Тағылымды жұмыстар атқарылды
Жеделсөз
Елорданың мәдениет басқармасы биылға үлкен міндеттер белгіледі. Қалада саланы дамыту стратегиясы негізінде қызметтің үш бағыты айқындалды. Осы тұрғыда қаладағы мәдени мекемелердің жай-күйі, тыныс тіршілігі туралы Астана қаласы Мәдениет басқармасы басшысының кеңесшісі Кәмила Қоқымованы әңгімеге тартқан едік.
– Тарихи-мәдени мұраны сақтау мен насихаттау жайы қалай?
– Бүкіл адамзат тарихы дамуының ажырамайтын байланысы, өзара қатынасының нәтижесі болып табылатын материалдық мәдениет ескерткіштерін сақтауға бәріміз борыштымыз. Бұл бағытта 2011 жылдың 1 наурызында Астана қаласының әкімдігі Қаржы басқармасымен бірлесіп «Ескерткіштер мен мүсіндерді Астана қаласының коммуналдық меншігіне қабылдау туралы» қаулы қабылдады.
Қазір тарихи-мәдени мұра нысандарын сақтау мақсатында тарих және мәдениет ескерткіштеріне қорғау міндеттемелерін рәсімдеу жұмыстары толығымен аяқталды. Қала құрылысы және сәулет ескерткіштеріне қорғау міндеттемелерін қажет ететін 35 объект және 12 археологиялық ескерткішке қорғау міндеттемелері жаңа үлгіде бекітілді. Бұл шаралардың алдында Астана қаласының жергілікті маңызы бар тарих және мәдениет ескерткіштерінің мемлекеттік тізімін бекіту, ескерткіштердің қорғау аймақтары және құрылысты реттеу аймақтарының шекараларын бекіту, ескерткіштерге қорғау тақталарын орнату, тарихи-мәдени мұра жинағын баспадан шығару шаралары атқарылды. Нәтижесінде, Астананың 47 тарих және мәдениет ескерткіштері бес сатылы қорғауға ие болды. Биылғы жылы ескерткіш мәртебесіндегі «Жастар» сарайына (1974 ж.) жөндеу-реставрациялық жұмыстары, 2014 жылы XIX ғасырдың тарих және мәдениет ескерткіші болып табылатын «Жасыл мешітті» (1895 ж.) жөндеу-қалпына келтіру жұмыстары жоспарланған.
Сонымен қатар, Қазіргі заманғы өнер мұражайында 422 экскурсия, 557 көрме, С.Сейфуллин мұражайында 246 экскурсия, 14 көрме, «Атамекен» Қазақстан Картасы Этно-мемориалдық кешенінде 196 экскурсия, «АЛЖИР» мұражайында 373 экскурсия, 15 көрме ұйымдастырылды.
– Мәдениет және өнер саласында бәсекеге қабілеттілік туралы не айтасыз?
– Астана қаласының мәдениет және өнер саласының бәсекелестікке қабілеттілігінің тұрақты өсуін қамтамасыз ету мәдениет кәсіпорындарының театрлық-концерттік қызметін жақсартуға ықпал етеді. Музыкалық өнердің барлық жанрларын репертуарда сақтауға мүмкіндік тудыратын Мемлекеттік филармонияның жарнамасы жасалған. Осы негізде, I жартыжылдықта 196 концерттік шарамен, 30 гастрольдік концертпен, шетелдік 8 сапарға шығып, 1 004 712 көрермен қамтылды. Атап айтқанда, симфониялық оркестрдің – 13, үрмелі аспаптар оркестрінің – 8, «Солистер академиясының» – 5, «Сарыарқа» қазақ ұлттық аспаптар ансамблінің ұлттық вокал солистерінің 9 концерті өтті.
– Қала халқының мәдени өмірін байыту тұрғысында қандай жұмыстар атқарылды?
– Биылғы I жартыжылдықта қала мұражайларында 65 жаңа көрме ұйымдастырылып, 1237 экскурсия жүргізілді, 82 дәріс оқылды. Аталған іс-шараларға 65949 адам қатысты.
Астана қаласы әкімдігінің «Орталықтандырылған кітапханалар жүйесінде» 23 кітапхана бар. Оның 15-і – көпшілік, 6-уы – балалар кітапханасы.
Кiтапханалардың барлық оқу залдарында Қазақстан өмiрiндегi, елордадағы маңызды оқиғаларды айшықтайтын: «Қазақстан – 2050» Стратегиясы қалыптасқан мемлекеттің жаңа саяси бағыты»; «Тұлғалар мен құжаттар тарихы» көрмелері жұмыс iстейдi. Кiтапхана мамандары бұл бағдарламалық құжаттың негiзгi ережелерi бойынша оқырмандар арасында түсiндiрме жұмыстарын ұдайы жүргізіп келеді.
Сонымен бірге, мемлекет, қоғам қайраткерлері, жазушылар мен композиторлардың шығармаларымен таныстырылып, мерейтойлар мен айтулы даталарға арналған іс-шаралар өткізіледі.
Таңатар Төлеуғалиев