استانادا ەكى قولعا ءبىر كۇرەك تابۋ قيىن ەمەس. اي سايىن وتەتىن بوس جۇمىس ورىندارى جارمەڭكەسىندە كادر ءبولىمىنىڭ قىزمەتكەرلەرى جۇمىسسىزداردى وزدەرى ىزدەپ شىعادى. ماسەلەن, كۇنى كەشە م.وتەمىسۇلى اتىنداعى وقۋشىلار سارايىنا جينالعان 600-گە جۋىق قالا تۇرعىنى بىرنەشە جەرگە تۇيىندەمە قالدىرىپ, جۇمىس بەرۋشىلەرمەن تىكەلەي تىلدەسۋگە مۇمكىندىك الدى.
بۇل – جىل باسىنان بەرى جۇمىسپەن قامتۋ ورتالىعىنىڭ ۇيىمداستىرۋىمەن وتكەن جەتىنشى جارمەڭكە. مۇندا ءبىلىم بەرۋ مەكەمەلەرى, دەنساۋلىق ساقتاۋ ۇيىمدارى, قۇرىلىس فيرمالارى, ىشكى ىستەر ورگاندارى مەن قىزمەت كورسەتۋ كومپانيالارى سەكىلدى 50-دەن اسا جۇمىس بەرۋشى 500 ۆاكانسيا ۇسىندى. اتالمىش شارانىڭ ەڭبەك نارىعىنا قوسار ۇلەسى بارشىلىق. رەسمي مالىمەتتەرگە سۇيەنسەك, الدىڭعى جارمەڭكەلەردىڭ ارقاسىندا 222 ازامات تۇراقتى جۇمىسقا تۇرىپتى.
بوس ورىننىڭ كوبى قۇرىلىسشىلارعا, مەكتەپكە دەيىنگى مەكەمە تاربيەشىلەرىنە, دارىگەرلەرگە تيەسىلى. مىسالى, جاڭادان اشىلعان ءوندىرىس ورنى تەحنيكالىق ماماندارعا سۇرانىس ءبىلدىرىپ وتىر. «ءبىر ساعات ىشىندە شامامەن 30 ادام كەلدى. 15 شاقتى تۇيىندەمە قىزىقتىرىپ ۇلگەردى. باستى تالابىمىز – جوعارى ءبىلىم. ال تەحنولوگ, ينجەنەر-قۇرىلىسشىلاردىڭ ءوندىرىس ورنىنداعى ەڭبەك وتىلىنە مىندەتتى تۇردە قارايمىز» دەيدى راۋشان سەيتقاليەۆا ەسىمدى كادر ءبولىمىنىڭ قىزمەتكەرى. ونىڭ ايتۋىنشا, جارمەڭكەگە جارناما جەتىسپەيدى. ياعني, جۇمىسسىز جۇرگەن كاسىبي بىلىكتى مامانداردى كوپتەپ تارتۋ ءۇشىن قانداي ماماندىق بويىنشا بوس ورىندار بارىن استانالىقتارعا الدىن الا حابارلاۋ كەرەك دەگەن تىلەگىن ءبىلدىردى.
ال, اسكەري بيلەتى بار جانە زاڭ سالاسىنا قاتىستى جوعارى ءبىلىم العان ازاماتتار بۇل كۇنى استانا قالاسى ىشكى ىستەر دەپارتامەنتىنىڭ ۇستەلىنە كەزەككە تۇردى. ولارعا پوليتسەي, كينولوگ, جۇرگىزۋشى, ۋچاسكەلىك ينسپەكتوردىڭ كومەكشىسى, تەرگەۋشى, كريميناليست, جەدەل ۋاكىل سىندى قىزمەتكەرلەر قاجەت ەكەن. «وسى جەردەن قابىلداي سالمايمىز. اۋەلى اڭگىمەلەسۋگە شاقىرامىز. قۇجاتتارىن تۇگەندەيمىز. دارىگەرلىك تەكسەرۋگە جىبەرەمىز. فيزيكالىق دايىندىعىن, ءبىلىمىن سىنايمىز. قورىتىندىعا قاراپ كونكۋرستىق نەگىزدە تاڭدايمىز. ەگەر ەڭبەك ءوتىلى جوق جاس مامان بولسا, 3 اي تاعىلىمدامادان ءوتىپ, باستاپقى دايىندىق باعدارلاماسىن 2 اي وقيدى» دەيدى قادر ءبولىمىنىڭ باسشىسى, پوليتسيا پودپولكوۆنيگى مارات قوناقباەۆ.
جۇمىسپەن قامتۋ ورتالىعى حابارلاعانداي, بوس جۇمىس ورىندار جارمەڭكەسىنىڭ ناتيجەسىندە 223 ادام اڭگىمەلەسۋگە جىبەرىلدى. جالپى, بيىل 3 710 ادام جۇمىسقا ورنالاسقان. 1079-ى قوعامدىق جۇمىسقا كىرىستى, 540 ادام كاسىبي دايارلاۋ, قايتا دايارلاۋ جانە بىلىكتىلىكتى ارتتىرۋ كۋرستارىنان ءوتتى. بۇدان باسقا, 284 ادام جاستار پراكتيكاسىنا, 101 ادام الەۋمەتتىك جۇمىس ورىندارىنا جولداما الدى.
ءمادينا جاقىپ
