Keşe Astanada belgılı saiasattanuşy, şyǧystanuşy ǧalym Rasul Jūmalynyŋ «Arab pasiansy. Jüzjyldyqtar hronikasy» monografiiasynyŋ tanystyrylymy öttı. QR Prezidentı janyndaǧy Qazaqstannyŋ strategiialyq zertteuler institutynyŋ qoldauymen jaryq körgen eŋbekte HH ǧasyrdyŋ basynan berı qazırgı zamanǧa deiıngı arab älemındegı qoǧamdyq-saiasi özgerıster turaly, būl özgerısterdıŋ Taiau Şyǧys elderıne jäne Qazaqstanǧa äserı jönınde baiandalady.
– Otandyq saiasattanu ǧylymynda Ortalyq Aziia nemese Qytai baǧyty boiynşa osy künderge deiın bıraz zertteuler jürgızıldı. Alaida Taiau Şyǧystaǧy jaǧdai saiasattanuşy ǧalymdarymyzdyŋ nazarynan tys qalyp jatty. Äsırese, qazırgı zaman oqiǧalaryn sipattaityn zertteulerden tapşylyq sezıledı. Bızge būl taqyrypqa qatysty maǧlūmat kerek bolǧanda, şeteldık būqaralyq aqparat qūraldary men şeteldık sarapşylardyŋ zertteulerıne jügınetınbız. Sodan oi-pıkırımız olardyŋ közqarasy tūrǧysynan tüzıletın. Al älemde bolyp jatqan türlı oqiǧalarǧa Qazaqstan ǧylymy közımen, el ǧalymdary pozisiiasy tūrǧysynan qarauymyz kerek. «Arab pasiansy. Jüzjyldyqtar hronikasy» monografiiasy bızge sondai mümkındıktı berıp otyr, – deidı QR Prezidentı janyndaǧy Qazaqstannyŋ strategiialyq zertteuler institutynyŋ direktory Erlan Qarin.
Monografiia avtorynyŋ sözınşe, Qazaqstan täuelsız memleket bolǧannan keiın, alys-jaqyn şetel memleketterımen qarym-qatynas jasap, sol eldermen yntymaqtastyq jönınde türlı kelısımderge otyruda. Al mūndai bailanysqa saraptamalyq tūrǧydan baǧa berıluı tiıs.
«Älemde oryn alyp jatqan özgerısterdıŋ bızdıŋ aimaqqa, onyŋ ışınde Qazaqstanǧa qandai äserı boluy mümkın? Qauıp-qater tudyratyn oqiǧalardyŋ qalai aldyn alamyz? Özımnıŋ eŋbegımde sony aşuǧa tyrystym. Ony osydan 10-12 jyl būryn qolǧa alǧan bolatynmyn. Bıraq belgılı bır sebeptermen orta joldan toqtatuǧa tura keldı. Ötken jyldary arab älemındegı jaǧdai kürt uşyǧyp ketkennen keiın, Liviiada, Iemende, Mysyrda dürbeleŋ tuyp, Siriiada azamattyq soǧys bastalǧannan soŋ, monografiiany qaita jazudy jalǧastyrdym. Şyndyǧyna kelgende, şeteldık közderden berılgen aqparat aqiqatqa jaqyndai bermeidı. Qaitkende de sol aqparatty taratatyn är eldıŋ özınıŋ müddesı bolady. Sondyqtan özımızdıŋ közqarasymyz bolsyn dep osy eŋbektı jazyp bıtırdım. Özım on bes jyldai arab älemı baǧytynda jūmys ıstedım, 7-8 jyldai arab memleketterınde qyzmette boldym, sol täjıribenı qaǧaz betıne tüsırdım» deidı Rasul Jūmaly.
Tanystyrylymda kıtap avtory eŋbekke qyzyǧuşylyq tanytqandardyŋ sūraqtaryna jauap berıp, monografiianyŋ mazmūnyn aşty.
Amanǧali QALJANOV
