Көрнекті мемлекет және қоғам қайраткері, елордалық Қоғамдық кеңестің төрағасы Сансызбай Есіловті 70 жасқа толған мерейтойымен әріптестері, мемлекет және қоғам қайраткерлері құттықтады.
Еліміздің Тұңғыш Президенті Н.Назарбаевтан, Мемлекет басшысы Қ.Тоқаевтан, Қазақстан Республикасы Парламенті Мәжілісінің төрағасы Н.Нығматулиннен құттықтаулар жазылған салтанатты жеделхаттар келіп түсті. Мерейтой иегерін Нұр-Сұлтан қаласының әкімі Алтай Көлгінов пен Нұр-Сұлтан қаласы мәслихатының хатшысы Ерлан Каналимов құттықтап, зор денсаулық, баянды бақыт тіледі.
Сансызбай Сейтжанұлы өз жұмысын электромонтер-теміржолшы мамандығынан бастаған болатын. Ұзақ уақыт елорда әкімдігінде қызмет етті, Мәжіліс депутаты болып сайланды. Ол заң шығару саласының дамуына орасан зор үлес қосты, «Нұр-Сұлтан қаласының құрметті азаматы» атанды.
