Елордамыз жайында әңгіме қозғалып кетсе, екінің бірі бұл қаланың масасы көп екенін айтпай қоймайды. Шынымен де, бас қаламыздың екі ерекшелігі болса, соның бірі – шыбын-шіркейі, сондай-ақ бораны мен аязы болса керек.
Бұл екеуі қаланың коммуналдық шаруашылықтары үшін ең жауапты жұмыстардың қатарынан саналады. Жылдағы қарбалас жұмыс. Дегенмен жылдан-жылға шыбын-шіркейді азайтуға бағытталған санитарлық шаралар күшейіп келеді. Соның бір айғағы, кешегі мереке күндерінде де қала бойынша масамен күрес жұмыстары тоқтаусыз жүргізілді.
Арнайы қызметтің мамандары маса-шіркейлерді екі есе қарқынды күшпен улау жұмыстарын жалғастыруда. Бүгінгі таңда 123 маман дезинсекциямен айналысуда. Әсіресе, қала тұрғындары мен қонақтарының ең жиі баратын жерлеріне ерекше назар аударылуда. Негізі, масаларды улау 6 кезеңге бөлінген. Қазір үшінші кезең аяқталып қалды.
Еске сала кетсек, елорда күнінде кешкі серуенге шыққан астаналықтар мен қала қонақтары маса-шіркейдің кесірінен әлекке түскенін әлеуметтік желілер арқылы шағымданып айтқан болатын. Содан бері қаладағы қансорғыш жәндіктерді жою жұмысы тоқтатылған емес. Қанатты қансорғыштардың шектен тыс көбейіп кетуіне ауа райы да әсер еткені сөзсіз. Аптап ыстықтан кейінгі жаңбырдан соң шыбын-шіркейдің қарасы да көбейіп шыға келді. Осындай жағдайға байланысты әр аудан бойынша дереу дезинфекциялық іс-шаралар өткізілді.
«Масалардың пайда болуы мен көбею мерзімі жеті күнге созылады, алайда ауа райының қолайсыздығына байланысты олардың жетілу мерзімі екі күнге дейін қысқарады. Сондықтан шыбын-шіркей күрт көбейіп кеткен» дейді қалалық Тауарлар мен қызметтердің сапасы мен қауіпсіздігін бақылау департаментінің басшысы Сәдуақас Байғабылов.
Шыбын-шіркейді жою мақсатында Есіл ауданы бойынша «Жетісу» және «Столичный» саябақтары, Есіл өзенінің жағалауындағы амфитеатр, Астаналық цирк, «Астана» концерт залы, «Хан Шатыр» СОО аумағы, «Үркер» тұрғын алабының №2 сектор учаскесі, «Үркер» тұрғын алабының №2 учаскесі, «Барыс-Арена» спорт кешені, «Астана Опера», «Астана Балет», ЭКСПО кешенінің жазғы сахнасы, «Happylon MEGA Silk Way» және «Happуlon Keruen» орындарында масадан тазарту шаралары жүргізілді. Оған 2 энтомолог, 26 дезинфектор, 3 термогенератор бригадасы, 3 автокөлік, 1 микроавтобус, 1 ДУ-1000 техникасы жұмылдырылды. Алматы ауданы бойынша Оңтүстік-Шығыс шағын ауданының оң және сол жағы тазаланды. Оған 3 бригада, 3 автокөлік, 3 биолог қатысты, олар тиісті жұмысты термогенераторлар, жел генераторы және роторлық бүріккіштер арқылы жүргізетін болады. Сарыарқа ауданы бойынша «Көктал-1» тұрғын алабының аумағы өңделді. Маса-шіркейге қарсы жұмысқа 2 термогенератор бригадасы, 3 автокөлік, 1 энтомолог және 1 ДУ-1000 техникасы жұмылдырылды. Егер маса-шіркей тағы да күрт көбейген жағдай болса, оларға қарсы шабуыл кез келген күні жүргізіле береді.
– Біз қаланың қақ ортасынан өтетін Ақбұлақ арнасына жақын тұрамыз. Күн жылынып кеткелі масаның көбейіп кеткені байқалады. Әсіресе, кешке қарай шыбын-шіркейден мазамыз кетіп жүрді. Дегенмен соңғы күндері ептеп азайғаны аңғарылды. Өйткені қолына аппарат ұстаған жұмысшылар күндіз де, түнде де дезинфекция жасап жүр, – дейді Абылай хан даңғылының тұрғыны Темірболат Молдияров.
Иә, шыбын-шіркейге қарсы шаралар үдеген сайын олардың қатары да сейіле бастайтыны сөзсіз. Бұл ретте дезинфекция шараларымен қатар, санитарлық тазалық жұмыстары да үздіксіз жүргізілуі керек.
