.
– Ei, sen nege aşpai jatyrsyŋ? Älde, jaqtyrmai tūrsyŋ ba?.. –
Äkıreŋdei kırgender kolledjdıŋ «starşaktary » edı. Auyzdarynan araq pen şylymnyŋ külımsı isı müŋkidı.
– Tamaqtaryŋdy qyzǧandyŋdar ma?! Kerek bolsa, şetterıŋnen keŋırdekterıŋdı suyryp alamyz! – deidı taǧy. Būl kezde dastarhan basynda otyrǧan Qūrmaştyŋ dostary da dälızge şyǧyp, toptala qalǧan. «Starşaktardyŋ» osy jolǧy basynuyna şydamdary şydas bermedı. Kikıljıŋnıŋ arty şyn töbeleske ainaldy…
***
Qūrmaş esın auruhanada jidy. Appaq tösek. Appaq däkege qabattala oralǧan ekı aiaǧy joǧaryǧa asylyp tūr. Belın batpandai qorǧasyn basyp qalǧan siiaqty.
***
Būl jatqan oblystyq auruhananyŋ zaqym kelgen jūlynǧa ota jasauǧa qauqary joq. Astanadaǧy onkologiialyq auruhanaǧa jıberdı. Mūnda da appaq bölme, aq tösek, aq halatty därıgerler… Älgınde bölmesıne kelgen qara tory öŋdı medbike qyz erteŋ ota jasalatynyn jetkızıp ketken. Işınde qorqynyş bar. Jüre almai qalsa ne ıstemek? Jalǧyz anasy bolsa – zeinetker. Jalǧyz aǧasy tırşılık qamymen osynda, Astanada qūrylys jaǧalap jür. Kımnıŋ moinyna masyl bolmaq?! Bıraq būl Astana ǧoi! Därıgerlerı de bılıktı bolar.
«Ümıtsız – saitan». Jıger jasymasynşy! …Tüs körıptı. Tüsınde qara tünektıŋ ışınde adasyp jür eken deidı. Alystan jarymjan säule közge şalynady. Soǧan jetsem dep qarmanady. Äl-därmenı erık berer emes… Oianǧanda bıldı. Ota jasalyp qoiypty. Keşegı medbike külımdep, jymiyp tūr. «Operasiia sättı aiaqtaldy» deidı. Bır jetıden soŋ ekınşı ota jasalmaq. Özın-özı edäuır jaqsarǧandai sezıngen. Baldaqpen tūryp-jüre alady. Anda-mūnda öz aiaǧymen barady. Quanyşty! Aldaǧy armandary turaly oilaidy. Qiialdyŋ biıgıne samǧaidy… Älgındegı medbike qandai süikımdı edı! «Jaǧdaiyŋ täuır me?» dep, aiaǧynan sipady ǧoi. Bolar bolmas jany bar baltyry sūludyŋ jūmsaq alaqanynyŋ jyluyn sezıngen… Taǧy sipai tüsse eken deitındei. Qos baltyrdyŋ dauasy sol qyzdyŋ alaqanynda siiaqty…
Bügın soŋǧy operasiia! Därıgerdıŋ tüsı suyqtau körındı būǧan. Ony- mūny sūrap, qasyndaǧy medbikelerge otaǧa daiyndaŋdar degendı işaramen bıldırdı de, qaita şyǧyp kettı. Köp ūzamai közı ılınıp ketıptı…
Taǧy da ötkendegı tüs: qap-qara tünek… jarymjan säule mūnartady… barǧysy keledı… jetkızer emes…
Közın aşqanda bölmede jalǧyz edı. Jürek tūsy äldenege qobaljuly. Tūlaboiy ūiyp qalǧandai. Aiaqtaryn qozǧaltyp köredı. Jan joq!.. Sipaǧandy da sezbeidı! Sezıner emes! Özı ölımşı ümıt bır lap etıp, söndı de qaldy! Özı üzdıgıp tūrǧan ümıt üzılıp kettı! Ümıt… Süikımdı medbike de būl bölmege
at ızın salmady bügın…
***
…Köp ūzamai elordadaǧy Qarttar men mügedekterge arnalǧan medisinalyq-äleumettık mekemesınıŋ tabaldyryǧyn attady. Astyna mügedekter arbasyn berdı. Medbikeler qas-qabaǧyna qaraidy. Uaqytyly därı-därmekterın berıp, emdeu şaralaryn jürgızedı. Ärı özı sekıldı jarymjan adamdarmen tanysady, äŋgımelesedı. Bırde teledidardan mügedekter arbasymen olai da, bylai da oiqastap, bilep jürgenderdı baiqap qaldy. Sosyn aŋsary bige audy da tūrdy. Bırden alyp ketu qiynǧa soqqan-tyn. Keiın kele bapker de tabyla kettı. Äliia esımdı jattyqtyruşy Qūrmaştyŋ talabyn körıp, quana jetekteitının
aitqan. Özı tūratyn mekemenıŋ akt zalynan şyqpaidy. Daiyndalady, qimyldaidy, ter tögedı. Äliia jıgerın janyp, odan bırnärse şyǧatynyn aityp, qairai tüsedı.
Bırneşe jarystarǧa da qosty. Oljasyz qaitqan emes. Jaqynda Gollandiiaǧa baryp-qaitty. Halyqaralyq chempionatta jaman nätije körsetken joq. Endı elımızde ötetın dodaǧa qatyspaq…
P.S.
Keiıpkerımız Qūrmaş – Qūrmanäli Äbuov. Erık-jıgerınıŋ myqtylyǧynan bolar, bır aiaǧyna jan ene bastaǧanyn aitady. Özı de senımdı erteŋıne, älı-aq attai şauyp keterıne. «Bärı taǧdyr jazuy,-deidı ol,-könemın, bıraq jeŋıp şyǧam!»
Qūrmaş jeŋıp şyǧady!..
Ashat RAIQŪL
