ءبىرىنشى جەلتوقسان
ماڭگىلىك ەلدى باقىتقا باستاعان كۇن
2011 جىلدىڭ جەلتوقسان ايىنىڭ 10 جۇلدىزىندا قازاقستان رەسپۋبليكاسى پارلامەنتىنىڭ سەناتى «قازاقستان رەسپۋبليكاسىنداعى مەرەكەلەر تۋرالى» زاڭعا تولىقتىرۋلار مەن وزگەرىستەر ەنگىزۋ ارقىلى 1 جەلتوقساندى تۇڭعىش پرەزيدەنت كۇنى ەسەبىندە بەلگىلەپ, بۇل كۇن مەملەكەتتىك مەرەكەلەر ساناتىنا ەنگىزىلگەن ەدى.
ءوز تاۋەلسىزدىگىنىڭ ەكى ون جىلدىعىنان استام ۋاقىتتا ەگەمەن ەل بولۋدى قالىپتاستىرعان جانە دە قالىپتاستىرىپ قانا قويماي, تاريحتىڭ وسى ءبىر اسا قىسقا مەرزىمىندە ءوزىن الەمگە تانىتا العان مەملەكەتتىڭ ەندىگى تاريحىنان بۇل كۇن, ياعني, جەلتوقساننىڭ ءبىرى ويىپ تۇرىپ ءوز ورنىن الۋى كەرەك ەدى. سولاي بولدى دا! كونە تاريحتىڭ الميساقتان بەرگى قاعيدالارىنا سايار بولساق, تىرشىلىك جارالعاننان كەيىنگى بار ۋاقيعالاردىڭ باسىندا تۇلعالار تۇرعان. ال ەندى قازاق ەلىنىڭ عاسىرلار بويى ارمان بولعان تاۋەلسىزدىگىن جانە سوعان جەتۋ جولىندا بىرنەشە عاسىردىڭ ءجۇزدەگەن جىلدارىنىڭ قاسىرەتى مەن زوبالاڭىن, تار جول, تايعاق كەشۋىن باسىنان وتكەرگەن حالىقتىڭ تاعدىرىن انىقتاپ, تۇتاس ءبىر ەلدىڭ, ءدۇيىم ءبىر حالىقتىڭ سول تاۋەلسىزدىگىن ءوزى جاريالاپ, سول تاۋەلسىزدىكتىڭ كوك بايراعىن ءوز قولىمەن تۇڭعىش كوتەرگەن قازاقستان رەسپۋبليكاسىنىڭ پرەزيدەنتى نۇرسۇلتان ءابىشۇلى نازارباەۆ سىندى تاريحي تۇلعانىڭ ەرلىگى مەن ۇلىلىعى قازاق تاريحىنىڭ عانا ەمەس, جالپى ادامزات بالاسى تاريحىنىڭ بەتتەرىنە التىن ارىپتەرمەن جازىلىپ قويىلعانى بار.
ءبىز كۇشتى پرەزيدەنتتىك مەملەكەت قۇرۋ تاڭداۋىن وتە دۇرىس جاساعانىمىزدى ەل تاۋەلسىزدىگىنىڭ ءار جىلدارىنىڭ ءار كەزەڭدەرىندە ايقىن سەزىنىپ كەلە جاتىرمىز. ەڭ اۋەلى «باس-باسىنا بي بولۋدان» ادا تۇردىق, بۇل ەلىمىزدىڭ الەمدىك داعدارىستاردىڭ ەڭ ءبىر اۋىر دا سىندارلى كەزەڭدەرىندە تۇراقتى دامۋىن قامتاماسىز ەتۋگە زور ىقپالىن تيگىزدى, ءالى دە تيگىزىپ كەلە جاتىر. قازاقستانداعى پرەزيدەنتتىك بيلىك جۇيەسى 1990 جىلعى 24 ساۋىردە ەنگىزىلدى دە, 1991 جىلعى 1 جەلتوقساندا تۇڭعىش رەت پرەزيدەنت سايلاۋى وتكىزىلدى. ءسويتىپ, ءبىز بارشا قازاقستاندىقتار ءوز پرەزيدەنتىمىزدى ءوزىمىز سايلاپ الۋ قۇقىمىزدى تۇڭعىش رەت جۇزەگە اسىرىپ, ەلىمىزدىڭ دەموكراتيالىق قاعيدالارعا بەرىك ەكەندىگىن الەم الدىندا تاعى دا ءبىر كورسەتىپ بەرگەن ەدىك.
