التىن تاققاندار الىسقا سامعايدى

كەشە «قازاق ەلى» مونۋمەنتى الاڭىندا بيىلعى مەكتەپ تۇلەكتەرىنىڭ سالتاناتتى جيىنى ءوتتى. استانا قالاسىنىڭ اكىمى يمانعالي تاسماعامبەتوۆ ۇلتتىق بىرىڭعاي تەستىلەۋ قورىتىندىسى بويىنشا ءوز بىلىمدەرىن دالەلدەگەن توقسان ەكى «التىن بەلگى» يەگەرىنە توسبەلگىلەرىن تاپسىردى.

ماراپاتتاۋ راسىمىندە قالا اكىمى يمانعالي نۇرعاليۇلى مەكتەپ بىتىرۋشىلەر مەن ۇستازداردى, اتا-انالاردى مەرەكەمەن قۇتتىقتاپ, ءسوز سويلەدى. «ارعى عاسىردا ۇلى اباي «بالانى وقىتۋعا اركىم قۇشتار, دەسە دە ول ءبىر ارمان قولدان ۇشقان» دەپ تەبىرەنگەن ەكەن. راسىندا, بۇگىنگىدەي ساۋاتتى ۇرپاق تاربيەلەۋ كەشەگى اتا-بابانىڭ سان عاسىرلىق اڭسارى ەدى. ەندى, مىنە, ءبىزدىڭ ۇرپاق ءۇشىن بۇل – تاعدىردىڭ بەرگەن باعاسىز مۇمكىندىگى, تاۋەلسىز مەملەكەتىمىزدىڭ مارتەبەلى مىندەتى. سوندىقتان, بۇگىنگى زامان بالانى «قايدا وقىتامىن؟» دەگەن ارماننان ەمەس, «قايدا وقىتامىن؟» دەگەن تاڭداۋدان تۇرادى. وسى كۇنى بۇل تاڭداۋ ەلىمىزدىڭ باس قالاسىندا ەلباسىنىڭ وسيەتىمەن ءبىلىم الىپ, ءتالىم جيناعان, تاربيە كورىپ, ارمان قۋعان ۇل-قىزدارىمىزدىڭ الدىندا تۇر. ارينە, ونىڭ ناقتى باعاسى وقۋشىنىڭ ءبىلىم ناتيجەسىنەن كورىنەدى. ال, ونىڭ بىرەگەي كورسەتكىشى – «التىن بەلگى» دەدى قالا باسشىسى.

كەشەگى جىلداردى سارالاعان ەلوردا اكىمى «وسىدان ون التى جىل بۇرىن استانادا بۇل توسبەلگىنى تەك 1 وقۋشى يەلەنسە, بيىل 92 تۇلەك «التىن بەلگى» تاعىپ, اقجولتاي ءۇمىتتى اقتاپ شىقتى. ال, جالپى, كۇنى كەشە وتكەن ۇلتتىق بىرىڭعاي تەستىلەۋدى قالامىزدان ۇزىن سانى 3252 وقۋشى تاپسىرىپ, ونىڭ ىشىندە 1081 بالا 100-دەن جوعارى بالل جينادى» دەپ, مۇنىڭ ءوزى ۇلكەن كورسەتكىش, زور ماقتانىش ەكەنىن ايتتى.

«ارداقتى جاستار, بۇل جەتىستىك­تەرىڭىز وزدەرىڭىزدەن كەيىنگى ءىنى-قارىنداس­تارى­ڭىز­دىڭ ىنتاسىن وياتادى, «مەن – استانالىق وقۋشىمىن» دەگەن سەزىمىنە سەرپىن بەرەتىن ۇلكەن ۇلگى, ماقتان تۇتار ونەگە, وتكەن ومىرلەرىڭىزدىڭ العاشقى مەجەسى. ەندىگى تاعدىر تەك ءوز قولدارىڭىزدا. دەسە دە, زايىرلى ءومىر ۇزدىكسىز تالاپ-تالپىنىس پەن ۇمتىلىستان, ۇيرەنۋ مەن ىزدەنۋدەن, جاڭارۋ مەن جاڭعىرۋدان تۇرادى. بۇل – ءاربىرىڭىز ۇنەمى ەستە ۇستايتىن ۇراندى اقيقات! ءوز باسىم الەمنىڭ وزىق كوشىنەن قالماي, ۋاقىتتىڭ تالابىنان تالماي, تالاي تابىستىڭ بيىگىنەن كورىنەتىندىكتەرىڭىزگە كامىل سەنىمدىمىن. ويتكەنى, سىزدەردىڭ بويلارىڭىزدا استانانىڭ اسقاق رۋحى مەن جۇرەكتەرىڭىزدە ەلباسىنىڭ جاق­قان جالىنى بار. وسىنى ەستەن شىعار­ما­عاي­سىزدار!» دەگەن ي.تاسماعام­بەتوۆ تۇلەكتەرگە تىلەكشى ەكەندىگىن دە جەتكىزدى.

ايتا كەتۋ كەرەك, بيىلعى وقۋ جىلىندا استانا مەكتەپتەرىن 4042 وقۋشى ءتامامدادى. ونىڭ 3252-ءسى نەمەسە 80,5 پايىزى ۇبت-عا جىبەرىلگەن. قالا بويىنشا 2014 جىلى ورتاشا بالل 87,58 پايىزدى كورسەتتى. ءۇش تۇلەك – 124, 1081 وقۋشى 100-دەن جوعارى بالل جينادى. №9 «زەردە» مەكتەبى مەن №48 مەكتەپ-ليتسەيدى بىتىرۋشىلەر اراسىندا «التىن بەلگى» يەگەرلەرى باسىمىراق.

اسحات رايقۇل