Наурыз көже таратылады
Елордада Наурыз мерекесіне орай 100-ден астам іс-шара өтеді. Қала тұрғындары концерттерге, көрмелерге, қойылымдарға, ұлттық спорт түрлері бойынша жарыстарға, серуенге және басқа да мерекелік бағдарламаларға қатыса алады.
22 наурызда сағат 11:00-ден 15:00-ге дейін барлық ауданда, соның ішінде елорданың елді мекендерінде «Наурыз Думан 2022» мәдени-бұқаралық іс-шаралар ұйымдастырылады. Бұл күні мерекенің басты белгісі – Наурыз көже ұлттық тағамы да жұртшылыққа таратылады.
Алматы ауданында мерекелік іс-шаралар «Қазақ елі» монументі алаңында, «Студенттер» саябағында, Байқоңыр ауданында – «Ататүрік» саябағында, Жазушылар аллеясында, Есіл ауданында – ЭКСПО аумағында және Үркер елді мекенінде, Сарыарқа ауданында – «Көктал» саябағында және Demalys Promenade алаңында өтеді.
Наурыз мейрамына орай қайырымдылық іс-шаралар да ұйымдастырылады. Атап айтқанда, 18-19 наурызда қалада әлеуметтік аз қамтылған, көпбалалы отбасыларға, жалғызбасты қарт адамдарға және халықтың әлеуметтік осал топтарының басқа да санаттарына азық-түлік себеттері таратылады.