ءسويتىپ, 1 جەلتوقسان – تۇڭعىش پرەزيدەنت سايلاۋىندا قازاقستان رەسپۋبليكاسىنىڭ تۇڭعىش پرەزيدەنتى نۇرسۇلتان ءابىشۇلى نازارباەۆتىڭ بارشا قازاقستاندىقتاردىڭ زور سەنىمىنە يە بولعان كۇنى. تۇتاس ەل مەن حالىقتىڭ سەنىمىنە يە بولۋ ارقىلى ەلباسى وزىنە جۇكتەلگەن بار جاۋاپكەرشىلىكتى ايقىن سەزىنە وتىرىپ, ءوز ەلى مەن حالقىنىڭ تاعدىرىن انىقتاۋدا ءوزىنىڭ پەرزەنتتىك تە, پرەزيدەنتتىك تە بورىشىن ادال اتقارىپ كەلەدى.
«قازاق ەلىن, قازاق دەگەن ۇلتتى الەم ەڭ اۋەلى نازارباەۆ ەسىمى, نازارباەۆ كەلبەتى ارقىلى تانىدى. بۇل – تاريحي اقيقات» دەگەن نەمەسە «نازارباەۆ نەنى بولسا دا ەلىمەن بىرگە كوردى, ەلىمەن بىرگە ءتوزدى, ەلىمەن بىرگە جەڭدى!» دەگەن بۇدان بۇرىن ايتقان ويلارىمىزدى تاعى دا ءبىر قايتالايمىز. ەلباسىنىڭ قازاق ەلى تاريحىنداعى اسا ماڭىزدى ورنىن قازىر دە, بولاشاقتا دا انىقتاپ تۇراتىن ءبىر كۇن قازاق تاريحىندا بولۋى كەرەك ەدى, سول ءبىر كۇن 1 جەلتوقسان بولىپ تاريحتىڭ جىلدار جىلناماسىنان ورىن الدى.
ءبىز 1 جەلتوقساندى قازاقستان رەسپۋبليكاسىنىڭ تۇڭعىش پرەزيدەنتى نۇرسۇلتان نازارباەۆتىڭ قازاق ەلىن ماڭگىلىك ەل ەتۋ ارمان-مۇددەسىنىڭ جۇزەگە اسىرىلا باستاعان كۇنى دەپ تە قاستەرلەۋگە ءتيىستىمىز.
