Әлем арулары Астанада айқасады
Астана төрінде 19-27 мамыр аралығында бокстан әйелдер арасындағы әлем чемпионаты өтеді. Бүкіләлемдік бокс федерациялары қауымдастығы (АИБА) осы жарысты өткізуге өтініш білдірген Қытай, Ұлыбритания, Тайланд және Қазақстан елдері арасындағы іріктеуде Астанаға басымдық берген.
Бұл әлем біріншілігінің басты ерекшелігі байрақты жарыста Рио-де-Жанейро ойындарына қатысуға жолдамалар сарапқа салынатын болады. Әлем чемпионатында 10 салмақ дәрежесі бойынша жеңімпаздар мен жүлдегерлер анықталады. Ал үш салмақта, атап айтқанда, 51 келіге дейінгі, 60 келіге дейінгі және 75 келіге дейінгі салмақтарда олимпиадалық лицензиялар үлестіріледі.
Астанада өтетін әлем чемпионатында лицензия алған боксшылар Олимпиада ойындарына тікелей қатысу құқығына ие болады. Егер спортшы осы жарысқа дейін құрлық біріншіліктерінің қорытындысы бойынша лицензия олжалаған болса, онда құрлық чемпионатында екінші орында болған боксшы Олимпиадаға қатысуға мүмкіндік алады, – деп мәлім етті АИБА атқарушы директоры Бузиди мырза.
Сонымен, Астана төрінде тағы бір дүбірлі дода өткелі тұр.
Ғалым ҚОЖАБЕКОВ