اپتا باسىندا مەملەكەت باسشىسى نۇرسۇلتان نازارباەۆ رەسەي فەدەراتسياسىنا جۇمىس ساپارىمەن باردى.
ساپار بارىسىندا رەسەي باسشىسى ۆلاديمير پۋتينمەن كەزدەسىپ, ىنتىماقتاستىقتىڭ نەگىزگى باعىتتارى بويىنشا ەكىجاقتى كەلىسسوزدەر وتكىزدى.
كەزدەسۋدىڭ قورىتىندىسى بويىنشا ءححى عاسىردا تاتۋ كورشىلەستىك جانە وداقتاستىق تۋرالى جاڭا شارتتى ازىرلەۋ جانە قابىلداۋ قاجەتتىلىگى تۋرالى ۋاعدالاستىقتى بەكىتكەن بىرلەسكەن مالىمدەمە قابىلداندى.
سوڭىنان ەكى ەل باسشىلارى قازاقستان مەن رەسەي اراسىنداعى دوستىق, ىنتىماقتاستىق جانە ءوزارا كومەك تۋرالى شارتتىڭ 20 جىلدىعىنا ارنالعان كونتسەرتتى تاماشالادى.
رەسەيدەن كەيىن پرەزيدەنت تۇركيا رەسپۋبليكاسىنا رەسمي ساپارمەن اتتاندى.
ساپار اياسىندا اتاتۇرىك كەسەنەسىنە گۇل سەبەتىن قويىپ, قۇرمەتتى قوناقتار كىتابىنا قولتاڭبا قالدىردى. وندا نۇرسۇلتان نازارباەۆ مۇستافا كەمال اتاتۇرىكتىڭ تۇركيا رەسپۋبليكاسىن مىقتى جانە بەدەلدى مەملەكەت رەتىندە دامىتۋعا قوسقان ۇلەسىن اتاپ وتكەن.
بۇدان كەيىن مەملەكەت باسشىسى تۇركيا رەسپۋبليكاسىنىڭ پرەزيدەنتى ابدۋللا گۇلمەن كەزدەستى.
كەزدەسۋ بارىسىندا قازاقستان مەن تۇركيا باسشىلارى 20 جىل ىشىندەگى ىنتىماقتاستىقتىڭ قورىتىندىسىن شىعارىپ, ەكى ەلدىڭ قارىم-قاتىناسىن ودان ءارى دامىتۋ ماسەلەلەرىن تالقىلادى.
قابىلداۋدا نۇرسۇلتان نازارباەۆ تۇركى تىلدەس ەلدەردىڭ اراسىنداعى ىنتىماقتاستىقتى دامىتۋعا قوسقان ۇلەسى ءۇشىن ابدۋللا گۇلگە «التىن قىران» وردەنىن تاپسىردى.