ويتكەنى, ماڭگىلىك ەل بولۋ بۇگىنگى ءبىزدىڭ جانە بىزگە دەيىنگى تالاي ءبىر عاسىرلار يىنىندەگى «ەلىم-ايلاپ» وتكەن اتا-بابالارىمىزدىڭ دا اڭسار ارمانى مەن زار تىلەگى ەدى. ەلباسى نۇرسۇلتان نازارباەۆتىڭ ماڭگىلىك ەل قۇرۋ جونىندەگى وسى ويى مەن ارمان-مۇددەسىنىڭ تاريحي ماڭىزدىلىعىن ءبىز تولىق سەزىنە الىپ وتىرمىز با؟ ەلورداسى استانا قالاسىندا «ماڭگىلىك ەل» مونۋمەنتتى قاقپاسى نەگە تۇرعىزىلدى؟ قازىر ارقايسىمىزدى وسى ءبىر ساۋالدار ويلاندىرىپ, ءبىزدىڭ سوعان قايتارار جاۋابىمىز كوكىرەكتە سايراپ تۇرۋعا ءتيىستى. ەلباسى ارقالاعان ەل جۇگىن بىرگە كوتەرىپ, ەل بىرلىگىن ساقتاۋ ارقىلى ءبىز ءوزىمىزدىڭ ماڭگىلىك ەل بولا الاتىندىعىمىزدى كۇن سايىنعى ىسىمىزبەن دە, ءبىلىم, بىلىكتىلىگىمىزبەن, قارىم-قابىلەتىمىزبەن دە كورسەتە بىلەر كەز قازىر. نۇرسۇلتان نازارباەۆ ءوزىنىڭ پرەزيدەنتتىك قىزمەتىندە قازاق ەلىن ماڭگىلىك ەل ەتۋدىڭ بارلىق جاعدايلارىن دا, سونىڭ بارلىق العىشارتتارىن دا جاساپ بەردى, ءالى دە جاساپ كەلەدى. سول ماڭگىلىك ەل بولۋدىڭ ءبىر العىشارتى سانالاتىن «قازاقستان-2030» ستراتەگياسى – ەلباسىنىڭ الىستى اڭداعان, بولاشاقتى بولجاعان, كەلەشەككە كورەگەندىلىكپەن كوز تىككەن, بۇگىنىمىزگە بەل شەشىپ, ەرتەڭىمىزگە ەڭسەمىزدى تىكتەپ بارار جولىمىز.
ءبىز 1 جەلتوقساندى قازاقستاننىڭ تۇڭعىش پرەزيدەنتى نۇرسۇلتان نازارباەۆتىڭ قازاق ەلىن الەمنىڭ دامىعان 50 ەلىنىڭ قاتارىنا قوسۋعا, باسەكەگە قابىلەتتى بولۋعا باستاعان كۇنى دەپ تە سانايمىز.
بۇل ەلباسىنىڭ باعزى كوشپەندىلەردىڭ تالايلى تاريحتىڭ قيلى-قيلى كەزەڭدەرىنىڭ تاۋقىمەت قۇدىعىنىڭ سۋىن ءىشىپ, اششىلى سورتاڭىنىڭ كەرمەگىن تاتقان زوبالاڭ جىلداردىڭ زارىن تارتقان, تارشىلىقتان تارىلىپ تۇرالاعان, جوقتىقتان اشىعىپ بۇراتىلعان, جازىقسىز جارالانعان, ايىپسىز ايدالعان بۇگىنگى ۇرپاقتارى, مىنا بىزدەردى مىنا ءدۇبىرلى الەمنىڭ الامانىنا قوسقان قايىرلى كۇنى دەپ تە بىلەمىز. بۇگىنگى بىرەگەي دۇنيەنىڭ ءبىرتۇتاس ەكونوميكالىق جۇيەسىندە نۇرسۇلتان نازارباەۆ تالماي تاڭداپ, ۇسىنىقتى دا ۇتىمدى قالىپتاستىرا بىلگەن قازاقستاننىڭ وزىندىك دامۋ جولى نەبىر سىندارلى كەزەڭدەردە ءوزىنىڭ ومىرشەڭدىگىن كورسەتە الدى. الەمدىك ەكونوميكانىڭ ىرگەسىن قايتا-قايتا شايقاپ تۇرعان بۇگىنگى قارجى داعدارىسىنا دەس بەرمەي كەلە جاتقان قازاقستاننىڭ قازىرگى جاعدايى بىزگە وسىنى ايتقىزادى. بۇعان دەيىن ەكونوميكالىق الەۋەتى ءجونىنەن ەشكىمگە جالىنان ۇستاتپايدى دەيتىن ەۋروپانىڭ ءبىراز ەلدەرى ابدىراپ, داعدارىپ قالعان وسى ءبىر تۇستا قازاقستان پرەزيدەنتىنىڭ ەلدى يننوۆاتسيالىق جانە يندۋستريالىق باعىتپەن دامىتۋ باعدارلاماسىن ۇسىنۋى ءارى مۇنى ەندىگى قازاقستاننىڭ بولاشاعى دەپ اتاپ كورسەتۋى, بۇل ۇلى مىندەتتەرگە بارشا قازاقستاندىقتاردى جۇمىلدىرۋى ماناعى ءبىز ايتقان ماڭگىلىك ەل بولۋ مۇراتىن تەرەڭىنەن سارالاپ, تاعى دا ءبىر ويلاستىرۋى دەر ەدىك.
