Bala künımızde siqyrşylardyŋ közdı arbaityn siqyrly taiaǧy men san türlı äreketterıne köz almai qarap, olardyŋ qas-qabaǧy men köz qiyǧyn erekşe qadaǧalap otyratynymyz bärımızdıŋ esımızde. Taŋǧajaiyp älemge säbi jürekpen tamsanatynbyz. Bız ǧana emes, ülkender jaǧy da op-oŋai aldanyp qalyp, arqa-jarqa mäz bolyp, sonau alysta qalǧan balalyq däurenderıne bır saiahat jasap qaitatyn. Sol ǧajaiyptar älemıne qaita oralǧyŋyz kelse, 5-6 şılde künderı ötetın bırınşı halyqaralyq «Magic Astana» – «Siqyrly Astana» illiuzionister festivalıne kelıŋız.
«Siqyrly Astana» – elımızde tūŋǧyş ret qolǧa alynyp otyrǧan bıregei joba. Būryn-soŋdy ötpegen festivaldı ūiymdastyruşylar şarany endı jyl saiyn jüzege asyrmaq.
Elorda törıne älemnıŋ tükpır-tükpırınen siqyr önerınıŋ saŋlaqtary keletın bolady. Ekı kündık şou barysynda magiia önerınıŋ maiyn ışken maitalmandar Beibıtşılık jäne kelısım saraiynda jinalǧandarǧa esten ketpes şou ūsynady. Baǧdarlamanyŋ auqymy keŋ. Közdı aşyp-jūmǧanşa talai qyzyqtyŋ kuäsı bolasyz. Öz ısınıŋ şeberlerı būryn-soŋdy bolmaǧan keremetterdı körsetuge uäde etıp otyr.
Festival qonaqtarynyŋ arasynda «otqa tüsse janbaityn» aǧaiyndy Safronovtar bar. Olarǧa älemde teŋ keler önerpaz az. Resei, Japoniia, Amerika memleketterınıŋ mamandary jūmys ısteitın ekskliuzivtı baǧdarlamalaryn özderı daiyndaǧan. 2012 jyly «Adamdy tırıdei örteu» illiuziiasymen talaidy taŋ qaldyrǧan. Būl siqyr türın osy uaqytqa deiın telearnadan nemese ǧalamtor betterınen körıp jürgen astanalyqtar endı betpe-bet tamaşalai alady.
Reseide fokus önerımen ainalysatyn jalǧyz qyz Aleksandra Skachkova da – tıkelei efir arqyly tanylǧandardyŋ bırı. Ol fokusşylardyŋ «Udivi menia» telejobasynyŋ aqtyq synynda top jarǧan. Aleksandra zaldaǧy halyqpen tıkelei jūmys ıstegendı ūnatady.
«Udivi menia» şouynyŋ 3-mausymdaǧy taǧy bır jeŋımpazy – Anton Abraşekov. Ol fokusşy-manipuliator retınde ūşqan qūs, jügırgen aŋdy qybyr etkızbeidı. On jyldyq täjıribesı bar taǧy bır talant elımızge quana-quana qadam basatynyn jetkızıptı. «Udivi menia», «Ulichnaia magiia» jobalarynyŋ qatysuşysy Aleksandr Murataev törde otyrǧan qalyŋdyqty toi üstınde tyǧyp qoiatyn önerımen erekşelenedı.
On jylǧa juyq ertegı älemıne jetelep jürgen talantty ärtıs Pavel Karahtanov ta qūr kelmeidı. Körermender būl öner iesımen Resei arnalary arqyly jaqsy tanys. Är joly baǧdarlama jürgızuşılerı onyŋ qimyl-äreketın operatorlar tüsırıp ülgere almaityndyqtaryn aityp, bas şaiqaǧan.
«Fenomen», «Taŋǧajaiyp adamdar» şouynyŋ jeŋımpazy, sondai-aq «Ukrainanyŋ bırınşı fenomenı» atanǧan Artem Tihevich Beibıtşılık jäne kelısım saraiyn dür sılkındıretınıne senımdı. Ol öz önerın erekşe baǧalaidy. Psihologiialyq, magiialyq qasietter men ışkı tüisıgı arqyly jūmys ısteidı. Mäselen, bala kezınde Artem multfilm körgısı kelse, äkesı tamaşalap otyrǧan futbol arnasyn op-oŋai auystyryp jıberetın körınedı.
Qyrǧyz elınıŋ joǧary sanatty siqyrşysy, IBM müşesı, amerikandyq SAM bauyrlastyq klubynyŋ müşesı, Europada ötken «Bitvy magov» jäne basqa baiqaulardyŋ jüldegerı İldar Iаgofarovtyŋ qolyna tüsken dünie sol sätte ǧaiyp bolady. Basqa bıreudıŋ qaltasynan tabyluy mümkın ne aspanǧa ūşyp joǧalady. Auada qalyqtap, külge ainalady. Qyryq bölıngen qaǧaz aqşa qaita qalpyna keledı. Adamdar «ūşyp», qasyq-şanyşqylar qol tigızbeseŋız de özderı qimyldap, auzyŋyzǧa as salady. Qysqasy, mūnyŋ bärın körgen de, körmegen de armanda.
Gollandyq illiuzionisterdıŋ «Magic Unlimited» toby ärıptesterın myŋ oraityn oilary bar. Qūramynda kartaşylar men joramal jasauşylar, adamdyq keiıpten şyǧyp, basqa beinege op-oŋai ainalyp ketetınder, joǧalyp-tabylatyndar, «ölıp-tırıletınder» tolyp jatyr.
Qoryta aitqanda, asqaq Astananyŋ mereilı künderı «Magic Astana» – «Siqyrly Astana» illiuzionister festivalı esten ketpes estelıkter qaldyrmaq.
