Бас қаланың арнайы экономикалық аймағында құрылыс кластерінің 200-ге жуық жобасы, жұмыс істеп тұрған 50 өндіріс кәсіпорнының кластері табысты жұмыс істеуде. Тағы 45 жоба дайындық сатысында тұр. Соңғы 6 жылда №1 индустриялық паркте орналасқан өнеркәсіп кәсіпорындарынан түсетін салық түсімдері 5 есеге ұлғайып, 170 миллиард теңгеден асты.
Астана қаласы мәслихатының депутаттары арнайы экономикалық аймақтың бірқатар кәсіпорнын аралады. Бұл аймақта өнеркәсіп кәсіпорындарының негізгі үлесі шоғырланған. Мұнда 6 мыңға жуық адам жұмыс істейді. Экономикалық аймақтың аумағында 75,5 миллиард теңге сомасына бағаланатын 45 жоба іске асыру сатысында тұр. Олардың жұмысының басталуымен 2,5 мыңға жуық адам тұрақты жұмысқа орналасады. «Астана – жаңа қала» және «Астана-Технополис» екі арнайы экономикалық аймағының жалпы ауданы 16 мың гектардан асады.
– АЭА-ны одан әрі дамыту перспективалары мәселесін, олардың экономикалық әсерін осы жұмада бюджет, экономика, өнеркәсіп және кәсіпкерлік мәселелері жөніндегі тұрақты комиссияның отырысында жеке тыңдаймыз. Сондай-ақ №2 индустриялық парктің дамуы мәселесін жеке талқылаймыз, – деді астаналық мәслихат төрағасы Ерлан Каналимов.
Бүгінгі таңда арнайы экономикалық аймақтағы кәсіпорындар елорда қазынасына қомақты түсім түсіруші болып отыр.
