Jarqyraşy, Jūldyz!
El namysyn qorǧaityn saŋlaqtar qataryndaǧy elordalyq sportşylarǧa da artyp otyrǧan ümıtımız zor. Solardyŋ bırı – äielder küresınen synǧa tüsetın Jūldyz Eşimova.
Bügıngı taŋda Qazaqstannyŋ eŋbek sıŋırgen sport şeberı atanyp jürgen Jūldyz Eşimova boz kılemge jetı jasynda kelgen. Tabiǧatynan elgezek bolyp tuǧan qarşadai qyz küres mektebın Qyrǧyz elınıŋ Talas eldımekenınde bastaǧan. Bıraq onda balalar jarystarynda ǧana közge tüsıp ülgerdı.
Jūldyzdyŋ baǧyn aşqan Litvada ötken jasöspırımder arasyndaǧy halyqaralyq turnir boldy. Osy jarysqa Qazaqstan komandasyn aparǧan täjıribelı bapker Sarjan Jaqsybekov boz kılemde būlqynǧan Jūldyzǧa erekşe nazar audarady.Äŋgımege tartady. Äkesı qazaq, anasy qyrǧyz daryndy qyz bızdıŋ bapkerdıŋ aǧalyq ūsynys-tılegın quana-quana qabyldaidy. Sodan berı Qazaqstan tuy astynda kürese bastaidy. Bılıktı bapker jap-jas qyzdyŋ boiyndaǧy talantty tanyǧany sondai, tuǧan qaryndasyndai qamqorlyǧyna alyp, maqsatty jattyǧularǧa kırısedı.
Ümıt pen senım köp küttırgen joq. Jūldyz Eşimova jastar arasynda Qazaqstannyŋ chempiony ataǧyn jeŋıp aldy. Aziia bırınşılıgınde de jüldegerler qatarynan körındı. Araǧa jyl salyp eresekter jarysyna da kırısıp kettı. 2010 jyly Jūldyz kışı älem chempionatyna balanatyn İvan Iаrygin atyndaǧy Gran-Pri turnirıne qatysyp, ekınşı orynǧa ie boldy. Aziia bırınşılıgınde de osyndai jetıstıkke jettı.48 kelı salmaqta taǧy da aldyna jan salmady. Qūrlyq chempionatynda kümıs medal aldy.
2004 jylǧy Afiny olimpiadasynan bastap äielder küresınen saiystar ötkızıle bastady. Sodan berı Jūldyz ben onyŋ bapkerı Sarjan Jaqsybekov Olimpiada oiyndaryna qatysu maqsatynda ter töktı. Ol üşın aldymen 2011 jyly Türkiiada ötetın älem chempionatynda sättı öner körsetu kerek bolatyn. Bapker men şäkırttıŋ maqsatty daiyndyǧy eş ketpedı. Ümıt aqtaldy. Jūldyz Eşimova älem chempionatynyŋ qola jüldesıne qol jetkızdı. Būl astanalyq baluan qyzdyŋ London oiyndaryna lisenziia ūtyp alǧan baqytty jarysy boldy.
– Men ömırımdegı eŋ ülken maqsatyma jettım. Olimpiada oiyndaryna qatysatyn boldym. Al endı osy jarysta Qazaqstannyŋ tuyn biıkten jelbıretsem, iaǧni jüldeger atanyp kelsem, būl menıŋ ömırımdegı eŋ baqytty sät bolar edı. Men sol üşın bar küşımdı jūmsaityn bolamyn, – deidı boz kılemnen baqytyn ızdegen Jūldyz qaryndas.
Ǧalym QOJABEKOV