Prezident Qasym-Jomart Toqaev TMD memleketterı basşylary keŋesınıŋ otyrysyna qatysty.
Memleket basşysy Qasym-Jomart Toqaev Belarus Prezidentınıŋ töraǧalyǧymen beinebailanys formatynda ötken TMD memleketterı basşylary keŋesınıŋ otyrysyna qatysty. Jiynǧa Äzerbaijan, Armeniia, Qyrǧyzstan, Resei, Täjıkstan, Türıkmenstan jäne Özbekstan elderınıŋ basşylary, sondai-aq Moldovanyŋ Premer-ministrı men TMD Atqaru komitetınıŋ töraǧasy – atqaruşy hatşysy Sergei Lebedev qatysty.
Prezident osydan 30 jyl būryn Qazaqstannyŋ Tūŋǧyş Prezidentı Nūrsūltan Äbışūly Nazarbaevtyŋ bastamasymen Almatyda ötken memleketter basşylarynyŋ kezdesuınde TMD qūru turaly tarihi Deklarasiia qabyldanǧanyn eske saldy.
– Osy asa maŋyzdy qūjat jaŋa täuelsız memleketterdıŋ köpjaqty yntymaqtastyǧynyŋ berık negızın qalady. Bügınde Dostastyqty keŋestık kezeŋnen keiıngı keŋıstıkte ırı apattardyŋ aldyn aluda, halyqtar arasyndaǧy yqpaldastyqty saqtauda maŋyzdy röl atqardy dep zor senımmen aituǧa bolady. TMD bedeldı halyqaralyq ūiymǧa ainaldy. Būl – asa maŋyzdy, – dedı Qasym-Jomart Toqaev.
Prezident ortaq küş-jıgerdıŋ arqasynda TMD aumaǧynda kooperasiianyŋ naqty mehanizmderı jasalǧanyn, salmaqty normativtık-qūqyqtyq baza qalyptasqanyn, belsendı saiasi dialog damyp, qauıpsızdık salasyndaǧy memleketaralyq yqpaldastyqtyŋ nyǧaia tüskenın, sondai-aq sauda-ekonomikalyq bailanystardy keŋeitu üşın oŋtaily jaǧdai jasalyp jatqanyn aitty.
Qazaqstan Prezidentı bügıngı kezdesude būǧan deiın atqarǧan jūmystar qorytyndylanyp, TMD elderınıŋ köpjaqty yntymaqtastyǧynyŋ jaŋa kezeŋıne jol aşylatynyn jetkızdı.
Sonymen qatar Prezident geosaiasi qaişylyqtardyŋ küşeiıp kele jatqanyna, älemdık ekonomikanyŋ qūbylmaly boluyna, gumanitarlyq jäne ekologiialyq problemalarǧa jäne pandemiianyŋ orasan zor şyǧyn keltırgenıne nazar audardy. Qasym-Jomart Toqaev osy syn-qaterlerdı joiyp, odan ärı damudy qamtamasyz etu üşın küş jūmyldyruǧa şaqyryp, bırqatar naqty şaralardy ūsyndy.
Memleket basşysy sauda-ekonomikalyq yntymaqtastyqty jandandyryp, nyǧaitudyŋ maŋyzdylyǧyn basty mındet retınde atady. Sonyŋ ışınde Prezident TMD elderı arasyndaǧy önerkäsıptık kooperasiiany keŋeituge basa män bere otyryp, ekonomikalyq yqpaldastyqtyŋ ädısterın jetıldıru qajet ekenın mälımdedı. Osyǧan bailanysty Önerkäsıptık keşenderdı damytudyŋ kemınde 2025 jylǧa deiıngı jaŋa baǧdarlamasyn äzırleudı jäne Körsetıletın qyzmetter saudasy turaly kelısımge qol qoiudy ūsyndy.
Sonymen qatar Prezident ortaq agrarlyq naryqty qalyptastyrudy özektı dep sanaidy. Onyŋ aituynşa, TMD memleketterınıŋ azyq-tülık jüiesın damytu jäne özara ıs-qimyl jasau strategiiasynyŋ äzırlenuı ortaq müddelerımızge sai keledı.
Qasym-Jomart Toqaev pandemiianyŋ saldaryn eŋserudıŋ maŋyzdylyǧyna toqtaldy.
Odan bölek, Qasym-Jomart Toqaev Qazaqstannyŋ QazVac vaksinasynyŋ joǧary tiımdılıgı men QazcoVac-P jaŋa preparatynyŋ äzırlenuı turaly aityp, onyŋ klinikalyq synaǧy tabysty ötkenıne, taǧy da üş vaksina klinikalyq deŋgeige deiıngı testıleu satysynda tūrǧanyna nazar audardy.
Būl rette, Prezident tyǧyz yntymaqtastyq ornatuǧa, täjıribe almasuǧa jäne qazaqstandyq vaksinalardy jetkızu mümkındıgıne toqtalyp, TMD keŋıstıgınde vaksinasiia pasporttaryn özara moiyndau üderısın tezdetudı ūsyndy.
Memleket basşysy terrorizmnıŋ, dıni ekstremizm men esırtkı saudasynyŋ küşeie bastaǧan syn-qaterlerıne qarsy bırlesıp küresuge män bere otyryp, qauıpsızdık salasyndaǧy TMD elderı yntymaqtastyǧynyŋ tetıkterın jetıldıru mäselesın maŋyzdy mındettıŋ bırı retınde atady. Prezident Auǧanstandaǧy qalyptasqan jaǧdaiǧa bailanysty atalǧan syn-qaterlerdıŋ basty mäselege ainalǧanyn jetkızdı.
