ادامزاتقا وراسان زيان كەلتىرگەن سۇراپىل سوعىستىڭ اياقتالۋىنا ءاربىر مايدانگەردىڭ قوسقان ۇلەسى زور. سولاردىڭ ىشىندە مەنىڭ اتام دا بار.
مەنىڭ اتام نۇرعازى ءجۇنىسۇلى – بۇرىنعى سەمەي وبلىسى اقسۋات اۋدانى ەرنازار اۋىلدىق كەڭەسىنە قاراستى جانتىكەي اۋىلىنىڭ تۋماسى. جيىرما توعىز جاسىندا 1941 جىلدىڭ جەلتوقسان ايىندا سوعىسقا شاقىرىلىپ, وسكەمەن قالاسىندا جاساقتالعان اتقىشتار ديۆيزياسىندا دايىندىقتان وتكەن. اتام نوۆوروسسيسكىدەگى كىشى جەردە ۇرىسقا قاتىسقان. ول مەرگەن بولعان. كوپتەگەن جاۋدىڭ كوزىن قۇرتىپ, ازاماتتتىق بورىشىن ادال اتقارىپتى.
كەيىننەن ونى بارلاۋشىلار روتاسىنا اۋىستىرىپتى. جاۋدىڭ جاسىرىنعان ورىندارىن تاۋىپ, بىرنەشە رەت ءتىل اكەلۋ وپەراتسياسىنا قاتىسقان. وسى ەرلىكتەرى ءۇشىن قانشاما مارتە ماراپاتقا ۇسىنىلعانىمەن, قۇجاتتارى بەكىتىلمەپتى.
1943 جىلدىڭ قاڭتار ايىندا اياعىنان جارالانىپ, اسكەري گوسپيتالعا تۇسەدى. كەيىننەن اتامدى تاشكەنتتەگى اسكەري گوسپيتالعا اۋىستىرىپ, ەمدەگەن. بىراق سوعىسقا جارامايتىن بولعان سوڭ, 1943 جىلدىڭ جازىندا ەلگە قايتارعان. اتام ەلگە سەرجانت اتاعىمەن ورالىپتى. ۇلى جەڭىستىڭ 10, 20, 30 جىلدىعىنا ارنالعان مەدالدارمەن ماراپاتتالعان. جەڭىستىڭ 40 جىلدىعىندا اتامدى «ءىى دارەجەلى وتان سوعىسى» وردەنىمەن ماراپاتتاعان.
اتام سوعىستان كەيىن كوكجىرا اۋىلىندا ۇزاق جىلدار بويى سالىق ينسپەكتسياسىنىڭ ينسپەكتورى بولىپ قىزمەت ىستەگەن. الماتى, سەمەي قالالارىندا سالىق كوميتەتىنىڭ ءبىلىم جەتىلدىرۋ كۋرستارىندا وقىعان. ءومىرىنىڭ سوڭعى جىلدارىندا ءارتۇرلى جۇمىستار اتقارعان.
اتامىز بەن اجەمىز سوعىستان كەيىن اۋىلعا جەر اۋدارىلعان نەمىستىڭ وتباسىنان جەتىم قالعان 9 جاسار يدا ەسىمدى قىزدى اسىراپ العان. يدا اتامىزدىڭ تەگىمەن نۇرعازينا بولىپ, كوكجىرا 7 جىلدىق مەكتەبىندە وقىدى. كەيىننەن تۇرمىسقا شىقتى. اتامىزدان تاراعان ۇرپاقتارىنىڭ ءبارى يدا اپامىزبەن جاقسى ارالاسىپ تۇرعان. كەيىننەن اپا- جەزدەمىز التاي ولكەسىنىڭ پاسپەليحا اۋدانىنىڭ مامونتوۆ اۋىلىنا كوشىپتى. يدا اپامىز وسىدان 4 جىل بۇرىن قايتىس بولدى. ارتىندا سەرگەي ەسىمدى ۇل, تانيا ەسىمدى قىز جانە كەلىن بالالارى بار. مەنىڭ اكەم جانە ونىڭ اعا-اپايلارى سەرگەيدىڭ وتباسىمەن بۇگىندە ارالاسىپ تۇرادى. يدادان بولەك اتام مەن اجەم 2 ۇل, 3 قىز تاربيەلەپ ءوسىردى. مەن اتامنىڭ كوزىن كورگەن جوقپىن. مەن ومىرگە كەلەردەن ءتورت جىل بۇرىن 1982 جىلى دۇنيەدەن وتكەن. ءبىز نەمەرەلەرى اتامىزدىڭ باتىر بولعانىن اكەلەرىمىزدەن ەستىپ وستىك.
ەندى سوعىس بولماسىن, اسپانىمىز اشىق, ەل ىرگەسى بەرىك بولعاي دەيمىز.
ەلتاي نۇرعازين
