جاڭا جىل قارساڭىندا ەلوردالىق كاسىپكەرلەر تۇرمىسى تومەن وتباسىلارعا كەرەمەت سىي جاسادى. الەۋمەتتىك ارىپتەستىك اياسىندا قۇرىلىس كومپانيالارى قالادا تۇراتىن ون ءبىر وتباسىعا پاتەر كىلتىن تابىستادى. داستۇرگە اينالعان قايىرىمدىلىق شاراعا ەلوردا اكىمى يمانعالي تاسماعامبەتوۆ قاتىستى.
استانالىق كاسىپكەرلەر بيزنەستىڭ الەۋمەتتىك جاۋاپكەرشىلىگىن ۇمىتقان ەمەس. ويتكەنى, وسى ۋاقىتقا دەيىن ولاردىڭ كومەگىمەن الپىستان اسا وتباسى باسپانالى بولدى.
بيىل دا يگى شارا جالعاسىن تاپتى. قايىرىمدى ازاماتتاردىڭ قولىنان ءبىر جانە ەكى بولمەلى پاتەر كىلتىن العانداردىڭ قۋانىشىندا شەك جوق. الەۋمەتتىك جاعدايى تومەن, كەمتار بالا تاربيەلەپ وتىرعان اتا-انالار تابىس تاۋىپ, باسپانا ساتىپ الاتىن جاعدايدا ەمەس. سوندىقتان ولار استانا قالاسىنىڭ تۇرعىن ءۇي باسقارماسىنا مەملەكەتتىك قوردان ءۇي الۋ كەزەگىنە قويىلعان.
– ەلىمىز ءۇشىن الەۋمەتتىك ماسەلە ەڭ باستى ورىندا. بۇگىن باسپانالى بولىپ وتىرعانداردىڭ وتباسىندا ەكى بىردەي بالاسى اۋرۋعا شالدىققاندار بار. سابىر ساقتاپ, وسى ۋاقىتقا دەيىن پاتەر كەزەگىن كۇتكەن مۇقتاج جاندار كاسىپكەرلەردىڭ ارقاسىندا ءۇيلى بولدى. قالا اكىمدىگىنىڭ سوڭعى ءۇش-ءتورت جىلدان بەرى قايىرىمدىلىق كورسەتۋ جونىندەگى ۇسىنىسى كومپانيالار تاراپىنان قولداۋ تاۋىپ كەلەدى. كىمگە تابىستاۋ كەرەك, كىم شىن مانىندە باسپاناعا ءزارۋ ەكەنىن ءوز ەرىكتەرىمەن تاڭدادى. بۇگىن, مىنە, سىزدەرگە پاتەر كىلتتەرىن تابىستاۋدا. ەڭ باستىسى, بالالارىڭىز اياقتان تىك تۇرىپ كەتىپ, سولاردىڭ ازامات بولعانىن كورۋگە جازسىن, – دەدى قالا باسشىسى ي.تاسماعامبەتوۆ.
ەندى «استاناپرومستروي-م», «Allur Auto Astana», «قۇلاگەر», «استاناترەيدينتەرنەشنل», «استاناسەرۆيسسترويمونتاج-01», «التىن ححI», «ازيا», «استاناستروينۆەست», «تسەنتر كازەنەرگومونتاج» جانە «اليانستروينۆەست» كومپانيا باسشىلارىنىڭ قامقورلىعىنىڭ ارقاسىندا ون ءبىر وتباسى جاڭا جىلدى جاڭا قونىستا قارسى الاتىن بولدى.
قازىرگى ۋاقىتتا استانادا 28 مىڭنان استام ادام پاتەر كەزەگىندە تۇر. سوڭعى بەس جىلدا مەملەكەتتىك باعدارلاما اياسىندا 4,5 مىڭ ادام باسپاناعا يە بولعان.
گۇلميرا ايماعانبەت