ءبىز 1 جەلتوقساندى قازاقستاننىڭ تۇڭعىش پرەزيدەنتى نۇرسۇلتان نازارباەۆتىڭ بۇرىنعى وتار قازاق ەلىن ايداي الەمگە تانىتۋعا ۇمتىلىپ, الەمدىك ساياساتقا ولجا سالعان ۇپايلى كۇنى دەپ بىلەمىز.
قازاقستاننىڭ كەشەگى كەڭەستىك جۇيەنى بىلاي قويعاندا, تۇتاس تۇركى الەمىندە تۇڭعىش بولىپ ەۋروپاداعى قاۋىپسىزدىك جانە ىنتىماقتاستىق ۇيىمىنا توراعالىق ەتىپ, اۋزىن ايعا بىلەگەن الەمنىڭ نەبىر مەملەكەتتەرى ون ءبىر جىل بويى وتكىزە الماي كەلگەن, ءسويتىپ ارقاۋى بوساي باستاعان ەقىۇ-نىڭ جەتىنشى ءسامميتىن 2010 جىلدىڭ 1-2 جەلتوقسان كۇندەرى قازاق ەلىنىڭ استانا قالاسىندا وتكىزۋى جانە دە الەمدىك ماڭىزى بار بۇل تاريحي شاراعا قاتىسۋشىلاردىڭ استانا دەكلاراتسياسىن ءبىراۋىزدان قابىلداۋى قازاق ەلىنىڭ الەمدىك كوكجيەكتەن جۇلدىزىنىڭ جارقىراي جانعان ءساتى ەدى. «ءبىز ءبىرىن-ءبىرى جىلدار بويى كورمەي كەلگەن ەل باسشىلارىنىڭ باسىن قوسىپ, مامىلەگە كەلتىردىك. ەۋروپا مەن ازيا ۇعىمىن كەڭەيتتىك. ءبىز الدىمىزعا قويعان بارلىق مىندەتتى ورىندادىق. قازاقستان ۇيىمنىڭ جاڭا عاسىردا دامۋىنا سەرپىن بەرە الدى. بۇكىل الەم قازاقستانعا باسقاشا كوزبەن قاراپ, ءبىزدىڭ حالقىمىزدىڭ بارشا قۇندىلىقتارىن كوردى. ءسامميتتى وتكىزۋ بۇكىل قازاقستان حالقىنىڭ سالتاناتى, ونىڭ بىرلىگىنىڭ, بولاشاققا ۇمتىلىسىنىڭ دالەلى بولدى» دەپ ەلباسىنىڭ ءوزى اتاپ كورسەتكەنىندەي, بۇل تاريحي ءىس قازاقستاننىڭ تۇڭعىش پرەزيدەنتىنىڭ ءوز ەلىن دۇنيە جۇرتىنا ءسوزسىز مويىنداتا بىلگەن تاريحي جەڭىسى ەدى. استانا ءسامميتىن وتكىزۋ ارقىلى قازاق ەلى سان عاسىرلىق تاريحى بار الەمنىڭ دامىعان, وركەنيەتتى مەملەكەتتەرىنىڭ قاتارىنا بارىپ قوسىلىپ, جارقىن جۇزبەن نىق بارىپ تۇرا الدى دەپ باتىل ايتا الامىز. ءبىز سول بيىككە كوتەرىلگەن ەلمىز, ءبىزدى سول زاڭعار بيىككە الىپ شىققان دا ەلباسىمىز, ءوزىمىزدىڭ تۇڭعىش پرەزيدەنتىمىز!
