«Құрлық әскерлерінің Бас қолбасшысы, генерал-лейтенант Мұрат Майкеев Қазақстан Президентіне әскердің шеруге дайындығы туралы баяндады. Мемлекет басшысы өз сөзінде әскери қызметшілерді, ардагерлер мен барша қазақстандықтарды Отан қорғаушылар күнімен құттықтап, Қазақстан армиясы далалық жерлерде жыл сайын жедел және әскери дайындық бойынша 250-ден астам іс-шара өткізетініне тоқталды» деп хабарлайды Президенттің баспасөз қызметі.
Қазақстан Қарулы күштерінің кәсіби машығын, үйлесімділігі мен мүмкіндіктерін, қолданыстағы қару-жарақтарын көрсетіп, шынайы ұрыс ойынын паш еткен парадқа 7 мың әскери, 400-ден астам әскери техника, 80 ұшақ және тікұшақ қатысты.
Құрлық әскерлері мен Әуе қорғаныс күштері зымырандар атудың, бомбалаудың, қару-жарақтың барлық түрімен қойын-қолтық соғысудың барлық түрлерін көрсетті. Әсіресе, жиналған жұрт «Жетісу» мен «Сұңқар» ұшқыштар тобы көрсеткен әуедегі қиян-кескі, қашты-қуды ұрыс салудың шеберлігіне тәнті болды.
Шартты жаттығуда көктен шүйліккен «жаудан» аспанымызды Әуе қорғанысы күштерінің әуе шабуылына қарсы «С-125» зениттік-зымырандық кешені қорғады. Зымырандық әскер мен артиллерияның үсті-үстіне шабуылы армиямыздың еш елден кем еместігіне тағы бір көз жеткізгендей болды. «Точка-У» тактикалық зымырандық кешені, «Град» және «Прима» дүркін отшашу зымырандық жүйесі, МСТА-Б және Д-30 зеңбіректері, «Солнцепек» ауыр отшашу зымырандық жүйесі, «Штурм-С» танкіге қарсы зымырандық кешені атқан оқ нысанаға дөп тиіп жатты. Бұл парадта, сондай-ақ, қатысушылар әскерилердің жаңартылған омунициясын да көрді. Парадқа қатысқан Қарулы күштер бөлімшелері, әскери оқу орындары, ІІМ ішкі әскерлері, ҰҚК Шекара қызметі, Төтенше жағдайлар министрлігі бөлімшелері, сондай-ақ, Республикалық Ұлан рәсім батальонының заманауи үлгідегі киімдерінің өзі әскердегі әлеуеттің жоғарылағанын аңғартты.
Сонымен қатар, Президент баспасөз қызметінің хабарлауынша, Нұрсұлтан Назарбаев Қорғаныс министрі Ә.Жақсыбековпен және Қарулы күштер генералитеті өкілдерімен бірге отандық кәсіпорындардағы жаңа және жаңғыртылған әскери техника үлгілерімен танысты. Қару-жарақ көрмесін «Қазақстан инжиниринг» Ұлттық компаниясы» АҚ құрамына кіретін Қазақстанның қорғаныс кәсіпорындары ұйымдастырыпты.
Елбасына әскери, азаматтық және қосарлы мақсаттағы арнаулы техникалар, соның ішінде штабтық, жауынгерлік, медициналық, іздестіру-құтқару машиналары, радиорелелік станса, қарлы-батпақты жерлерге арналған «Тұлпар» машинасы, Қазақстанда құрастырылатын Еурокоптер маркалы «ЕС-145» тікұшағы, ұшқышсыз ұшатын аппараттар мен қару-жарақ, техника мен киім-кешектің өзге де түрлері көрсетілді.
Үйдей экрандардан тамашалады
Әскери шеруді елордалық жұртшылық үлкендігі үйдей LED-экрандардан тамашалады.
Атап айтсақ, «Қазмедиаорталығының» қасбетіндегі мониторлар арқылы «Хабар», «Еларна» агенттіктері таратқан тікелей эфирді көруге 500-ден аса халық жиналды. Сонымен қатар, қаладағы «Ажар», «Мега-Астана», «Сарыарқа», «Керуен», «Хан шатыр», «Азия Парк» сауда, ойын-сауық орталықтарында, әуежайда, теміржол вокзалы мен «Сапаржай» автовокзалындағы үлкенді-кішілі экрандардан демалушы, жолаушы жұрттың шеруді көруіне жағдай жасалды.
Өз тілшімізден
