بۇگىن ەلوردالىق مەكتەپ بىتىرۋشىلەر ءۇشىن ايرىقشا كۇن بولدى. استانا قالاسىنىڭ اكىمى ادىلبەك جاقسىبەكوۆ بىرىڭعاي ۇلتتىق تەستىلەۋدىڭ قورىتىندىسى بويىنشا ءوز ءبىلىمىن دالەلدەگەن 132 ەلوردالىق تۇلەككە سالتاناتتى تۇردە «التىن بەلگى» توسبەلگىسىن تابىستادى.
– بۇگىن – ەرەكشە كۇن. مەكتەپ قابىرعاسىندا وتكەن جىلداردى ارتقا تاستاپ, ۇلكەن ومىرگە قادام باسىپ وتىرسىزدار. وسى قۋانىشتى كۇنمەن بارلىقتارىڭىزدى قۇتتىقتايمىن! ەلباسىنىڭ قامقورلىعىمەن ەلىمىزدە جاس ۇرپاققا ساپالى ءبىلىم مەن جاقسى تاربيە بەرۋگە بارلىق جاعداي جاسالعان. ەندى جوعارى وقۋ ورىندارىنىڭ ەسىكتەرى سىزدەرگە ايقارا اشىق. وندا ۇزدىك پەداگوگتار جۇمىس ىستەيدى. ءبىلىم بەرۋ گرانتتارىنىڭ سانى ۇلعايتىلدى. الەمدىك دەڭگەيدەگى نازارباەۆ ۋنيۆەرسيتەتى قۇرىلدى. «بولاشاق» باعدارلاماسى جۇمىس ىستەيدى. ەلىمىزدىڭ ەرتەڭى – سىزدەردىڭ قولدارىڭىزدا. كەلەشەكتە مەملەكەتىمىزدى, ەلوردامىزدى بۇدان ءارى كوركەيتۋگە ءوز ۇلەستەرىڭىزدى قوسادى دەپ سەنەمىن. سىزدەرگە ساپالى ءبىلىم بەرگەن ۇستازدارعا دا ريزاشىلىعىمدى بىلدىرەمىن. بارشاڭىزعا اق جول تىلەيمىن, – دەپ تۇلەكتەرگە ىزگى لەبىزىن ءبىلدىردى استانا اكىمى.
راسىندا, باس قالادا ءبىلىم سالاسىنا قولايلى جاعداي جاسالعان. جالپى ءبىلىم بەرەتىن مەكتەپتەر سانى جىل سايىن ارتىپ كەلەدى. وتكەن جىلى 7 100 ورىندىق 6 مەكتەپ اشىلىپ, ءۇش اۋىسىمدىق وقۋ تولىعىمەن جويىلدى.
بيىل «التىن بەلگى» العان ەلوردالىق تۇلەكتەردىڭ سانى وتكەن جىلمەن سالىستىرعاندا 112-دەن 132-گە, ۇلتتىق ەمتيحان بويىنشا ورتاشا بالل 86,6-دان 89,2 بالعا ءوستى. №72 مەكتەپ-ليتسەيىنىڭ تۇلەگى نۇراسىل ەرجانوۆ – 125 بالعا قول جەتكىزدى. ءسوز اراسىندا ايتا كەتەيىك, ەلوردادا 4 695 تۇلەك اتتەستات السا, سونىڭ 54-ءى ەرەكشە ۇلگىدەگى اتتەستاتقا يە بولدى.
ايتۋلى شارا بارىسىندا جۇدىرىقتاي جۇرەگى لۇپىلدەپ, تولقىپ تۇرعان «التىن بەلگى» يەگەرى, № 78 مەكتەپ-ليتسەيىنىڭ تۇلەگى جانات نۇرايىمدى سوزگە تارتتىق.
– ومىرىمدەگى ەرەكشە كۇندى باستان كەشىپ تۇرمىن. ول ەسىمنەن ماڭگى كەتپەيدى. سوندىقتان وسىنداي جەتىستىككە جەتكىزگەن مەكتەبىمە, ۇستازدارىما العىسىم شەكسىز. قاشاندا جانىما دەمەۋ بولىپ, قولداپ جۇرگەن اتا-اناما ريزامىن. بارلىق تۇلەكتەرگە دە ءسات-ساپار تىلەيمىن. بالا كۇنىمنەن جۋرناليست بولسام دەپ ارماندادىم. سول ماقساتپەن ل.گۋميلەۆ اتىنداعى ۇلتتىق ۋنيۆەرسيتەتىندە ءبىلىم الامىن دەپ وتىرمىن. ەلوردانىڭ ءتول قۇرداسىمىن. استانا بىزبەن جايناپ, ءوسىپ كەلەدى. وعان دا وتە قۋانىشتىمىن, – دەيدى ول كوڭىلى الىپ-ۇشىپ.
سالتاناتتى شارا اياقتالعان سوڭ «التىن بەلگى» يەگەرلەرى مەكتەپ ءۆالسىن بيلەپ, اسپانعا تۇلەكتەردىڭ تىلەكتەرى جازىلعان كەپتەرلەر مەن شارلار ۇشىرىلدى. كەش وتاندىق ەسترادا جۇلدىزدارىنىڭ كونتسەرتىنە ۇلاستى.
ازامات ەسەنجول