ءبىز 1 جەلتوقساندى قازاقستان رەسپۋبليكاسىنىڭ تۇڭعىش پرەزيدەنتى نۇرسۇلتان نازارباەۆتىڭ ءححى عاسىردا جاھاندىق جاڭا قاتەرلەر بوي كوتەرە باستاعان الماعايىپ تۇستا ءتۇرلى ءدىندەردىڭ عاسىرلار بويعى ىزگى دە مول ءتاجىريبەسىن پايدالانا وتىرىپ, 2003, 2006 جانە 2009, 2012 جىلدارى استانا قالاسىندا الەمدىك جانە ءداستۇرلى دىندەر ليدەرلەرىنىڭ كەزدەسۋلەرىن تۇراقتى وتكىزىپ, ادامزاتتىڭ جاڭا مىڭجىلدىعىنىڭ كونفەسسياارالىق ديالوگ پەن كەڭەسىن قۇرۋعا جول اشىلعان, وركەنيەتتىڭ قازاق جەرىندەگى توعىسۋى مەن تابىسۋلارىنىڭ باستاۋ العان كۇنى دەپ تە سانايمىز.
ءبىز 1 جەلتوقساندى قازاقستان رەسپۋبليكاسىنىڭ تۇڭعىش پرەزيدەنتى نۇرسۇلتان نازارباەۆتىڭ كەڭەستەر وداعىنىڭ ىدىراۋىنا بايلانىستى دۇنيە قايتا ءبىر بولىسكە ءتۇسىپ, جاڭا قاقتىعىستار وشاعىنداعى ساياسات قازانى بۇرق-سارق قايناپ جاتقاندىعىنا قاراماستان قازاق جەرىندەگى سەمەي اتوم سىناق پوليگونىن ءوز جارلىعىمەن جاۋىپ, يادرولىق قارۋدان ءوز ەركىمەن باس تارتۋىن باتىل دا ىزگى قادامنىڭ باستالعان كۇنى ساناي وتىرىپ, ءوز ەلباسىمىزدى يادروسىز الەم قۇرۋدىڭ باس ارحيتەكتورىنا بالايمىز.
«نيۋ-يورك تايمستىڭ» ەلەكتروندى نۇسقاسىندا جانە «ەگەمەن قازاقستان» گازەتىندە (27 ناۋرىز 2012 جىل) جاريالانعان ەلباسى نۇرسۇلتان نازارباەۆتىڭ «قاۋىپسىز يادرولىق بولاشاققا جول سالا وتىرىپ» اتتى ماقالاسىندا: «مەن بارلىق ەلدەرگە تومەندەگىشە ۇندەۋ تاستاعىم كەلەدى: قازاقستان تاجىريبەسى كورسەتىپ وتىرعانىنداي, ەلدەر يادرولىق قارۋدان باس تارتسا, ۇلكەن پايداعا كەنەلەدى. وسىنداي وڭ شەشىمىمىزدىڭ ارقاسىندا ءبىزدىڭ ءوسىپ-وركەندەگەن جانە تۇراقتى دامىعان ەلگە اينالعانىمىزعا, الەمدە كوپتەگەن دوستار تاپقانىمىزعا, ىقپالىمىزدىڭ دا ارتا تۇسكەنىنە مەن ەش كۇماندانبايمىن. بىزگە ءوزىمىزدىڭ بارلىق ەرىك-جىگەرىمىزدى پايدالانىپ, باسقا پروبلەمالاردى شەشۋگە جانە يادروسىز ەلدەرگە وزدەرىن قورعالىپ وتىرعانداي سەزىنۋگە كومەكتەسۋىمىز كەرەك. بۇل يادرولىق قارۋدىڭ تارالۋىن بولدىرماۋدىڭ جالعىز جولى بولسا, ول ءوز كەزەگىندە ءولىم سەبەتىن ماتەريالدىڭ تەررورشىلاردىڭ قولىنا ءتۇسۋ ىقتيمالدىلىعىن ازايتادى. بۇل – ءبىز ەش جول بەرۋگە بولمايتىن تاۋەكەل. بىزدەر, قازاقستاندىقتار, يادرولىق قارۋ قاتەرى الاستالاتىن الەم قۇرۋعا كومەكتەسۋگە قولدان كەلگەننىڭ ءبارىن جاسايمىز دەپ سەندىرە الامىن», – دەپ ايتقاندىعى ءبىزدىڭ «ءوز ەلباسىمىزدى يادرولىق الەم قۇرۋدىڭ باس ارحيتەكتورى» دەگەن پىكىرىمىزدى نىقتاي تۇسكەندىگى بار.
