Жеңістің 70 жылдығына және «ЭКСПО-2017» көрмесінің құрметіне орайластыра ұйымдастырылған «Жеңістің қайраты – болашақтың қуаты» атты суретшілердің III халықаралық байқауы мәресіне жетті.
Астана қаласындағы Ұлы Отан соғысы мүгедектеріне арналған клиникалық госпиталь мен Л.Гумилев атындағы Еуразия ұлттық университеті ұйымдастырған халықаралық байқауға 14 мемлекеттің қылқалам шеберлері қатысты. Мекеме басшысы Әділхан Абдулиннің айтуынша, Ресей, Украина, Қытай, Монғолия, Өзбекстан, Қырғызстан секілді елдерден өтінім көп түскен. Олар өз туындыларында әскери-патриоттық, ұрпақтар сабақтастығы және «ЭКСПО-2017» көрмесі шеңберінде Қазақстанның қазіргі жетістіктерін паш еткен.
– Ұлттық сурет галереясында ілінген барлық қатысушылардың еңбектері кәсіби деңгейде орындалған. Танымал кәсіби суретшілер мен қоғам өкілдерінен құралған конкурстық комиссия жеңімпаздарды анықтады. Бүгінгі сурет көрмесінде картиналардың барлығы халыққа ұсынылып отыр. Жалпы, қатарынан бірнеше мәрте осындай халықаралық деңгейде конкурс ұйымдастырған госпиталь ұжымына ризашылығымызды білдіреміз. Байқауға арнап салған өзімнің еңбегімді аталмыш мекемеге сыйға тарттым, – дейді танымал суретші, мәдениет қайраткері Тілеужан Батанов.
Ұлттық сурет галереясында өткен салтанатты шараға шетел мемлекеттерінің Қазақстандағы елшіліктері қызметкерлері, Парламент депутаттары, қоғамдық ұйым өкілдері қатысты.
Гүлмира АЙМАҒАНБЕТ
