«Qazaq elı» monumentı aldyndaǧy alaŋda Astana qalasynyŋ äkımı Ädılbek Jaqsybekov Ūlttyq bıryŋǧai testıleuden sürınbei ötıp, öz bılımderın däleldegen elorda mektepterınıŋ biylǧy 112 tülegıne «Altyn belgı» tabystady. Saltanatty şaraǧa QR Parlamentı men qalalyq mäslihat deputattary, qala basşylyǧy, Bılım jäne ǧylym ministrlıgınıŋ ökılderı qatysty.
– Memleket basşysy Nūrsūltan Nazarbaevtyŋ erekşe nazarynyŋ arqasynda jas ūrpaqqa sapaly bılım, sanaly tärbie beru üşın barlyq jaǧdai jasalyp jatyr. Elımızdıŋ bolaşaǧy sızderdıŋ qoldaryŋyzda. Keleşekte memleketımızdı jäne Astanamyzdy odan körkeitu ısıne öz ülesterıŋızdı qosasyzdar dep senemın, – dedı Ä.Jaqsybekov.
Elorda mektepterındegı bılım beru deŋgeiı jyldan jylǧa artyp keledı. Bügıngı taŋda Astana bılım sapasy jaǧynan özge öŋırlerden oq boiy ozyp, bırınşı orynǧa şyqty. Būǧan 2011-2020 jyldarǧa arnalǧan QR bılım salasyn damytudyŋ memlekettık baǧdarlamasynyŋ bas qalada tabysty jüzege asyrylyp jatqandyǧy sep boluda. Jaqynda ǧana bekıtılgen QR Bılım jäne ǧylym ministrlıgı men Astana qalasynyŋ äkımdıgı arasyndaǧy 2015-2017 jyldarǧa arnalǧan memorandum elordadaǧy bılım beru ısın jaŋa sapalyq deŋgeige şyǧaryp otyr. Tülekterdı qūttyqtai kele, qala basşysy atalmyş salada jäne aldaǧy uaqytta qolǧa alynatyn jūmystar jaiynan habar berdı.
Onyŋ aituynşa, elordadaǧy bılım salasynyŋ infraqūrylymdyq damu jaǧdaiyna barynşa köŋıl bölınude. Astananyŋ on jetı jyldyq tarihy ışınde 44 mektep boi köterdı. Biyl taǧy 5075 orynǧa şaqtalǧan jalpy bılım beretın bes mektep pen 1050 oryndyq qosymşa ǧimarat salynbaq.
Byltyr elordadaǧy «Altyn belgı» iegerlerınıŋ sany 94 bolsa, biyl osy körsetkış 112-ge deiın arta tüsken. Ūlttyq bıryŋǧai testıleudıŋ qorytyndysy boiynşa Astana qalasy ortaşa eseppen 86,26 ball körsetkışın baǧyndyryp, biyl tūŋǧyş ret bırınşı orynǧa şyqty. Osynyŋ özı Astanadaǧy bılım sapasynyŋ ösuı turaly äŋgımenıŋ jalaŋ söz emes ekenın däleldeidı. Būǧan qosa, biyl 35 tülek üzdık attestat iegerı atandy. 399 oquşy halyqaralyq olimpiadalar men ǧylymi jarystarǧa qatysyp, 238-ı türlı medaldermen marapattaldy.
Osyndai mälımetterdı keltırgen qala äkımı elordada elımızdegı aldyŋǧy qatarly joǧary oqu oryndary ornalasqandyǧyn, olarda studentterge zamanaui talaptarǧa sai bılım beretın jetekşı otandyq pedagogtar jūmys ısteitındıgın aita kele, memleketımızde balamasy joq Nazarbaev universitetın mysal retınde alǧa tartty.
Sän-saltanaty jarasqan şarada ülken ömırge qadam basqan tülekter de aianyp qalmady. Olardyŋ arasynda Ūlttyq bıryŋǧai testıleu qorytyndysynda eŋ joǧary 125 ball jinaǧan №59 orta mektebınıŋ tülegı Riana Mūstafina şarşy toptan suyrylyp şyǧyp, söz söiledı.
– Elbasy öz Joldauynda «Qazaqstannyŋ bolaşaǧy – jastardyŋ qolynda» dep, bızge ülken senımın artyp otyr. Qazaqstannyŋ örkendep damuy, aldyŋǧy qatarly otyz memlekettıŋ qatarynan körınu üşın aianbai eŋbek etemız. Elordamyz – bırlık pen yntymaqtyŋ, täuelsızdık pen erkındıktıŋ simvoly bolyp, taŋymyzdy – araiǧa, künımızdı – igılıkke böleitın qalaǧa ainalyp, körkeie bersın! Bızdıŋ jetıstıgımız – Astananyŋ jetıstıgı. Bız Otanymyz ben süiıktı qalamyzdyŋ aldynda, ūstazdarymyz ben ata-analarymyz aldynda ülken jauapkerşılık alyp, jaŋa ömırge qadam basqaly otyrmyz. Bolaşaqta elımız ben Astanamyzdyŋ güldenuıne barynşa üles qosamyz, – dedı Riana jalyndy leppen.
Tülekterdı Olimpiada chempiony Iýrii Melnichenko, «Altyn belgı – 2014» iegerı, L.Gumilev atyndaǧy Euraziia ūlttyq universitetınıŋ halyqaralyq qatynastar fakultetınıŋ studentı Nazgül Esen qūttyqtap, aq jol tıledı. QR halyq ärtısı Nūrjamal Üsenbaeva, aǧaiyndy Jügınısovter ännen şaşu şaşty. Aspanǧa armandar oryndaluynyŋ belgısındei kök jäne qyzyl şarlar ūşyryldy. «Altyn belgınıŋ» iegerlerı dästürlı mektep valsı sazymen samal jelpıgen güldei yrǧalyp, jaiqala biledı…
