6 сәуір күні Ақордада Нұрсұлтан Назарбаевтың Жарлығымен бірнеше әскери адамға өз қызметтеріне адалдығы үшін және әскери борышын атқару кезінде батылдық танытқаны үшін мемлекеттік наградалар тағайындалып, Елбасы оларды өз қолымен марапаттады.
Отан қорғаушылар күніне орайластырылған шарада сөз сөйлеген Президент: «Сіздер тек өз қызметтеріңізді ғана емес, азаматтық борыштарыңызды да абыроймен атқардыңыздар, жастарға үлгі болдыңыздар. Сіздердің істеріңіз – өз халқын сүюдің және оған адал болудың үздік үлгісі» деп, әскерилерге үлкен сенім білдірді.
Жалпы Қорғаныс, Ішкі істер және Төтенше жағдайлар жөніндегі министрліктер, Ұлттық қауіпсіздік комитеті, Мемлекеттік күзет қызметі, «Сырбар» сыртқы барлау қызметі, Экономикалық қылмысқа және сыбайлас жемқорлыққа қарсы күрес агенттігі (қаржы полициясы), Бас прокуратура және Қазақстанның ішкі істер органдары мен ішкі әскерлері ардагерлерінің ұйымының атынан барлығы 60 адам наградаға ұсынылған болатын. Солардың ішінде ІІ дәрежелі «Даңқ» орденімен М.Ахметжанов, Б.Бердалин, А.Джумакеев, М.Исәділов, М.Ысқақов және Н.Орманбетов марапатталса, ІІ дәрежелі «Айбын» орденіне Р.Жамбылова, С.Климчук, А.Мұқатаев, Е.Смағұловтар лайық деп танылды.
Ал, ІІІ дәрежелі «Айбын» орденін Ж.Баянбаев, Б.Мойнов, Ю.Новосельцев, Ғ.Тойшыбаевтар иеленді. «Ерлігі үшін» медалімен О.Баукен, М.Дүйсенбаев, Е.Нұрғалиев, «Жауынгерлік ерлігі үшін» медалімен А.Асанбай, Д.Гроц, Ю.Евдокимов секілді азаматтар наградталды.
Нұрислам Құспанғали
