Būrnaǧy künı «Aljir» memorialdy mūrajai keşenınde «Tıl taǧdyry – ūlt taǧdyry» atty döŋgelek üstel otyrysy öttı. Qazaqstan halqy tılderınıŋ XIV festivalı aiasynda ūiymdastyrylǧan şaraǧa elordalyq ziialy qauym ökılderı qatysty.
Basqosu aldynda qatysuşylar ondaǧy «Qasıret» qaqpasyna taǧzym etıp, «Zerde» qabyrǧasyna gül şoqtaryn qoidy, qūran baǧyştady. Mūrajai direktory Bolat Jünısbekov köpşılıktı şetel elşılıkterınıŋ lagerde jazyqsyz jazasyn ötegen äielderge arnap qoiǧan eskertkışterımen, «Küres pen ümıt», «Tüŋılu men älsızdık» skulpturalyq beinelermen, «Köz jasy» stellasymen jäne keşen ışımen tanystyrdy. Jiynǧa qatysuşylar mūrajaidaǧy jädıgerlerdı tamaşalap, «37 jyly solǧan gülder» beinebaiany men «Aljirdıŋ» yzǧarly suyǧy» atty derektı filmdı körıp, oŋ yqylas tanytty.
Ana tılımızdıŋ bügıngı hal-ahualyn baiyptap, qoldanys aiasyn keŋeitudı maqsat etken basqosudy Astana qalasy tılderdı damytu basqarmasynyŋ bastyǧy Erbol Tıleşov aşty. Basqarma bastyǧy döŋgelek üstel otyrysyna qatysuşylardan naqty ūsynystar kütetının de jetkızdı.
Jiynda ädebiettanuşy Sabyrjan Şükır söilep, aǧylşyn tılınıŋ auqymy tym keŋeiuıne alaŋdaitynyn aitty. «Ana tılımızge «şabuyl» köbeidı. Ūlt tılın saqtau üşın qazaqqa bırlık kerek. Atqarylyp jatqan şarualarǧa da qoldau qajet. Soŋǧy kezderı qandastarymyzdyŋ arasynda özge dınnıŋ jetegınde ketkender jeterlık. Dınımız bölınse, dılımız bölınedı. Dılımız bölıngen soŋ, tılımız de ajyraidy. Sondyqtan, qazaq tılıne sapa kerek. Ūlt sanyn eseleu de sapany jaqsartady» dedı S.Şükır. Basqosuda diplomat, professor Sailau Batyrşa, jazuşy Tabyl Qūliias, basqa da tıl janaşyrlary oilaryn ortaǧa salyp, pıkırlerımen bölıstı.
*Sübelı söz
Erbol TILEŞOV, Astana qalasy, tılderdı damytu basqarmasynyŋ bastyǧy:
«Töl tılımızdıŋ jai-küiıne qatysty aitylyp jürgen äŋgımeler jeterlık. Mäselen, «Zerde» tılderdı damytu ortalyǧynda qazaq tılın üirenudı tegın oqityn memlekettık qyzmetkerlerdıŋ sabaqqa qatysuy 47 paiyzdy ǧana qūraidy. Alaida, bilık tarapynan atqarylyp jatqan jūmystardy da joqqa şyǧara almaimyz. Astana qalasynda qazaq tıldı mektepterdıŋ sany artyp keledı. Aralas oqytatyn bılım oşaqtarynda da öz tılımızdıŋ orny bölek»
Ashat ÄMZEBEKŪLY
