ەلوردادا ونوماستيكا جۇمىسى وزگە وڭىرلەرمەن سالىستىرعاندا كوش ىلگەرى. باس قالا كوشەلەرىنىڭ 90 پايىزدان استامى ۇلتتىق اتاۋلارعا يە. بىراق استانا قۇرىلىسى ۇزدىكسىز جۇرگىزىلىپ جاتىر. سوعان سايكەس جاڭا كوشەلەر سالىنىپ, شاھار تۇرعىندارىنىڭ ارتۋىنا بايلانىستى قاجەتتىلىككە ساي جاڭا مەكتەپتەر بوي كوتەرۋدە. جوبالىق كوشەلەر ساندارمەن بەلگىلەنىپ, كەيىن ولارعا ناقتى اتاۋلار بەرىلەدى. ورتا ءبىلىم بەرۋ ورىندارى دا سولاي.
اسىرەسە, سوڭعى جىلدارى استانادا كوپتەگەن كوشە مەن مەكتەپ اتاۋلارعا يە بولدى. اتاپ ايتقاندا, بىلتىردان بەرى وسى كۇندەرگە دەيىن جەتپىسكە جۋىق كوشەگە كورنەكتى تۇلعالار مەن جەر-سۋ اتتارى, جيىرماعا تارتا مەكتەپكە, ەكى مادەني وشاققا بەلگىلى ادامداردىڭ ەسىمدەرى بەرىلدى. تاۋەلسىزدىكتىڭ 30 جىلدىعى جانە تۇلعالاردىڭ مەرەيتويلارىنا وراي قارقىن العان بۇل جۇمىس ءالى دە جالعاسىپ جاتىر. قالا قۇرىلىسىنىڭ بارىسىنا قاراي دا توقتامايدى. جۇمىس جۇرگىزىلىپ جاتقان سوڭ, ماسەلەلەر دە تۋىنداماي قويمايدى.
جاقىندا استانا قالاسى ءماسليحاتىندا كوشە اتاۋلارىنا بايلانىستى كوپشىلىك تىڭداۋلار ءوتتى. وندا قالالىق تىلدەردى دامىتۋ جانە ارحيۆ ءىسى باسقارماسىنىڭ باسشىسى ساكەن ەسىركەپ قالانىڭ ونوماستيكا كوميسسياسى تاياۋدا ماقۇلداعان جاڭا كوشەلەردىڭ اتاۋلارىمەن تانىستىردى.
تالقىلاۋ بارىسىندا قالالىق ءماسليحات حاتشىسى ەرلان كاناليموۆ ورىندى ماسەلەنى كوتەردى. ول تۇلعالاردىڭ اتىنا كوشە بەرگەندە سول كوشەنىڭ بويىنا ءتيىستى تۇلعا تۋرالى اقپاراتتى ورنالاستىرۋ كەرەكتىگىن, الەمدىك تۇلعا ءال-فارابيگە كەزىندە قالانىڭ ونەركاسىپتىك ايماقتان, شاھاردىڭ شەتىنەن كوشە بەرىلگەنى دۇرىس ەمەستىگىن ايتتى.
شىنىندا, بەلگىلى ءبىر تۇلعانىڭ اتىنا كوشە بەرۋگە شەشىم شىعارعاندا, ونىڭ تاريحتا الاتىن ورنىنا, ەلگە سىڭىرگەن ەڭبەگىنە قاراپ بەرگەن ءجون. بۇل تاراپتا بۇرىنىراقتا ولقىلىقتار ورىن الماي قالعان جوق. كەيبىرىنە شولاق نەمەسە شەتكى ايماقتان كوشە بۇيىرعان. ءال-فارابي داڭعىلى دا وسىلايشا قالانىڭ شەتىنە كەتىپ قالعان. ساكەن ەسىركەپتىڭ ايتۋىنشا, بۇل كەمشىلىكتى تۇزەۋ ءۇشىن ءتيىستى ارەكەتتەر جاسالىپ جاتىر.
ونىڭ سوزىنشە, وتكەن جىلى اتالمىش باسقارما ءبىر ءىستى قولعا الىپ, قالانىڭ نەگىزگى كوشەلەرىنىڭ بارلىق ايالدامالارىنا QR-كود ورنالاستىردى. سول ارقىلى كوشەگە اتى بەرىلگەن تۇلعا تۋرالى ءۇش تىلدە 1,5 مينۋتتىق اقپارات الۋعا بولادى. الداعى ۋاقىتتا بۇل جۇمىس تۇرعىن الاپتاردا دا جالعاسادى.
