ەلورداداعى «انالار ءۇيى» قوعامدىق قورى ون جىلدىق مەرەيتويىن اتاپ ءوتتى. سالتاناتتى ءىس-شاراعا قر ءماجىلىسىنىڭ دەپۋتاتى قاراقات ابدەن, استانا قالاسى اكىمدىگىنىڭ جانىنداعى ايەلدەر ىستەرى جانە وتباسىلىق-دەموگرافيالىق ساياسات جونىندەگى كوميسسيانىڭ حاتشىسى قارلىعاش ساركەنوۆا جانە ت.ب. قاتىسىپ, قۇتتىقتاۋ ءسوز سويلەدى.
ءتۇرلى جاعدايلاردىڭ اسەرىنەن جەتىم قالعان بالالارعا قامقورلىق عانا ەمەس, تۇرمىستىڭ تاۋقىمەتىن تارتقان وتباسىلاردى قولداۋ ماقساتىندا قۇرىلعان «انا ءۇيى» ون جىلدان بەرى بالاسىنان باس تارتپاق بولعان انالارعا پسيحولوگيالىق كومەك كورسەتۋمەن اينالىسىپ كەلەدى. قايىرىمدىلىق قورىنىڭ نەگىزىن قالاۋشى انار راحىمباەۆا قازىرگى ۋاقىتتا ەلىمىز بويىنشا بارلىعى 21, ونىڭ ىشىندە الماتىدا 3 جانە استانادا 2 «انا ءۇيى» جۇمىس ىستەيتىنىن اتاپ ءوتتى.
– پەرزەنتحانادا جۇمىس ىستەپ جۇرگەندە مەن اتا-انالارى تاستاپ كەتكەن بالالاردى ءجيى كورەتىنمىن. ولاردىڭ كوپشىلىگى ۇنەمى ىڭىرسىپ جىلاپ وتىراتىن. سونى كورگەننەن كەيىن الەمدە ەشبىر بالا جىلاماۋى ءۇشىن مەن نە ىستەي الامىن دەگەن ويعا كەلدىم. بۇل مەنىڭ جۇرەگىمدە تەرەڭ ءىز قالدىردى. سودان كەيىن مەن باس تارتقان سابيلەرگە انا بولعىم كەلدى. بىراق وزىمە مۇلدە بەيتانىس بالالاردى جاقسى كورە الامىن با دەگەن سۇراق تۋىندادى. كوپ ويلانىپ, قيىن ومىرلىك جاعدايعا تاپ بولعان قىزدارعا جاعداي جاساۋ تۋرالى شەشىم قابىلدادىم. وسىلايشا, 2013 جىلدىڭ مامىرىندا استانا قالاسىندا العاشقى «انالار ءۇيى» ەسىگىن ايقارا اشتى. سول كەزدە ءبىز پەرزەنتحانالارمەن تىعىز قارىم-قاتىناس ورناتىپ, بالاسىنان باس تارتقىسى كەلەتىن بويجەتكەندەرمەن جۇمىس ىستەدىك. كەيىن بىزگە جۇكتىلىكتىڭ سوڭعى اپتالارىندا جۇرگەن جۇكتى ايەلدەر كەلە بىزگە جۇگىنە باستادى. مۇندا ولارمەن ماماندار ارنايى كەڭەستەر جۇرگىزەدى. جۇكتى انالاردىڭ بوسانىپ, بالالارى شيراعانشا قالۋىنا مۇمكىندىك قاراستىرىلعان. ءبىزدىڭ قور جۇمىس ىستەگەن ۋاقىتتا «انالار ءۇيىنىڭ» قابىرعاسىندا بارلىعى 5 مىڭعا جۋىق بالا دۇنيەگە كەلدى, – دەدى انار راحىمباەۆا.
مەرەكە قوناقتارىنىڭ ءبىرى ەلوردا اكىمدىگىنىڭ جانىنداعى ايەلدەر ىستەرى جانە وتباسىلىق-دەموگرافيالىق ساياسات جونىندەگى كوميسسيانىڭ حاتشىسى قارلىعاش ساركەنوۆا بولدى.
– بۇگىن ءبىز استانالىق «انا ءۇيى» ۇجىمىن مەرەيتويىمەن قۇتتىقتاۋعا كەلدىك. وسى ون جىل ىشىندە قور ومىرلىك قيىن جاعدايعا تاپ بولعان 1000-نان استام ايەلگە قولداۋ كورسەتتى. ادامداردىڭ كوپتەگەن تاعدىرلارى قۇتقارىلدى جانە بالالار وتباسىلاردا قالدى. وسى جىلدار ىشىندە قور جۇمىسىنىڭ ارقاسىندا 8 مىڭنان استام بالا اتا-انا تاپقانىن اتاپ وتكىم كەلەدى. «انا ۇيىندە» جوعارى بىلىكتى ماماندار جۇمىس ىستەيدى. بۇل الەۋمەتتىك قىزمەتكەرلەر دە, پسيحولوگيالىق جانە قۇقىقتىق قولداۋ كورسەتەتىن پسيحولوگتار دا بالالاردى قالاي تاربيەلەۋ كەرەكتىگىن بىلەدى, انالاردىڭ بالالارىمەن بىرگە تۇرۋىنا جاعداي جاسايدى. قورعا وركەندەۋ, بالالارعا باقىتتى بالالىق شاق تىلەيمىن. سىنعان تاعدىرلار مەن تاستاندى بالالار از بولسا ەكەن دەپ تىلەيمىن, – دەيدى قارلىعاش ساركەنوۆا.
ءىس-شارا بارىسىندا وسىدان ون جىل بۇرىن ورتالىققا قيىن جاعدايدا تۇسكەن نۇراسىل اتتى بالا «انا ءۇيىنىڭ» قىزمەتكەرلەرىنە العىسىن ايتسا, اناسى زاۋرەش اننەن شاشۋ شاشتى.
«انا ۇيىندە» جۇرگەن جاس كەلىنشەكتەردىڭ ءبىرىن اڭگىمەگە تارتتىم. اتى-ءجونىن ايتۋدان ءۇزىلدى-كەسىلدى باس تارتتى. بىراق پىكىر بىلدىرۋگە قۋانا كەلىستى.
«مۇندا, نەگىزىنەن, ومىرلىك قيىن جاعدايلارعا تاپ بولعان ايەلدەر كەلەدى. مەن دە سولاردىڭ ءبىرىمىن. جۇكتىلىگىمنىڭ سوڭعى ايلارىندا جىگىتىممەن ۇرىسىپ قالدىق. نەكەگە تۇرمادىق. تانىستارىمنان وسىنداي ورتالىقتىڭ بارىن ەستىپ, وسىندا كەلدىم. قازىر جاعدايىمىز جاقسى, بوپەم ءوسىپ جاتىر. «انا ءۇيى» ۇجىمىنىڭ ارقاسىندا قيىندىقتار ارتتا قالدى. ومىردە ەشتەڭەدەن قورىقپاۋ كەرەك ەكەن. سىڭلىلەرىمە ايتارىم, قانداي جاعداي بولسا دا بالالارىڭدى تاستاماڭدار» دەدى كوزىنە جاس العان كەلىنشەك.
ءىس-شارا سوڭىندا وسى ورتالىقتا ءوسىپ جاتقان ءبىر ءبۇلدىرشىن قىرقىنان شىعارىلىپ, ءتاي-ءتاي باسىپ جۇرگەن كەلەسى قوشاقاننىڭ تۇساۋى كەسىلدى.
