ەلوردالار ەندىگى

استانا. ەلوردادا نەگىزگى ەمحانالىق باعىتتاردى دامىتۋ ءۇشىن شەتەلدىك مامانداردى تارتۋ جۇمىستارى جۇرگىزىلىپ جاتىر. «رەسپۋبليكالىق نەيروحيرۋرگيا عىلىمي ورتالىعى» اق مەنتورلىق جونىندەگى جوبانى جۇزەگە اسىرۋ اياسىندا قازاقستاندىق دارىگەرلەر ءدارىس تىڭدادى. ءىس-شارا مەنتورلىق ينستيتۋتتى ەنگىزۋ ارقىلى مەديتسينا كادرلارىنىڭ كاسىبي دەڭگەيىن ارتتىرۋ جانە ودان ءارى دامىتۋ ماقساتىمەن وتكىزىلەدى.
لوندون. كەمبريدج حانشايىمى كەيت ميدلتون بريتان كورولدىگى مۇراگەرىن تاربيەلەۋدە بالا كۇتۋشىسىنىڭ كومەگىنە جۇگىنبەيدى. حانشايىم حانزادانى تاربيەلەۋگە ونىڭ اتا-اناسى كومەكتەسەتىنىن مالىمدەدى. نەمەرەلەرىنە جاقىن بولۋ ءۇشىن ولار ۋيليام مەن كەيتتىڭ كەنسينگتون سارايىنا كوشىپ كەلمەك.
بەيجىڭ. ەسىرتكى ساۋداسىمەن كۇرەس اياسىنداعى وپەراتسيا بارىسىندا پوليتسيا گۋاندۋن پروۆينتسياسىندا, سونداي-اق, گانكونگ پەن ماكاودا 1,8 مىڭنان استام ادامدى تۇتقىندادى. ۆۆس-ءدىڭ جازۋىنشا, وپەراتسيانى وتكىزۋ كەزىندە پوليتسيا قىزمەتكەرلەرى 2,5 مىڭ نىساندى تەكسەرگەن ەكەن. ولاردىڭ ىشىندە تۇنگى كلۋبتار مەن ماسساج سالوندارى بار. وسى ورايدا قۇقىق قورعاۋ ورگاندارى 5 ملن اقش دوللارىنا باعالانعان ەسىرتكى مەن زاڭسىز ونىمدەردى تاركىلەدى. قاماۋعا الىنعانداردىڭ ەڭ جاسى – 12-دە, ال ەڭ ۇلكەنى 95 جاستا كورىنەدى.
ۆاشينگتون. اقش-تىڭ ۆيردجينيا شتاتىندا العاش رەت بۇقالارمەن بىرگە جۇگىرۋ جارىسى ءوتتى. بۇل سايىس يسپانيانىڭ پامپلونا فەستيۆالىنىڭ امەريكالىق نۇسقاسى بولىپ تابىلادى. وسى قىزىقتى تاماشالاۋعا 5 مىڭنان استام كورەرمەن جينالعان.