10-24 شىلدە ارالىعىندا استانادا ەلىمىزدە تۇڭعىش رەت يۋنەسكو كلۋبتارى شىعارماشىلىعىنىڭ اكادەمياسى وتەدى. بىرەگەي جوبا استانا قالاسى اكىمدىگىنىڭ قولداۋىمەن قازاقستاندىق ۇلتتىق يۋنەسكو كلۋبتارىنىڭ فەدەراتسياسىنىڭ, قر تۇڭعىش پرەزيدەنتى قورىنىڭ جانە قازاق ۇلتتىق ونەر ۋنيۆەرسيتەتىنىڭ باستاماسىمەن وتكىزىلمەك.
جوبا جاستاردى تولەرانتتىق رۋحتا تاربيەلەۋ جانە مەملەكەتتىڭ بولاشاق شىعارماشىلىق الەۋەتىن قالىپتاستىرۋ ماقساتىندا شىعارماشىل-دارىندى وسكەلەڭ ۇرپاقتى قولداۋ مەن دامىتۋعا باعىتتالعان.
قازاقستاننىڭ 14 وبلىسى مەن استانا, الماتى قالالارىنان 12-17 جاس ارالىعىنداعى 100 ۇزدىك ستۋدەنت ەكى اپتا بويى ءبىلىم بەرۋ باعدارلاماسىنان وتەدى. جوباعا كوركەمدىك, مۋزىكالىق, حورەوگرافيالىق, ۆوكالدىق ونەر نوميناتسيالارى بويىنشا الدىن الا ىرىكتەۋدەن وتكەن 500-دەن استام ۇمىتكەر قاتىسادى.
ونەر سالاسىنداعى جەتەكشى ماماندارمەن كاسىبي ساباقتاردان باسقا, باعدارلاماعا «الەم مادەنيەتى» مەن جاھاندىق ازاماتتىقتى قالىپتاستىراتىن, كوشباسشىلىق الەۋەتتى دامىتۋ بويىنشا ترەنينگتەر مەن شەبەرلىك-سىنىپتار ەنگىزىلدى.
astana.gov.kz
