جەڭىس كۇنى استانا قالاسىنداعى ورتالىق زيراتتا سوعىستا قازا تاپقان جاۋىنگەرلەر ەسكەرتكىشىنە «داڭق» گۇل تىزبەكتەرى قويىلدى.
اتالمىش شاراعا ۇلى وتان سوعىسى ارداگەرلەرى, ءدىن وكىلدەرى, اسكەري بولىمدەردىڭ ساربازدارى, ەلوردا اكىمدىگىنىڭ قىزمەتكەرلەرى مەن قازا تاپقان جاۋىنگەرلەردىڭ تۋىستارى جينالدى.
جيىندا ۇلى وتان سوعىسىنىڭ ارداگەرى الەكسەي فرولوۆ ءسوز الىپ, وسى كۇنگە امان جەتكەن مايدانداستارىن مەرەكەلەرىمەن قۇتتىقتادى.
– جەڭىس بىزگە وڭاي كەلگەن جوق. قانشاما جاۋىنگەر سول جولدا قۇربان بولدى. مايداندا ءبىزدىڭ الدىمىزدا تەك ءبىر عانا ماقسات تۇردى, ول – جەڭىسكە جەتۋ ەدى. قاندى قاساپتىڭ ازابىنان قۇتىلعان الەم بۇگىن جەڭىس كۇنىن ۇلكەن مەرەكە ەتىپ تويلاۋدا. ۇرىس الاڭىندا جان اياماي شايقاسقان بارلىق ارداگەرلەر ۇرپاقتارىمەن بىرگە ىنتىماعى جاراسقان قازاقستاندا تاتۋ-ءتاتتى ءومىر ءسۇرىپ جاتىر, – دەدى مايدانگەر.
استانا قالاسى ءماسليحاتىنىڭ حاتشىسى سانسىزباي ەسىلوۆ:
– قازاقتىڭ دالاسىندا شايقاس بولماسا دا, وسى جەردە, اقمولا وبلىسىنداعى گوسپيتالدا قانشاما قىزىل اسكەر جان تاپسىردى. ءبىز سولاردىڭ رۋحىنا قۇران باعىشتاپ, تاعزىم ەتەمىز. ءبىزدىڭ باتىر اتالارىمىز ءفاشيزمدى جەڭىپ, وتانىمىزعا عانا ەمەس, الەمگە تىنىشتىق سىيلادى. ەلىمىزدەن 1 ميلليون 200 مىڭ ازامات ەكىنشى دۇنيەجۇزىلىك سوعىسقا اتتانىپ, جارتىسى قايتىپ ورالمادى. قازىر ارامىزداعى جۇرگەن ارداگەرلەردىڭ قاتارى كۇن ساناپ سيرەپ بارادى. ولاردى كوزى تىرىسىندە باعالاپ, قادىرىنە جەتە بىلەيىك. استانا قالاسىنىڭ اكىمدىگى مايدانگەرلەردى ەلەۋسىز قالدىرماي, قاشاندا كومەك قولىن سوزىپ كەلەدى, – دەپ اتاپ ءوتتى.
شارادان سوڭ ارداگەرلەر مەن تۋىستارىنا ارنالىپ داستارحان جايىلدى.
