ەلباسى وليمپيادا چەمپيوندارى مەن جۇلدەگەرلەرىن ماراپاتتاۋعا ارنالعان سالتاناتتى راسىمگە قاتىستى
ءراسىمدى اشقان مەملەكەت باسشىسى بارشا قازاقستاندىقتاردى ۇلتتىق قۇرامانىڭ ريو-دە-جانەيروداعى حححI جازعى وليمپيا ويىندارىندا تابىستى ونەر كورسەتۋىمەن قۇتتىقتادى.
– ءبىزدىڭ سپورتشىلارىمىزدىڭ وليمپياداداعى مەدالدارى, جوعارى سپورتتىق ناتيجەلەرى مەن جەتىستىكتەرى قازاقستان تاۋەلسىزدىگىنىڭ الداعى 25 جىلدىعىنا لايىقتى سىي بولىپ سانالادى. سىزدەر ءبىزدىڭ ەلىمىزدىڭ حالىقارالىق سپورتتاعى مارتەبەسى بيىكتىگىن دالەلدەپ, جاتتىقتىرۋشىلار مەن جانكۇيەرلەردىڭ عانا ەمەس, بارشا قازاقستاندىقتاردىڭ ءۇمىتىن اقتادىڭىزدار, – دەدى نۇرسۇلتان نازارباەۆ.
قازاقستان پرەزيدەنتى وتكەن وليمپيادادا ءبىزدىڭ قۇرامانىڭ ءتۇرلى دارەجەدەگى 17 مەدالدى يەلەنگەنىن اتاپ ءوتتى.
– بۇل – قازاقستاننىڭ الەمدىك وليمپيادالىق قوزعالىسقا قاتىسۋ تاريحىنداعى باسقا وليمپيا ويىندارىنداعى جۇلدەلەردەن الدەقايدا كوپ. رەسمي ەمەس مەدالدىك ەسەپتە ءبىزدىڭ وليمپيادالىق قۇراما الەمنىڭ 207 ەلىنىڭ سپورتتىق قۇرامالارى ىشىندە 22-ورىندا تۇر. بارشامىز ريوداعى وليمپيادا تۇعىرىندا ەلىمىزدىڭ ءانۇرانى 3 رەت شىرقالىپ, تۋىمىزدىڭ 3 رەت ەڭ بيىكتە جەلبىرەگەنىنە ماقتانامىز. وسىلايشا, بوكسشى دانيار ەلەۋسىنوۆ, سۋعا جۇزۋدەن ەل تاريحىنداعى تۇڭعىش چەمپيون – دميتري بالاندين, اۋىر اتلەت نيجات راحيموۆ ەرەكشە جەتىستىكتەرگە جەتىپ, وليمپيادا جەڭىمپازى اتاندى. وليمپياداداعى تابىستىڭ ورتاق قورجىنىنا 5 كۇمىس جانە 9 قولا مەدال يەگەرلەرى مول ولجا سالدى, – دەدى مەملەكەت باسشىسى.
سونداي-اق, نۇرسۇلتان نازارباەۆ ۇلتتىق قۇرامانىڭ جاتتىقتىرۋشىلار قۇرامىنا, وليمپياداشىلاردىڭ وتباسىلارىنا جانە بارشا قازاقستاندىقتارعا سايىستا قولداۋ بىلدىرگەنى ءۇشىن, ال سپورتشىلارعا – ناعىز باسەكەدە كورسەتكەن ەرىك-جىگەرى مەن وليمپيادالىق داڭققا ۇمتىلىسى ءۇشىن العىس ايتتى.
قازاقستان پرەزيدەنتى ۇلتتىق قۇرامانىڭ جەتىستىكتەرى ريو-دە-جانەيرودا وتەتىن الداعى حV جازعى پاراليمپيا ويىندارىنا قاتىساتىن سپورتشىلارعا رۋح بەرەتىنىن ايتىپ, ولارعا تابىس پەن جوعارى ناتيجە تىلەدى.
ەلباسى قازاقستاننىڭ 25 جىل بەلەسىندە الەمدىك وليمپيادالىق قوزعالىسقا قاتىسقان اتلەتتەرىمىزدىڭ كوپتەگەن جارقىن جەڭىستەرگە قول جەتكىزگەنىن ايتتى.
– قازاقستاندىقتاردىڭ 2016 جىلعى جەڭىپ العان ماراپاتتارىن قوسقاندا ەلىمىزدىڭ وليمپيادالىق قازىناسىنداعى مەدال سانى 69-عا جەتتى. ءبىزدىڭ ەلىمىزدە 1992 جىلدان بەرگى جازعى جانە قىسقى وليمپيا ويىندارىندا جەڭىمپاز بولعان 19 وليمپيادا چەمپيونى, 22 كۇمىس جانە 28 قولا مەدال يەگەرلەرى بار. بۇل جوعارى جەتىستىكتەر – مەملەكەتتىڭ تۇراقتى قامقورلىعىنىڭ جانە سپورتتى دامىتۋعا جاعداي جاساۋدىڭ ناتيجەسى, – دەدى نۇرسۇلتان نازارباەۆ.
سوڭىندا قازاقستان پرەزيدەنتى بارشا قازاقستاندىقتاردى قول جەتكەن جەڭىستەرىمىزبەن قۇتتىقتاپ, الەمدىك سپورت بيىگىندە جاڭا تابىسقا جەتۋلەرىنە تىلەكتەستىك ءبىلدىردى.
ءسوز سويلەگەن وليمپيا ويىندارىنىڭ جەڭىمپازدارى مەن جۇلدەگەرلەرى جانە ءىس-شاراعا قاتىسۋشىلار مەملەكەت باسشىسىنا ەلىمىزدەگى سپورت پەن دەنە تاربيەسىن دامىتۋ ماسەلەلەرىنە ۇدايى قولداۋ كورسەتىپ, كوڭىل ءبولىپ وتىراتىنى ءۇشىن العىس ءبىلدىردى.
سونداي-اق, نۇرسۇلتان نازارباەۆ ءراسىم بارىسىندا وليمپيادا چەمپيوندارى مەن جۇلدەگەرلەرىنە مەملەكەتتىك ماراپاتتار تاپسىردى, دەپ حابارلايدى اقوردانىڭ ءباسپاسوز قىزمەتى.
