ТӘУЕЛСІЗДІККЕ ТАРТУ
Биыл – еліміз үшін мерейлі жыл. Азаттықтың ширек ғасыр тойы. Осы айтулы мерекеге байланысты мемлекеттік жетекші арналардың бірі – «Хабар» агенттігі бірқатар жобаларды қолға алып, тәуелсіздікке тарту жасап отыр.
Таяуда ғана «Хабар» телеарнасынан көрерменге «Пай-пай, 25» деп аталатын әлеуметтік ток-шоуы жол тартқанын жақсы білеміз. Атының өзі алыстан шақырып тұратын бағдарламаның мазмұны әдеттегі қасаң қағидадан өзгешелеу. Ойнақы, әуезді, айшықты. Онда еліміздің ширек ғасыр аралығындағы толайым табыстары сараланады. Жұртшылық жіті біле бермейтін мәліметтер, қызықты оқиғалар мен тағылымды әңгімелер айтылады.
«Хабар» агенттігі» АҚ басқарма төрағасының орынбасары Ринат Кертаевтың айтуынша, бағдарламаның «Пай-пай, 25» деп аталуы да тегін емес екен. Бұл – тәуелсіздік жылдарында жеткен табыстарға таңғалдырып, тамсандыратын жоба. Азаттықтың тарлан тарихына шолу жасайды. Бағдарламада бірнеше жанр бірігіп, әдемі үйлесім тапқан. Жүргізушілер астарлы әзілмен әсерлі әңгіме өрбітеді. Сондай-ақ, сарапшылар да пікір білдіріп, өз ойларымен бөлісіп отырады. Ток-шоудың тізгінін Қымбат Досжан, Серікзат Дүйсенғазин, Айгүл Иманбаева, Нұрсұлтан Құрман және Дархан Әбдуахит секілді танымал адамдар жүргізеді.
Сонымен бірге, «Хабар» агенттігінің тікелей ұйытқы болуымен Тәуелсіздіктің 25 жылдығына арналған «Экспедиция-25» жобасы қолға алынды. Жоба аясында түрлі салада қызмет ететін 12 азамат еліміздің әр аймағындағы жиырма бес мәдени-тарихи орындар мен ірі кәсіпорындарды аралап, елге еңбегі сіңген тұлғаларды насихаттауға сапарға шыққан.
Олар республика аумағы көлемінде 25 000 километр қашықтықта жол жүреді. Жоба әлі жалғасуда. «Экспедиция-25» бағдарламасы 10 қыркүйектен бастап телеарнадан көрсетіліп келеді.
Былтырдан бері «Хабар» телеарнасынан «Ақылдың кілті. Өмірдастан» телеэпопеясын қызыға қарап жүрміз. Ол туралы жұртшылықтың да пікірі жоғары. Өте бір көпшіліктің көңілінен шыққан сәтті жоба деп айтуға болады. Қойылымда халқымыздың басынан өткен аумалы-төкпелі кезеңдер дәл суреттегідей бейнеленген. Осы қазан айынан бастап азаттықтың ширек ғасыр тойына арналған жобаның екінші маусымы жарыққа шықты. Телеэпопеяның алғашқы маусымында XIX ғасырда ғұмыр кешкен үш буынның өмірі бейнеленсе, екінші маусым параллель сюжеттік желіге құрылған. Ондағы оқиғалар өткен ғасырдың жетпісінші жылдарынан басталып, еліміз тәуелсіздік алған кезбен астасады. Аталған туындының режиссері Мұрат Бидосовтың айтуынша, фильмдегі кейбір оқиғалар Ерік Байжүнісов деген азаматтың «Әке мұраты» деген шығармасының желісі бойынша алынған. Оның қасындағы Арман, Барбос деген достарының да прототипі бар. Тарихи эпопея Жамбыл облысындағы Мерке ауданында, Шу өзені мен Алатау бөктерінде, қалалық сюжеттер Алматыда түсірілген. Эпопеядағы костюм мен декорацияның ерекшелігі де тартымды. Екінші маусымдағы 20 бөлімнің барлығы да Абайдың қара сөздерімен түйінделіп отырады. Фильмнің сценариін Арман Сқабылұлы, Сержан Зәкерұлы және Мұрат Бидосов жазған. Ал музыкасын әнші-сазгер Сейфуллин Жолбарыс әрлеген.
Жалпы, жыл соңына дейін телеарна ұжымы «Тәуелсіздік толғауы», «Код нации» атты деректі фильмдер мен азаттық тойына арналған мерекелік бейнебаяндар мен роликтер дайындап, жұртшылыққа ұсынбақ.
Азамат ЕСЕНЖОЛ