«جەلەزنودوروجنىي» تۇرعىن الابىندا قازاقتان شىققان تۇڭعىش عارىشكەر, حالىق قاھارمانى توقتار اۋباكىروۆتىڭ اتى بەرىلگەن كوشە بار. قالالىق ءماسليحات دەپۋتاتى گۇلجامال جاپاروۆانىڭ پىكىرىنشە, بۇل كوشە باتىر اتىنا لايىق ەمەس. ۇزىندىعى 400 مەترگە دە جەتپەيدى, ونىڭ ۇستىنە شەتكى ايماقتا ورنالاسقان.
سول وتىرىستا مەكتەپ اتاۋلارى كۇن تارتىبىنە شىعارىلماسا دا, ءماسليحات دەپۋتاتى ازامات ايتحوجين قالاداعى №20 مەكتەپكە شاكەن ايمانوۆتىڭ اتىن بەرۋگە قارسى شىقتى.
– شاكەن ايمانوۆ – قازاق كينەماتوگرافياسىن كوتەرگەن ءبىرتۋار ازاماتتىڭ ءبىرى, ماقتانىشىمىز. نەگە №20 مەكتەپكە اتىن بەرىپ وتىرمىز؟ ول مەكتەپتىڭ قايدا ەكەنىن بىلەسىزدەر مە؟ قالانىڭ سىرتىندا, ورىس تىلىندە وقىتاتىن مەكتەپ, – دەدى ءماسليحات دەپۋتاتى.
ساكەن ەسىركەپتىڭ ايتۋىنشا, مەكتەپتەرگە اتاۋ بەرۋ ءۇشىن كورنەكتى تۇلعالاردىڭ ءتىزىمى جاسالىپ, قالالىق ءبىلىم باسقارماسىنا جىبەرىلدى. ال اتالمىش باسقارما مەكتەپتەرگە تاراتتى. ورتا ءبىلىم بەرۋ ورىندارىنا سول تىزىمنەن ءوزىنىڭ باعىتىنا كەلەتىن تۇلعانى تاڭداۋ ەركى بەرىلگەن. وسىلايشا شاكەن ايمانوۆتىڭ اتىن الۋعا №20 مەكتەپ قانا نيەت تانىتقان. الداعى كۇندەرى مەكتەپتەرگە اتاۋ بەرۋ ماسەلەسى ءماسليحاتتىڭ قاراۋىنا شىعارىلادى. ونىڭ اراسىندا №20 مەكتەپ تە بار.
ەلىمىزدەگى كينووندىرىستىڭ بىردەن-ءبىر وشاعى «قازاقفيلم» اق شاكەن ايمانوۆتىڭ اتىندا ەكەنى بەلگىلى. نەگىزى, كينو مەن تەاتر مايتالمانىنىڭ ەسىمى جاس ۇرپاقتى ونەرگە باۋليتىن جوعارى وقۋ ورنىنا بەرىلسە دە, ارتىق ەمەس. استاناداعى قازاق ۇلتتىق ونەر ۋنيۆەرسيتەتى قازاق كينوسىنىڭ اتاسى, تەاتر تارلانى شاكەن ايمانوۆتىڭ اتىن يەلەنسە, قۇبا-قۇپ. وسى جاعىن قولعا الۋ كەرەك دەپ ەسەپتەيمىز. كينو مەن تەاتر, مۋزىكا ماماندارىن دايىندايتىن ەلورداداعى جوعارى وقۋ ورنى ونىڭ اتىن السا, ۇتپاسا, ۇتىلمايدى. ال ەندى شاكەن ايمانوۆ كوشەسى دە قىپ-قىسقا. ونىڭ كەلىنى, (كاۋكەن كەنجەتاەۆتىڭ جارى) اتاقتى ءانشى – شابال بەيسەكوۆا كوشەسى ودان ون ەسەدەي ۇزىن. بۇل ءوزى داستۇرگە دە, ءجون-جوباعا سايكەس كەلىپ تۇرعان جوق-اۋ…
