4-7 شىلدە كۇندەرى «حانشاتىر» ساۋدا جانە ويىن-ساۋىق ورتالىعىنىڭ ماڭىنداعى الاڭدا وتەتىن «مىڭجىلدىقتار توعىسىنداعى استانا» كوشپەلىلەر وركەنيەتىنىڭ فەستيۆالى بيىل دا استانا دۋمانىنا ءار قوسادى. كوپشىلىك اسىعا كۇتەتىن شارا ساعات 11:00-دە باستالادى. جەتى جىلدان بەرى ۇزبەي وتكىزىپ كەلە جاتقان فەستيۆال بۇگىندە ەلوردا تويىنىڭ ايتۋلى مەرەكەسى رەتىندە قالىپتاسىپ ۇلگەردى.
دالا ءتوسىن ەمگەن كوشپەلىلەر ءومىرى, تۇرمىس-تىرشىلىگى قانداي؟ كۇنكورىس كوزى نە؟ قولدانبالى ونەر تۇرلەرى قانداي؟ قانداي ۇيدە تۇرعان, قانداي كيىم كيگەن؟ وسى سىندى قاراپايىم دا قىزىقتى ساۋالدارعا كوشپەلىلەردىڭ سالت-تۇرمىسىنىڭ شىنايى سۋرەتتەمەسى ىسپەتتى جادىگەرلەر جايىلعان اشىق اسپان اياسىنداعى فەستيۆال جاۋاپ بەرەدى.
ۇيىمداستىرۋشىلار بيىلعى فەستيۆالدە ەكسپوزيتسيا باي تۇسكەنىن, ويىن-ساۋىق باعدارلاماسى تۇرلەنگەنىن ايتادى. اسىرەسە, شارا قىرعىزستاننان كەلگەن اعايىندى ديقامباەۆتاردىڭ جەتەكشىلىگىمەن اتىشۋلى كاسكادەرلاردىڭ قاتىسۋىمەن ەرەكشەلەنبەك. ساعاتقا سوزىلاتىن تەاترلاندىرىلعان شوۋ كەزىندە قوناقتار الىستان ەسكەن اڭىز الەمىنە ەنىپ, ارۋدىڭ جۇرەگىن جاۋلاۋعا تىرىسقان جىگىتتەردىڭ الاۋلاعان سەزىمىنە كۋا بولادى. كاسكادەرلار ارنايى دايىندالعان الاڭدا «ات ۇستىندەگى جەكپە-جەك», «شىڭداعى تۋرنير», «قىز قۋ», «كوكپار» سىندى سايىستاردا ءوز ەپتىلىكتەرىن ورتاعا سالماق. سونىمەن قاتار, «جامبى اتۋ» قازاق ۇلتتىق سپورت ويىنىندا قاتىسۋشىلار ءوز مەرگەندىكتەرىن سىنايتىن بولادى.
بيىلعى فەستيۆال ماۋسىمىنىڭ باستى جاڭالىعى – سالت-داستۇرلەردىڭ گولوگرافيالىق تەاترى. كوشپەلىلەر ومىرىندەگى بالا تۋ مەن ونىڭ العاشقى قادامى, ۇلكەن ومىرگە ارالاسۋى, ۇيلەنۋ تويى سىندى سالت-جورالعىلار ماڭىزدى ۋاقيعالارمەن ءوربيدى. شارانىڭ باستى ۇستانىمى شىنايى اكتەرلار مەن ۆيرتۋالدى نىسانداردىڭ ءوزارا ارەكەتتەسۋىندە جاتىر. ياعني, ۆيرتۋالدى ساحنا كەڭىستىگىندە اكتەرلار مەن مودەلدەر سالت-ءداستۇر تۇرلەرىنەن كورىنىس تابادى. ونىڭ ۇستىنە, كورەرمەندى بىردە وزەن جاعاسىنا, بىردە كيىز ۇيگە اكەلەتىن ءار ۋاقيعانىڭ ءوز گولوگرافيالىق دەكوراتسياسى جاسالعان. كورەرمەندەر اكتەرلارمەن بىرگە قىر قازاعىنىڭ ءومىر جولىن بىرگە باستان وتكەرگەندەي كۇي كەشەدى.
