Үлкен міндеттер үдесі
Жемқорлықты атам заманнан келе жатқан, Жер шарындағы мемлекеттердің бәріне тән індет деп есептеуге болады. Өкініштісі, бұл мемлекеттің, қоғамның дамуына тежеу болатын, болашағына кесірін тигізетін індет. Оның тамырына түбегейлі балта шаппайынша, мемлекетте тұрақты өсу-өркендеу болмайды.
Сондықтан Елбасымыз жуырда жасаған Жолдауында салық саясаты туралы айта келе: «Біз нарық қатысушыларын салықтан жалтару жолдарын іздеуге емес, бәсекелестікке ынталандыруымыз қажет» деді.
Жемқорлықтың бір түрі осы салықтан жалтару, сыбайластық, таныс-біліс арқылы қанша табыс тауып отырғанына қарамастан, мемлекетке тиісті үлесін қосудан басын алып қашу. Бұл – өз кезегінде ел дамуына тежеу болады. Сондықтан, 1998 жылдың 2 шілдесінде Қазақстан Республикасының «Сыбайлас жемқорлыққа қарсы күрес туралы» заңы қабылданып, онда сыбайлас жемқорлықпен күресу әрбір мемлекеттік органдар басшыларының, мемлекеттік қызметкердің, ел азаматтарының міндеті екендігі атап көрсетілді.
Қазақстан Республикасы Үкіметі қаулысымен «2011-2015 жылдарға арналған сыбайлас жемқорлықпен күрес бағдарламасы» бекітілді. Осы бағытта Қазақстан Республикасы қоршаған ортаны қорғау министрлігі де өз жоспарын бекітіп жұмыс жасауда. Бұл бағдарламаның басты мақсаты – індетке белсене қарсы тұру арқылы ұлттық қауіпсіздікті қамтамасыз етуге бағытталған шаралар жүйесін одан әрі жетілдіру. Аталмыш бағдарлама азаматтардың құқықтары мен бостандықтарын қорғауға, сыбайлас жемқорлық көріністерінен туындайтын қауіп-қатерден елімізді сақтауға, ұлттық қауіпсіздікті қамтамасыз етуге, жемқорлыққа қатысты құқық бұзушылықтың алдын алуға бағытталған.
Елбасы «Қазақстан – 2050» стратегиясы арқылы үлкен мақсат-міндеттер жүктеп отыр. Соның бірі – алдағы жылдары елімізді әлемнің ең дамыған 50 елінің қатарына енгізу. Бұл орайда, өзін патриотпын есептейтін әр азамат жемқорлық пен арсыздықтан ада, ел мүддесін өз мұратынан бөліп қарамауы тиіс.
Оспан МҰХТАРХАНОВ,
заңгер