ەسەبى ءتۇزۋدىڭ ەسەسى كەتپەيدى
جاقىندا «دۋمان» قوناق ءۇي كەشەنىندە «قازاقستان بۋحگالتەرلەرى مەن بۋحگالتەرلىك وداعى» كاسىبي بۋحگالتەرلەر ۇيىمى «قازاقستانداعى ەسەپ پەن سالىق سالۋدىڭ قازىرگى زامانعى جاعدايى» تاقىرىبىندا سەمينار وتكىزدى.
قارجىلىق قىزمەت نارىعىندا ون جىلدان اسا ەڭبەك ەتىپ كەلە جاتقان ۇيىم كەيىنگى كەزدە ارىپتەستەرىمەن ءىس-تاجىريبە الماسىپ, وي-پىكىر ءبولىسۋدى ۇردىسكە اينالدىرۋدا. مىنە, سول ءداستۇردى جالعاستىرىپ, ۇجىم ەلىمىزدىڭ بۋحگالتەرلەرى مەن اۋديتورلارى كۇنى مەرەكەسى قارساڭىندا سەمينار ۇيىمداستىرىپ وتىر.
اتالعان ءىس-شاراعا رەسپۋبليكانىڭ شارۋاشىلىق سۋبەكتىلەرىنىڭ قارجى باسشىلارى, ارناۋلى سەرتيفيكاتتارى بار بۋحگالتەرلەر جانە قازاقستان رەسپۋبليكاسى قارجى مينيسترلىگىندە تىركەلگەن وقۋ ورتالىقتارىنىڭ باسشىلارى قاتىستى.
باسقوسۋدا كاسىبي قارجىلىق ەسەپ جۇرگىزۋدەگى بۋحگالتەر قىزمەتىنىڭ ءمانى مەن ماڭىزى, الەمدىك كەڭىستىكتە قارجى ەسەبىن بىرىگىپ جۇرگىزۋ جانە بۋحگالتەرلەردى سەرتيفيكاتتاۋمەن اينالىساتىن ارناۋلى ۇيىمداردىڭ قارجى ەسەبى قىزمەتكەرلەرىنىڭ كاسىبي دەڭگەيىن كوتەرۋ ماسەلەلەرى ءتوڭىرەگىندە وي-پىكىرلەر ورتاعا سالىندى.