Qoǧamdyq kölık tızgındeu – halyqpen ünemı bailanysta boludy talap etetın jauapty jūmys. Aramyzda jauapty qyzmettı abyroimen atqaryp, baqytyn osy ısten tapqan jandar az emes. Solardyŋ bırı – elordanyŋ №1 avtobus parkınıŋ jürgızuşısı Didar Moldabaev. On ekı jyl ışınde ol Astanadaǧy qoǧamdyq kölıktıŋ bırtalaiyn basqardy.
Avtobus artynan janūşyra jügıretınderdı sabyrmen kütıp, eşkımnıŋ köŋılın qaldyrmai bärın mıngestırıp aluǧa daiyn Didar Moldabaev bügınde №22 baǧdardaǧy avtobusty jürgızedı. 37 jastaǧy keiıpkerımızdıŋ būl salaǧa keluı de qyzyq. Taraz qalasynyŋ tumasy elordaǧa köşpes būryn jerles dosymen bırge jergılıktı avtoparkte qyzmet etıp jürdı. Alǧaşqyda konduktor bolyp bastaǧan. Keiın dosynyŋ ūsynysymen 2013 jyldyŋ nauryzynda at basyn Astanaǧa būryp, bırge täjıribelık synaqtardan ötıp, №1 avtobus parkınıŋ qataryna qabyldanady.
«Qoǧamdyq kölıktı tızgındeuıme otbasym da sebepşı» dep bastady äŋgımesın keiıpkerımız. Sebebı äkesı ūzaq jyldar boiy jürgızuşı bolǧan. Onyŋ üstıne tuǧan aǧalary da osy salany taŋdaǧan eken. Özınen jasy ülken Maqsat pen Medet Moldabaevtar da – elordalyq avtobus jürgızuşılerı. Bırı №73 baǧdardy jürgızse, ekınşısı №61 marşrutty tızgındeidı. Äke men aǧa jolyn quǧan Didar Moldabaev üşın özı ülken, ışı keŋ qoǧamdyq kölıktıŋ rölınde otyru ömırlık maqsatyna ainalady. Jūmysqa endı kırısken 25 jasar jas jıgıt äuelı 1998 jylǧy avtobustyŋ bırın tızgındedı. Arada jyldar ötıp, käsıbilıgın körsete bılgennen keiın 2015 jyldyŋ jeltoqsanynda Iveco Citelis markaly avtobusqa auysyp, №9, 23, 10 marşruttyŋ tızgınınde otyrady. Täjıribesı mol jürgızuşı bügınde Yutong avtobusyn jürgızedı. Osydan on ekı jyl būryn jūmysqa ornalasqan ol älı künge deiın avtobus kabinasynan ajyraǧan emes.
Jūmys kestesı tyǧyz. Taŋǧy altyda avtoparkke jetıp, dispetcherden joldamasyn alady, medisinalyq tekseruden ötıp baryp, grafik boiynşa jūmysqa kırısedı. Eŋ alǧaşqy reiske alty jarymda şyǧyp, keşkı onǧa deiın jūmys ısteidı. №22 avtobusqa kün saiyn jüzdegen adam otyrady. Ekipajda osynşama ömır iesın tasymaldaǧan soŋ, jürgızuşı moinyndaǧy jauapkerşılık orasan. Didar Moldabaev är jolauşyny A-nüktesınen B-nüktesıne deiın aman-esen jetkızu basty mındetım deidı. Basqa salalarda özın synap körgen ol «osy qyzmetım janyma jaqyn» deidı.
«Qai qalanyŋ qoǧamdyq kölıgın tızgındeimın deseŋ, bırınşıden, sol qalany jetık bıluıŋ qajet. Astana sekıldı megapolisterde qanşama jolauşy bar. Halyqpen ünemı bailanysta bolǧannan keiın türlı adamdar kezıgedı. Bırı raqmet aityp, sättı kün tılese, endı bırı şu şyǧaryp, sözge keluge daiyn-aq tūrady. Mūndaida bastysy, sabyrlyq tanytu kerek. Kez kelgenge qabaq şytpai, külıp qarasaŋ, künıŋ de däl solai ötedı.
Men jüretın marşrutta aita ketetını – jol mäselesı bar. Jaŋa avtobuspen künıne bırneşe märte şūŋqyr jerlerden ötuge ärine, janyŋ aşidy. 1,5 million asa tūrǧyny bar qalada jolaqysyn tölemeitın adamdar sany da azaimai keledı. Elektrondy tölem jüiesın kımder ötkızgenın ekran arqyly körıp, eseptep, şamamen qanşasynyŋ tölegenın bılıp otyramyn. Mäselen, taŋǧy keptelıs uaqytynda qyryq adam kırdı desek, sonyŋ 7-8-ı ǧana tölep jatady. Kölıkke asyǧa mıngen jolauşylardyŋ töleuge asyqpaityny ras.
Köşede özge kölık jürgızuşılerı
tarapynan mädenietsız asa baiqalmaidy, sūranǧanda ötkızıp jıberetınder köp, onyŋ üstıne qazır Bus-lane jolaǧy da öte tiımdı. Dese de, asyǧyp-aptyǧatyn jürgızuşıler bolady. Mūndaida men jolymdy kesıp aldyma şyǧyp alatyndardy ötkıze beremın. Solardy jönıne jıberıp, 30 sekund joǧaltqanym apatty jaǧdai tudyrǧannan äldeqaida jaqsy» deidı ol.
Ömırlık jolyn jolauşy tasymalymen bailanystyrǧan Didar Moldabaev – ekı ūl, ekı qyz tärbielep otyrǧan köpbalaly äke. Kez kelgen salany alǧa jyljytatyn jastar bolsa, keiıpkerımız avtobus jürgızuşısı bolamyn deitın jastar öte sirek kezdesetının aityp qaldy. Bolaşaq mamandardy osy salaǧa tartyp, süiıktı ısın bılıktı jas buynǧa tapsyru – endıgı armany.