ءبىز 1 جەلتوقساندى قازاقستان رەسپۋبليكاسىنىڭ تۇڭعىش پرەزيدەنتى نۇرسۇلتان نازارباەۆتىڭ حح عاسىردىڭ سوڭعى ون جىلدىعىندا باعىتى بارىنشا وزگەرiپ, ساياسي جۇيەسi ءالi قالىپتاسىپ بولماي جاتقان ءولiارا تۇستا قازاقستان سياقتى الىپ ەلدiڭ استاناسىن جاڭا ورىنعا كوشiرiپ الىپ كەلiپ, ەسىلدىڭ بويىنا ەل قوندىرىپ, العاشقى قازىعىنان باستاپ ءوزى قاعىپ, بۇگىنگى ايدىندى دا ايبىندى اقوردالى استانانى دۇنيەگە اكەلگەن, ءسويتىپ ءوز ەلى مەن ءوز حالقىنا دەگەن شەكسىز سۇيىسپەنشىلىگىنىڭ بەلگىسىندەي ەتىپ قاسيەتتى قازاق جەرىنە داڭعايىر دالاسىنا تۇتاس الەمدى قوندىرىپ, ورنىقتىرا بىلگەن, ماڭگىلىك ەل بولا الاتىندىعىمىزعا ەڭ اۋەلى ءوز جۇرتىنىڭ, ودان قالدى الەم جۇرتشىلىعىنىڭ كوزدەرىن جەتكىزىپ, يلاندىرا بىلگەن ءبىر ۇلى كۇننىڭ جاسامپازدىعىنىڭ سالتاناتى دەپ تە تانيمىز!
ءبىز 1 جەلتوقساندى قازاقستان رەسپۋبليكاسىنىڭ تۇڭعىش پرەزيدەنتى نۇرسۇلتان نازارباەۆتىڭ قازاق تاريحىنداعى «قاسىم حاننىڭ قاسقا جولى», «ەسىم حاننىڭ ەسكى جولى» سياقتى جاڭا ءداۋىردىڭ كەزەڭىندەگى «نۇرسۇلتاننىڭ نۇرلى جولىمەن» جارقىن بولاشاققا باستاعان تاريحي كۇنى دەپ ارداقتايمىز.
تۇڭعىش پرەزيدەنتىمىزدىڭ قازاقستان تاريحىندا تۇڭعىش رەت ەل شەكاراسىن انىقتاپ, ونى زاڭداستىرۋى ەجەلگى قازاق ەلىنىڭ تاعدىرىن انىقتاعان كورەگەندىگى بولسا, ەۋرازيا ءبىرتۇتاس كەڭىستىگىن قالىپتاستىرۋداعى جانە شانحاي ىنتىماقتاستىق ۇيىمىن قۇرۋداعى باستاماشىلدىعى جالپى الەم تىنىشتىعىن, ادامزات بىرلىگىن ساقتاپ قالۋداعى عالامدىق ماڭىزى بار ىستەرى ەدى. سونداي-اق, قازاقستاننىڭ يسلام ىنتىماقتاستىعى ۇيىمىنا توراعالىق ەتۋىن دە الەمنىڭ قازاق ەلىنە, ونىڭ كوشباسشىسى نۇرسۇلتان نازارباەۆقا العاۋسىز بەرىك سەنىمى دەپ قاراعانىمىز دا ابزال.
