Nūr-Sūltan qalasynda jüzege asyrylyp jatqan «Elorda jastary» baǧdarlamasy aiasynda astanalyq jastardyŋ jūmyspen qamtyluyna, qoljetımdı ärı sapaly bılım aluyna, tūrǧyn üimen qamtamasyz etıluıne jäne basqa da baǧyttar boiynşa jan-jaqty qoldau körsetu jönınen naqtyly şaralar atqarylyp otyr. Keşe Nūr-Sūltan qalasy äkımdıgınıŋ janyndaǧy jastar ısı jönındegı keŋes müşelerı jäne jastar köşbasşylarynyŋ qatysuymen «Törtınşı onjyldyqtaǧy täuelsız Qazaqstan» taqyrybynda ötken jiynda elordalyq jastardyŋ tynys-tırşılıgı aityldy.
Elorda äkımınıŋ orynbasary Ashat Oralov keŋestıŋ negızgı mındetterıne toqtaldy. «Keŋestıŋ atqaratyn jūmysy – memlekettık jastar saiasatyn jetıldıru jönınde ūsynymdar äzırleu, memlekettık jastar saiasatynyŋ mındetterın ıske asyru tiımdılıgın taldau, memlekettık jastar saiasatynyŋ basym baǧyttaryn ıske asyru boiynşa ūsynystar äzırleu, memlekettık jastar saiasatyn ıske asyruǧa qatysty mäselelerdı talqylau» dedı ol.
Bügınde atalmyş baǧdarlama 6 baǧyt boiynşa ıske asyryluda. Qoljetımdı ärı sapaly bılım, jūmysqa ornalasu, densaulyq saqtau, būqaralyq sportty damytu, tūrǧyn üimen qamtu, jetım jäne ata-ana qamqorlyǧynsyz qalǧan balalardy qoldau baǧyttary boiynşa qazırdıŋ özınde bıraz jūmys atqarylǧan. Būl turaly Nūr-Sūltan qalasy Jastar saiasaty mäselelerı basqarmasynyŋ basşysy Qairat Qambarov mälımdedı.
– Jas mamandarǧa jeŋıldıkpen üi aluǧa mümkındık beretın «Elorda jastary» jäne «Jaldamaly baspana» baǧdarlamalary keler jyly da jalǧasyn tabady. Aula klubtarynyŋ jūmysyn damytamyz. Aldaǧy ekı jylda taǧy 20 aula kluby aşylady. Odan bölek, sport mektepterıne baratyn balalardyŋ sanyn ekı ese, al jattyqtyruşylardyŋ sanyn 50 paiyzǧa arttyramyz, – dedı basqarma basşysy Nūr-Sūltan qalasy äkımdıgınıŋ janyndaǧy jastar ısı jönındegı keŋeste söilegen sözınde.
Sondai-aq vedomstvo basşysy volonterlıkpen ainalysatyn jastar mäselesıne de toqtaldy. «Qazırgı taŋda «Astana jastary» ortalyǧy janynda erıktılerdıŋ qalalyq ştaby jūmys ısteidı, ol 2021-2023 jyldary volonterlıktı damytuǧa arnalǧan jol kartasyn ıske asyruda. Ştab jūmysyna 15-ten asa volonterlık ūiym, 20 bastamaşyl top, 8 ükımettık emes ūiym, 5 mesenat, 2 myŋnan asa tūraqty volonter qatysady. Olar «BizBirgemiz», «Qauıpsız qala», «Adresa zaboty», «Ardagerlerdı ardaqtaiyq», «Taza Alem» aksiialary aiasynda 530 ıs-şara ūiymdastyrdy» dedı ol.
Q.Qambarovtyŋ aituynşa, biyl mausymda elordadaǧy Saryarqa audanynda jastarǧa qyzmet körsetu ortalyǧy aşylǧan. Bügınge deiın atalǧan mekeme 750-den astam konsultasiialyq kömek bergen. Erteŋ taǧy üş audanda, atap aitsaq, Sätpaev, 13 mekenjaiyndaǧy «Alcato» biznes ortalyǧynda, «Big Şanhai» bazarynda jäne «Bazar» sauda üiınde jastarǧa qyzmet körsetu ortalyǧy öz jūmysyn bastaidy. Jiyn barysynda elordalyq jastardyŋ belsendı ökılderı de söz alyp, atqaryp jatqan jūmystarymen bölıstı. Solardyŋ bırı – «Köbelek balalar» qaiyrymdylyq qorynyŋ direktory Sūltan Allabergenov.
– «Köbelek balalar» dep otyrǧanymyz – terısı öte jūqa, jazylmaityn dertke şaldyqqan balalar. Būl – genetikalyq auru, ony jazatyn eşqandai därı-därmek joq. Kütım ǧana kerek. Bügınde mūndai aurudan 105 adam zardap şegetın bolsa, sonyŋ 80-ı – balalar. Olar kündelıktı kütımnıŋ özıne qatty qinalady. Mysaly, jai ǧana binttı orau prosesı 2 saǧatqa sozyluy mümkın. Bızdıŋ qor osy prosesterdı standarttap, sol kütımdı jeŋıldetudıŋ joldaryn qarastyrady. «Köbelek balalarǧa» arnap arnaiy bint aldyrdyq, öitkenı qarapaiym bint olardyŋ terısın jyrtyp ketuı mümkın. Sol sekıldı olarǧa arnalǧan arnaiy tamaq türlerı de bar. Osyndai dünielerdı qoljetımdı etumen ainalysamyz. Būiyrsa, 9 jeltoqsan künı bız alǧaşqy pasienttı Sankt-Peterburgke em-dom alyp, sauyqtyruǧa jıbergelı jatyrmyz, – deidı ol. Aita keteiık, elorda äkımdıgı janyndaǧy jastar ısı jönındegı keŋestıŋ qūramyna 44 adam kıredı. Onyŋ 13-ı – memlekettık qyzmetkerler, 15-ı – jastar jäne qoǧamdyq ūiym ökılderı, 16-sy – elordalyq joǧary oqu oryndarynyŋ ökılderı.
