اعارتۋشىلىق سالاسىنداعى تۇڭعىش مۇراجاي – ءار ءوڭىر ونەگە الاتىن بىرەگەي باستاما
ل.گۋميلەۆ اتىنداعى ەۋرازيا ۇلتتىق ۋنيۆەرسيتەتىندە تۇڭعىش رەت قازاقستاننىڭ ءبىلىم تاريحى مۇراجايى اشىلدى. اتالعان وقۋ ورداسىنىڭ «استانا» اتريۋمىندا ورنالاسقان بۇل مۇراجاي ءبىلىم جانە عىلىم ءمينيسترى اسلان ءسارىنجىپوۆ پەن ەۋرازيا ۇلتتىق ۋنيۆەرسيتەتىنىڭ رەكتورى ەرلان سىدىقوۆتىڭ باستاماسىمەن جۇزەگە اسقان.
مۇراجايدا ماكەتتەر, باعا جەتپەس قۇندىلىققا يە سكۋلپتۋرالار, گراممافون, ءمور, ديوراممالار, قابىرعا ساعاتى, بىلتە شام, سيا ساۋىت, قىل قالامعا دەيىن ورىن العان. سونداي-اق تاعى ءبىر ەرەكشەلىگى: ەكسپوزيتسياعا د.قامزابەكۇلى, س.اققۇلى, ن.بەلەكۇلى, ك.شاريپوۆا سياقتى عالىمداردىڭ جەكە قورىنان الىنعان سۋرەتتەر مەن قۇجاتتار العاش رەت كورەرمەنگە ۇسىنىلدى.
«بۇل – تۇڭعىش رەت اشىلعان ءبىلىم تاريحىنىڭ مۇراجايى. سوندىقتان, ونىڭ مادەني-اعارتۋشىلىق قۇندىلىقتاردى دارىپتەپ, ساقتاۋعا, وسكەلەڭ ۇرپاققا تاريحىمىزدى جەتكىزۋگە قوسار ۇلەسى مول» دەيدى وقۋ ورنىنداعى تاريح كافەدراسىنىڭ دوتسەنتى, تاريح عىلىمىنىڭ كانديداتى ءارى وسى جادىگەرلەر قورىن جاساقتاۋشىلاردىڭ ءبىرى قۇرالاي سەيتقازينا.
مۇراجاي قۇرىلىمىندا «تۇركى كەزەڭىندەگى VI, VIII, XIV عاسىرلارداعى پەداگوگيكالىق ەسكەرتكىشتەر», «XV-XIX عاسىردىڭ ءبىرىنشى جارتىسىنداعى قازاق اقىندارى مەن جىراۋلارىنىڭ اعارتۋشىلىق كوزقاراسى», «XIX عاسىردىڭ ەكىنشى جارتىسى مەن XX عاسىر باسىنداعى قازاقستاندا عىلىمي پەداگوگيكالىق ويدىڭ تۋىنداۋ كەزەڭى», «قازاقستاننىڭ ءبىلىم بەرۋ مەن اعارتۋشىلىق سالاسىنا شەتەلدىك عالىمداردىڭ قوسقان ۇلەسى», «1917-1990 جىلدار, كەڭەس وداعى كەزىندەگى عىلىم مەن ءبىلىم بەرۋدىڭ دامۋى», «1991 جىلدار مەن قازىرگى كەزەڭگە دەيىنگى جاھاندانۋ جاعدايىنداعى ءبىلىم بەرۋ مەن عىلىم» سەكىلدى تاقىرىبى وزەكتى دە ماڭىزدى بولىمدەر بار.
ايگۇل وزەكوۆا