ءبىز تۇڭعىش پرەزيدەنتىمىزدىڭ بۇگىنگى داعدارىستان تولقىپ تۇرعان مىناۋ دۇنيە دارياسىنىڭ ساپىرىلىسقان سەلى مەن سەڭىنەن, داۋىلى مەن داۋىنان ءوزىنىڭ تۋعان ەلى مەن حالقىن امان الىپ ءوتۋدىڭ بار امالىن جاساپ وتىرعاندىعىن, ول ءۇشىن بولاشاقتا نە ىستەپ, نە قويۋ قاجەتتىلىگىن دە ۇزبەي ايتىپ كەلە جاتقاندىعىنا سۇيسىنۋگە ءتيىستىمىز. ەلباسى ءوزىنىڭ «قازاقستاننىڭ الەۋمەتتىك جاڭعىرتىلۋى: جالپىعا ورتاق ەڭبەك قوعامىنا قاراي 20 قادام» اتتى ماقساتتى سوزىمەن ەلدى ەڭبەك ەتە بىلۋگە ۇندەۋدى, نازارباەۆ ۋنيۆەرسيتەتىندە وقىعان لەكتسياسىندا دا ءبىزدىڭ ەندىگى تاعدىرىمىزدى ءبىلىمدى ۇرپاقتىڭ ايقىندايتىندىعىن ايتا وتىرىپ, تاعى دا ينتەللەكتۋالدىق ۇلت قالىپتاستىرۋدىڭ ماقساتتى مۇراتىن العا تارتتى. وسى ارادا ەلدىڭ جايىن دا, جاعدايىن دا ەلباسىداي ويلايىق دەگەن ءبىر اۋىز ءسوزدىڭ كوكەيگە قونعانى بولدى. تارپاڭ دا تالايلى تاعدىرى مەن تامىرلى تاريحى ءبىرتۇتاس تۇركى الەمى نازارباەۆتى ءوز كوشباسشىمىز رەتىندە تانىپ, قۇرمەت تۇتىپ, ارداقتاپ وتىر. ەلباسىنىڭ جالپى ادامزات وركەنيەتى مەن تىرشىلىگىن ساقتاپ قالۋداعى اقىلدى, پاراساتتى قادامى – قازىرگى ىستەرى اسىققان اپتالارعا جىلجىعان ايلار مەن جىلدارعا ۇلاسقان سايىن ءوزىنىڭ ماڭگىلىك بەينەسىمەن اسقاقتاي تۇسەدى.
ەندى بۇگىنگى بۋىن, كەلەر ۇرپاق جىلدار كوشى ۇزاعان سايىن ماڭىزى ارتار 1 جەلتوقساندى قازاقستان رەسپۋبليكاسىنىڭ تۇڭعىش پرەزيدەنتى كۇنىن ءححى عاسىردىڭ الىپ تا كورنەكتى تۇلعاسى نۇرسۇلتان نازارباەۆتىڭ قازاق ەلىن ماڭگىلىك ەل بولۋعا باستاعان كۇنى دەپ تە اسپەتتەي بەرەتىندىكتەرىنە بەك سەنىمدىمىز.
بەدەلسوز
ءسىزدىڭ كوشباسشىلىعىڭىزبەن قازاقستان بيىك بەلەستەرگە جەتتى. ءسىزدىڭ جەڭىسىڭىز – ءسىزدىڭ باسشىلىعىڭىزداعى ەلدىڭ, قازاقستان حالقىنىڭ زور سەنىمىنىڭ كورىنىسى.
پاكستان قازاقستانمەن ەكىجاقتى قارىم–قاتىناستارىنا ۇلكەن ءمان بەرەدى. مەن ءبىزدىڭ ەلدەرىمىز اراسىنداعى دوستىق بايلانىستارىمىزدىڭ ودان ارى دا تەك نىعايا تۇسەتىنىنە سەنەمىن.
اسيف ءالي زارداري,
پاكستان يسلام رەسپۋبليكاسىنىڭ پرەزيدەنتى (2008-2013)
جابال ەرعاليەۆ,
جازۋشى,قر پارلامەنتى سەناتىنىڭ دەپۋتاتى