Мемлекет басшысы Нұрсұлтан Назарбаев кеше Алматыдағы The Ritz Carlton қонақүйінде ресми ашылған XV Еуразия медиа форумының қатысушыларына жолдаған құттықтау хатында осындай пікірін білдірді. «Жедел өзгеріп жатқан ғаламда БАҚ әртүрлі жанжалдардың отын үрлеушіге айналумен қатар, жаһандық тежеушілік және халықаралық шиеленісті тоқтатушылық рөлін де атқара алады. Журналистиканың жауапкершілігі осы жерден көрініс табады» делінген құттықтау хатта.
Елбасының пікірінше, бүгінгі аудитория тәуелсіз блогерлер мен әлеуметтік желілердегі баламалы ақпарат көздерін жиі пайдаланатындықтан, классикалық журналистика сенім дағдарысына ұшырайды. «Бұл – классикалық журналистикаға төнген сын-қатердің бірі. Алайда дәстүрлі БАҚ-тардың бәсекелестік артықшылығы әрқашан кәсібилікке және сапалы контентке негізделеді. Бұл жерде тек қана шынайы және қолжетімді ақпарат пен жалған хабарларды тексеру арқылы аудиторияны өзіне тартуға, БАҚ-тың объективті ақпарат көзі ретіндегі беделін нығайтуға болады. Ол үшін ақпаратқа деген ашық қолжетімділікті дамытып, үздіксіз диалог жүргізіп отырған жөн. Журналист мамандығы қай уақытта болсын қоғамға адал қызмет етуді жүзеге асырудың және жоғары этикалық қасиеттердің жиынтығы болып қалуы тиіс» деген Нұрсұлтан Назарбаев. Айта кетелік, Елбасының хатын форумда Ақпарат және коммуникациялар министрі Дәурен Абаев оқып берді. Ол өз сөзінде алқалы жиынның жуырда ғана Астанада өткен экономикалық форуммен байланысып жатқанына тоқталды. Бұл кездейсоқтық емес. Өйткені медиа форумда талқыланатын мәселелер күллі дүние жүзін алаңдатып отыр. Мұндай пікірге XV Еуразия медиа форумының ұйымдастыру алқасының төрайымы Дариға Назарбаева да қосылатынын атап өтті.
Ғаламторды арам ниеттілер де пайдаланады
Д.Назарбаева XV Еуразия медиа форумының ресми ашылуында сөйлеген сөзінде 16 жыл бұрын алғашқы басқосу өткеннен бері әлемде ғаламат өзгерістердің болғанын айтты. «2002 жылы Алматыда біз алғашқы форумды өткізгенде iPhone да, iPad та, тіпті Facebook, Instagram, WhatsApp болған жоқ. Бұл жаңалықтар біздің өмірімізге қазір етене еніп кетті. «Пейджер» деген сөз ұмытылып, диск, телефонды ескі кинодан ғана көретін болдық. Теледидардың жәшігі сұйық кристалды экранға айналды. Ноутбуктардың күн сайын қаншама түрлері шығып жатыр. Смартфонды қалтамызға салып жүретін күнге жеттік. Ғаламтордың іздеу жүйесі арқылы кез келген ақпаратты лезде табамыз. Ең бастысы, әлемдегі медиатұтыну да өзгерді. Жаңа медиа жағдайында өзін суда жүзген балықтай еркін сезінетін буын дүниеге келді» деді Д.Назарбаева.
Дариға Нұрсұлтанқызының пікірінше, өкінішке қарай, аталған инновациялардың барлығы әлемдегі үздіксіз жүріп жатқан соғыстарды тоқтатуға ықпал ете алмай келеді. Халықаралық ахуал шиеленісіп тұрғанда қарапайым халық саясаткерлер мен БАҚ өкілдерінен жауапкершіліктің жаңа деңгейіне көтерілуіне үміттенеді. «Өйткені жаһантордың осынша қолжетімділігі тек талантты адамдарға ғана емес, арам ниеттілерге де мүмкіндік беруде. Ақпараттық соғыстардың көзге көрінбейтін жауынгерлерінен, жалған жаңалық таратушылардан үлкен қауіп төнуде. Біреулер менің бұл сөзімді құптамауы мүмкін. Ендеше, бұл тақырып форумның шеңберінде қызу талқыға түсетіні анық» деп атап өтті Дариға Нұрсұлтанқызы.
Қызу пікірталас алаңы
Жыл сайын бұл форумға 60 елден 500-ден аса делегат жиналады. Биылғы он бесінші бас-
қосуда «Халықаралық қатынастардағы эволюция», «Еуропалық Одақтың эволюциясы», «Ақпараттық технологиялар эволюциясы», «Қоғамдағы сенім эволюциясы», «Қоршаған ортаның эволюциясы», «Медиа эволюциясы», «Құндылықтар эволюциясы» деген тақырыптарда қызу пікірталастар өрбіді. Алқалы жиынға қатысушылардың қатарында Италияның экс-премьер-министрі, сенатор Маттео Ренци, ЕҚЫҰ-ның БАҚ бостандығы бойынша өкілі Арлем Дезир, америкалық саяси технология маманы, Барак Обаманың президенттік науқанында кеңесші болған Роджер Фиск, Гүржістанның бұрынғы Білім министрі Хатия Деканоидзе, ресейлік журналист Софико Шеварднадзе, «Фигаро» газетінің шолушысы Рено Жирар бар. Айтарлығы сол, форум қонақтары бір күн бойы журналистерге шеберлік дәрісін өткізді.