قولونەردىڭ دامۋى ءداستۇرلى قوعامنىڭ كوشپەلى ءومىر سالتىمەن, مادەني جانە تاريحي ۇدەرىستەرمەن تىعىز بايلانىستى. شاتىر ىسپەتتى جارمەڭكە پاۆيلوندارىنا تۇركى حالىقتارىنىڭ سان الۋان ونەر تۋىندىلارى جايىلادى. بيىل وزبەكستان (اعاش جونۋ, مەتالل بالقىتۋ, توقىماشىلىق), تۇركيا (كالليگرافيا), قازاقستان (زەرگەرلىك ونەر, كىلەم توقۋ, كەستە تىگۋ, بىلعارى وڭدەۋ, كيىز باسۋ, ۇلتتىق مۋزىكالىق اسپاپتار, اعاش جونۋ), ازەربايجان (كىلەم توقۋ) جانە ياكۋتيا (زەرگەرلىك ونەر, حومۋس جاساۋ) ەلدەرىنىڭ شەبەرلەرى ءوز تۋىندىلارىن الا كەلدى. جارمەڭكە بارىسىندا قولونەر, اسىرەسە, كيىز باسۋ, سىرماق تىگۋ, شي توقۋ تۇرلەرىنەن شەبەرلىك ساعاتتارى وتەدى.
كوشپەلىلەر وركەنيەتى فەستيۆالىنىڭ جابىلاتىن كۇنى (6 شىلدە) «مۇرا» ارنايى الەۋمەتتىك اكتسياسى وتەدى. فەستيۆال قوناقتارى – قولونەر شەبەرلەرى تۋىندىلارىن استانا قالاسىنداعى بالالار ۇيلەرى مەن مەكتەپتەرگە سىيعا تارتادى. وسىلايشا, وسكەلەڭ ۇرپاقتىڭ ۇلتتىق مۇراعا قىزىعۋشىلىعىن ارتتىرىپ, قولونەر تۇرلەرىنىڭ دامۋىنا جول اشۋدى كوزدەيدى.
فەستيۆال كەزىندە ءداستۇرلى تۇركى مۋزىكالىق مۇراسىنىڭ جانرلىق سان الۋاندىعىن اشاتىن كونتسەرت وتەدى. وندا دومبىرادان كۇي ەسىپ, قوبىز ءۇنى اۋەلەيدى, ۇلتتىق اندەر شارىقتاپ, تولعاۋ-تەرمەلەر قۇلاق قۇرىشىن قاندىرادى. شارا قوناقتارى – يۋليا رۋتسكايا, «وردو ساحنا» توبى (قىرعىزستان), كۋننەي, «ەيگە» ۇلتتىق سالت-ءداستۇر تەاترى (ياكۋتيا), «كەشيۋ» توبى, اقىلبەك جەمەنەي, «قوڭىر» ەتنو-توبى, «Kobyz project», «سازگەن سازى», «اقجارما», «حاسساك» فولكلورلىق- ەتنوگرافيالىق انسامبلدەرى (قازاقستان), «Sema Dance» (تۇركيا), «سابو» (وزبەكستان), «ناز» (قازاقستان) بي ۇجىمدارى. سونىمەن قاتار اقىندار ايتىسى ۇيىمداستىرىلادى.
ۇلتتىق تاعامدار تۇركى حالىقتارىنىڭ جەڭسىك اس جاساۋداعى شەبەرلىكتەرىن عانا ەمەس, سالاۋاتتى ءومىر سالتىن ۇستاناتىندىقتارىن ايعاقتايدى. فەستيۆال كەزىندە كەلۋشىلەر قازاق, ۇيعىر, تۇرىك ۇلتتىق تاعامدارىنىڭ الۋان تۇرلەرىمەن تانىسا الادى. فەستيۆال باعدارلاماسىنا قاتىسۋشىلار ەڭ بەلگىلى تاعامداردىڭ ءدامىن تاتىپ, شەبەرلىك ساعاتتارىنا قاتىسادى.
«مىڭجىلدىقتار توعىسىنداعى استانا» فەستيۆالىندە «مەنىڭ كىشكەنتاي كيىز ءۇيىم» اتتى بالالارعا ارنالعان شەبەرلىك ساعاتىن, «التىن ساقا» سپورتتىق سايىسىن, مۋزىكالىق اسپاپتار, قىران بۇركىت پەن جۇيرىك تازى كورمەلەرىن, «كيىز باسۋ» ەتنو-شوۋىن, كوشپەلى تسيرك قويىلىمىن وتكىزۋ داستۇرگە اينالعان.
كوشپەلىلەر ومىرىنەن سىر تارتاتىن كەش 4-7 شىلدە كۇندەرى «حانشاتىردىڭ» وڭ قاپتالىنداعى الاڭدا ساعات 11.00-دەن 22.30-عا دەيىن جالعاسادى.
