Keşe Astanadaǧy «Ana men bala ūlttyq ǧylymi ortalyǧynda» Qazaqstan halqy Assambleiasynyŋ qory «Şyn jürekten» qaiyrymdylyq telemarafony men el täuelsızdıgınıŋ 25 jyldyǧyna arnalǧan ıs-şaralar aiasynda «Baiqa jolda, balaqai!» atty teatrlandyrylǧan körınıs qoidy.
Qoiylym barysynda qaharmandardyŋ basynan ötken qyzyqty hikaialar jetkınşekterge jol erejesı turaly paidaly maǧlūmattar berdı. Arasynda än men bige de uaqyt tabylyp, kışkentailar bır serpılıp qaldy.
Atalmyş ortalyqtyŋ direktory Bekpai Hairulinnıŋ aituynşa, mūndai tanymdyq oiyn-sauyq nauqas balalardyŋ köŋılın köterıp, artyq uaiym-mūŋnan aryltady ärı psihologiialyq tūrǧydan da tiımdı eken.
– Auruhanada onkologiialyq syrqatqa şaldyqqan 100-ge juyq säbi emdelude. Olardyŋ tezırek jazylyp, aiaqtarynan tūryp ketuı üşın qoldan kelgen kömektıŋ bärın jasap jatyrmyz. Osy rette Qazaqstan halqy Assambleiasynyŋ qory bızden eşqaşan järdemın aiaǧan emes. Jylyna bırneşe ret soǧyp, baldyrǧandardy köl-kösır şattyqqa keneltıp ketedı. Odan bölek, därı-därmektermen jäne zamanaui qūrylǧylarmen qamtamasyz etıp otyrady, – dedı mekeme basşysy aǧynan aqtarylyp.
Qazaqstan halqy Assambleiasy qory jaqynda ǧana 16 jastaǧy Iŋkär Jaqyp esımdı jasöspırım qyzdyŋ süiek kemıgın auystyru üşın Reseiden donor tauyp, operasiiaǧa qajettı qarjyny tügeldei audarypty. Endı qor qyzmetkerlerı sol otanyŋ nätijesın asyǧa kütıp jür.
– Balanyŋ baqytynan asqan ne bar ömırde?! Taiauda osyndaǧy palatalarǧa Japoniiadan arnaiy tapsyryspen äkelıngen antibakteriialyq perde ıldık. Ondai jabdyq Qazaqstan boiynşa älı eş jerde ornatylmaǧan. Jaŋa tehnologiianyŋ küşımen jūmys ısteitın qūral immunitetı älsız büldırşınderge qolaily, – dedı Qazaqstan halqy Assambleiasy qory direktorynyŋ orynbasary Talǧat Balpyşev.
Botagöz MARATQYZY
