ل.ن.گۋميلەۆ اتىنداعى ەۇۋ اۋماعىندا «ۋنيۆەرسيتەت» اتتى ساياباق اشىلدى.
اقبۇلاق وزەنىنىڭ بويىندا ورىن تەپكەن ساياباق قۇرىلىسى اتالمىش جوعارى وقۋ ورنى اكىمشىلىگىنىڭ, الماتى اۋدانىنىڭ اكىمدىگى مەن استانا قالاسى تابيعي رەسۋرستار جانە تابيعاتتى پايدالانۋدى رەتتەۋ باسقارماسىنىڭ باستاماسىمەن كوكتەمدە قولعا الىنعان بولاتىن. ونىڭ اۋماعىندا 5 وقۋ-لابوراتوريالىق جانە 4 الەۋمەتتىك عيمارات, 28 عىلىمي-زەرتتەۋ ورتالىعى, يننوۆاتسيالىق پارك پەن سپورتتىق-ساۋىقتىرۋ كەشەندەرى ورنالاسقان. «وسى تەكتەس ساياباقتار دۇنيەجۇزىندەگى كوپتەگەن ۋنيۆەرسيتەتتەردە بار. ءبىز قازاقستاندىق وقۋ ورىندارى ىشىندە بۇل يدەيانى العاش بولىپ جۇزەگە اسىردىق. جاسىل جەلەككە ورانعان دەمالىس ورنى ناعىز ستۋدەنتتەر مەكەنىنە اينالادى دەپ سەنەمىن. الداعى ۋاقىتتا ستۋدەنتتەر ءۇشىن بۇل جەرگە wi-fi ورناتىلادى» دەپ اتاپ ءوتتى ءوز سوزىندە ۋنيۆەرسيتەت رەكتورى ەرلان سىدىقوۆ. ساياباقتىڭ سالتاناتتى اشىلۋ راسىمىنە كۋا بولعان جۇزدەن استام ستۋدەنت «ۋنيۆەرسيتەتتە» اعاش وتىرعىزىپ, ونى كوگالداندىرۋعا ءوز ۇلەستەرىن قوستى.
ءمادينا جاقىپ
