Жаңа жыл жақындаған сайын елордалық полициялар заңсыз ағаш кесушілермен күресті күшейте түсуде. Астана аумағында биыл 31 желтоқсанға дейін қылқан жапырақты ағаштарды арнайы рұқсат қағазсыз кесу, тасымалдау, сатуды анықтауға арналған рейдтік шаралар жүргізіледі.
Табиғатты қорғау полициялары «Астана орманы» МКК, «Жасыл аймақ» РМК және қалалық ІІД Жергілікті полиция қызметінің өкілдерімен бірлесіп, әсіресе, Астананы айналдыра қолмен отырғызылған жасыл желекті ерекше қорғауға алды. Қаланың ішіндегі қылқан жапырақ тұқымдас жас талдар да бақылауда. Тиісті мамандар елорданың орталық базарлары мен сауда орталықтарында сатылып тұрған шыршалардың рұқсат қағаздары бар-жоғын да тексеріп шықты.
Жалпы, елімізде шыршалар еркiн сатылымға шығарылмайды. Саудаға жергілікті жасыл желекті сатуға тыйым салынған. Егер кімде-кім ағашты заңсыз отаса, жасыл желекке зиян келтірсе, ол адам әкімшілік жауапкершілік былай тұрсын, Қазақстан Республикасының Қылмыстық Кодекстің 340-бабы бойынша қылмыстық жауапкершілікке тартылады. Мемлекет табиғатты қорғау үшін осындай қатал жаза енгізді. Өйтпей ше? Кесілген бір ағаштың орнына он ағаш отырғызуға тура келеді. Оның сыртында бір жас шыбық жетіліп, жайқалып өсу үшін оған кемінде 15 жыл кетеді екен. Сондықтан әрбір адам айналаны шаң-тозаңнан қорғап, қалаға көрік беріп тұрған ағашқа аялай қарағаны дұрыс. Мамандардың айтуынша, бүгінде жаңажылдық мерекеге жұртшылықтың көбі жасанды шыршаны тіккенді құп көреді. Ал егер бір күндік сайранға бола табиғи шыршаны іздейтіндер Ресейден алдыртқаны жөн немесе ірі сауда орталықтарында арнайы рұқсат қағазбен сатылып жатқан осы елдің ағаштарын сатып алғаны дұрыс.
Қымбат Нұрғали
