الەۋمەتجاڭالىقتار
بالالاردى شاتتىققا بولەدى
قازاقستان كاسىپوداعىنىڭ 110 جىلدىعى اياسىندا استانا قالالىق بالالار ۇيىندە «جۇرەكتەن – جۇرەككە» اتتى قايىرىمدىلىق اكتسياسى ءوتتى.
بۇگىندە اتالعان مەكەمەدە 162 بالا تاربيەلەنۋدە. اكتسيا كەزىندە تاربيەلەنۋشىلەردىڭ سپورتپەن شۇعىلدانىپ, ۋاقىتتارىن ءتيىمدى وتكىزۋلەرى ءۇشىن ۆەلوسيپەد پەن وزگە دە سپورتتىق سايماندار, سونىمەن بىرگە پلانشەتتەر سىيعا تارتىلدى.
ن.التاي, ق.قىرىقباەۆا, ر.ساتاەۆ سىندى انشىلەر مەن ءى.راحمانقۇلوۆ, ي.وۆسەيچيك سياقتى سيقىرشىلار جانە ولەگ, ارتەم, ماگومەد ەسىمدى بيشىلەر ءوز ونەرلەرىمەن قايىرىمدىلىق اكتسياسىنا ۇلكەن قولداۋ كورسەتتى.
مادەني شارانىڭ ەكىنشى ءبولىمى «اق بوتا» قۋىرشاق تەاترىنىڭ قويىلىمىمەن جالعاسىن تاپتى. مۇندا 10 جاسقا دەيىنگى بۇلدىرشىندەر «ءوتىرىكشى» جانە «دىمبىلمەس» ەرتەگىلەرىن تاماشالاپ, تانىمال مۋلت كەيىپكەرلەرىنىڭ قىزىقتى ويىندارىنا قانىعىپ, شەكسىز قۋانىشقا كەنەلدى.
ۇ. شوراەۆا